Numera 13:1-33
13 Ona fetalai mai lea o Ieova iā Mose e faapea:
2 “Ia e aauina atu ni tane e ō faalilolilo e mataʻi le laueleele o Kanana, lea o le a ou avatu i le fanauga a Isaraelu.+ O tane taʻitasi tou te aauina atu, ia fai ma sui o le ituaiga o lona tamā, e taʻitasi foʻi ma fai ma taʻitaʻi+ iā i latou.”
3 O le faatonuga a Ieova ua aauina atu ai e Mose i latou mai i le toafa o Parana.+ O tane uma o ulu ia o le fanauga a Isaraelu.
4 O o latou igoa nei: O Samua le atalii o Sakuro, mai i le ituaiga o Reupena;
5 o Safata le atalii o Hori, mai i le ituaiga o Simeona;
6 o Kalepo+ le atalii o Iefune, mai i le ituaiga o Iuta;
7 o Ikalo le atalii o Iosefa, mai i le ituaiga o Isakara;
8 o Hosea+ le atalii o Nuno, mai i le ituaiga o Efaraima;
9 o Paleti le atalii o Rafo, mai i le ituaiga o Peniamina;
10 o Katieli le atalii o Soti, mai i le ituaiga o Sepulona;
11 o Kati le atalii o Suse, mai i le ituaiga o Iosefa+ mo le ituaiga o Manase;+
12 o Amueli le atalii o Kameli, mai i le ituaiga o Tanu;
13 o Seturi le atalii o Mikaele, mai i le ituaiga o Asera;
14 o Naepi le atalii o Vapese, mai i le ituaiga o Nafatali;
15 o Keueli le atalii o Maki, mai i le ituaiga o Kato.
16 O igoa ia o tane ua aauina atu e Mose e ō faalilolilo e mataʻi le atunuu. Ua faaigoa pea e Mose Hosea le atalii o Nuno, o Iosua.*+
17 Ina ua aauina atu faalilolilo i latou e Mose e mataʻi le laueleele o Kanana, ua ia fai atu iā i latou: “Ia outou ō aʻe i laufanua o Nekepi,+ ma outou ō aʻe i vaega maugā.+
18 E ao ona outou vāai pe faapeʻī le laueleele+ ma tagata o loo nonofo ai, pe malolosi i latou pe vaivai, pe toʻatele foʻi i latou pe toʻalaiti;
19 ma pe faapeʻī le laueleele ua latou nonofo ai, pe lelei pe leaga, ma pe faapeʻī foʻi aai o loo latou nonofo ai, pe nonofo i faleʻie po o ni aai ua malupuipuia;
20 ma pe faapeʻī le fanua pe lauolaola pe lafulafuā,+ pe iai ni laau pe leai. E ao ona outou lototetele+ ma aumai ni fua o le fanua mai i lea laueleele.” O aso ia e maua ai uluaʻi fua matua o le laau o le vine.+
21 Ona latou ō aʻe faalilolilo lea e mataʻi le laueleele mai i le toafa o Tisina+ e oo atu i Reopa+ e oo atu foʻi i le mea e ui atu ai i Amato.+
22 Ua latou ō aʻe mai i laufanua o Nekepi+ ma taunuu i Heperona.+ Ua i inā foʻi o Aimano, Sesai, ma Talemai+ o fanau ia a Anaki.+ I le ma lea na fausia Heperona+ i le fitu tausaga muamua atu a o leʻi fausia Soana+ i Aikupito.
23 Ua latou oo atu i le vanu o Esekolo,+ ona latou tā lea i lalo o se lālā ua iai le fuifui vine e tasi.+ Ua tausoa e ni tamāloloa se toʻalua i se amo, ua aumai foʻi ni rimoni+ ma ni mati.
24 Ua latou faaigoa lea mea o le vanu o Esekolo,*+ ona o le fuifui vine na tā mai i inā e atalii o Isaraelu.
25 Mulimuli ane i le faaiʻuga o aso e fā sefulu,+ ona latou toe foʻi ai lea mai i le mataʻiina faalilolilo o le laueleele.
26 Ua latou ō mai ma ō atu iā Mose ma Arona, ma le faapotopotoga atoa o le fanauga a Isaraelu i Katesa,+ i le toafa o Parana. Ua latou taʻu atu le tala iā i laʻua ma le faapotopotoga atoa ma ua faaali atu iā i latou fua o le laueleele.
27 Ua latou faamatala atili atu iā te ia e faapea: “Na matou ō atu i le laueleele na e aauina atu i ai i matou, ma e moni o loo tafe ai le suāsusu ma le meli,+ ma o fua nei o lona fanua.+
28 Ae o le mea moni o tagata o loo nonofo ai i lea laueleele e malolosi, ma e tetele o latou aai ua malupuipuia;+ na matou vāai ai foʻi i le fanau a Anaki.+
29 O loo nonofo tagata Amaleka+ i le laufanua o Nekepi,+ ma o loo nonofo le ʻau Hetī, le ʻau Iepusē,+ ma le ʻau Amorī+ i vaega maugā, a o tagata Kanana+ o loo nonofo i le talafatai o le sami ma i tafatafa ane o Ioritana.”
30 Ua taumafai Kalepo+ e faafilemu tagata ina ia latou faalogo ai iā Mose ma faapea atu: “Ia tatou ō lava, ma fai mo i tatou le laueleele auā e mautinoa e tatou te manumalo ai.”+
31 A ua faapea mai tamāloloa na ō atu faatasi ma ia: “E lē mafai ona tatou ō aʻe e tau ma i latou, ona e malolosi i latou nai lo o tatou.”+
32 Ua latou faamatala mai pea tala leaga+ i le fanauga a Isaraelu e uiga i le atunuu na latou ō atu faalilolilo e mataʻi ma faapea mai: “O le laueleele na matou malaga i ai e mataʻi faalilolilo, e ʻai e le laueleele ē o loo nonofo ai; o tagata uma foʻi na matou vāai i ai e tino maualuluga.+
33 Ioe na matou vāai i Nefilimi o atalii ia o Anaki,+ o ē e tupuga mai i Nefilimi; ua pei ai i matou o ni sē i o matou lava manatu, ma sa faapea foʻi i matou i o latou manatu.”+
Faamatalaga Pito i Lalo
^ O lona uiga, “O Ieova o le Faaolataga.”
^ O lona uiga, o le “Fuifui Vine.”
