Numera 14:1-45
14 Ona alalaga lea o le faapotopotoga uma, ua tagiauē pea i latou ma fetagisi+ i le pō atoa.
2 Ua muimui le fanauga a Isaraelu uma iā Mose ma Arona,+ ma ua faaseā le faapotopotoga atoa iā i laʻua: “E sili pe ana tatou feoti i Aikupito, e sili foʻi pe ana tatou feoti i lenei toafa!
3 Aiseā ua aumai ai e Ieova i tatou i lenei laueleele ina ia feoti ai i le pelu?+ O a tatou avā ma fanau iti o le a ave e fai ma pagota.+ Pe e lē sili ea ona tatou toe foʻi i Aikupito?”+
4 Ua oo lava ina faapea ane le tasi i le isi: “Seʻi o tatou tofia so tatou taʻitaʻi ma tatou toe foʻi i Aikupito!”+
5 Ona tootutuli lea ma faō+ o Mose ma Arona a o vāai atu le faapotopotoga atoa o le fanauga a Isaraelu.
6 Ua saeia e Iosua le atalii o Nuno+ ma Kalepo le atalii o Iefune+ o la ofu,+ o i laʻua foʻi o nisi o ē na ō faalilolilo e mataʻi le atunuu,
7 ma ua la fai atu i le faapotopotoga atoa o le fanauga a Isaraelu e faapea: “O le atunuu na matou ō atu faalilolilo e mataʻi, e matuā lelei lava.+
8 Afai e fiafia le finagalo o Ieova iā i tatou,+ o le a ia avatu i tatou i lea laueleele ma tuuina mai iā i tatou, o le laueleele e tafe ai le suāsusu ma le meli.+
9 Ae aua neʻi fouvale iā Ieova;+ o outou, aua tou te fefefe i tagata o le laueleele,+ auā o meaʻai i latou iā i tatou. Ua leai so latou puipuiga iā i latou,+ ma ua faatasi Ieova ma i tatou.+ Aua tou te fefefe iā i latou.”+
10 Peitaʻi, ua faapea ane le faapotopotoga atoa e fetogi i laʻua i maa.+ Ona faaali mai lea o le mamalu o Ieova i luga o le faleʻie o le feiloaʻiga a o vāai atu le fanauga uma a Isaraelu.+
11 Ona fetalai mai lea o Ieova iā Mose: “O le ā le umi+ e lē faaaloalo mai ai nei tagata iā te aʻu,+ o le ā foʻi le umi e latou te lē faatuatua mai ai iā te aʻu, e ui i le tele o faailoga na ou faia iā i latou?+
12 Seʻi oʻu taia i latou i faamaʻi ma faaumatia ai i latou, ma ou te faia oe ma nuu tele ma malosi e sili atu nai lo o i latou.”+
13 Ae ua faapea atu Mose iā Ieova: “O le a faalogo tagata Aikupito i lenei tala, auā na e aumaia i lou mana lenei nuu mai iā i latou.+
14 O le a latou taʻu atu foʻi lenei tala i ē o loo nonofo i lenei atunuu. Ua latou faalogo o oe o Ieova o loo faatasi ma lenei nuu,+ o lē foʻi na faafesagaʻi ma i latou.+ O oe o Ieova, ua tū lou ao i luga aʻe o i latou, pe a ao foʻi e te afio i o latou luma i le ao faaniutū, a o le afi faaniutū i le pō.+
15 Pe afai e te fasiotia lenei nuu e pei o se tagata e toʻatasi,+ ona fai ane lea o atunuu ua faalogo i lou taʻutaʻua e faapea,
16 ‘Talu ai ua lē mafai e Ieova ona avatu lenei nuu i le laueleele na ia tautō ai iā i latou, ua ia faaumatia ai i latou i le toafa.’+
17 Faamolemole Ieova e, ia e faateleina lou mana+ e pei ona e fetalai mai ai,
18 ‘O Ieova e telegese lona toʻasā+ ma e tele lona alofa faamaoni,+ e faamagalo mea sesē ma agasala,+ ae e na te lē faasaoina lava ē e agasala mai faasalaga,+ e na te faasalaina atalii ona o mea sesē a o latou tamā, e oo lava i le tupulaga e tolu ma le tupulaga e fā.’+
19 Faamolemole ia faamagalo sesē o lenei nuu e tusa ma le tele o lou alofa faamaoni ma e pei foʻi ona e faamagalo i lenei nuu mai i Aikupito seʻia oo mai i le asō.”+
20 Ona fetalai mai lea o Ieova: “Ou te faamagalo e tusa ai ma lau upu.+
21 E lē gata i lea, o loo ola aʻu ma o le a faatumulia le lalolagi i le mamalu o Ieova.+
22 Ae o tagata uma na vāai i loʻu mamalu+ ma faailoga+ na ou faia i Aikupito ma le toafa, a o lenei ua faasefulu ona latou tofotofo+ mai pea iā te aʻu, ma lē faalogo i loʻu leo,+
23 e lē vāai lava i latou i le laueleele na ou tautō ai i o latou augātamā, e lē vāai i ai i latou uma ua lē faaaloalo mai iā te aʻu.+
24 A o laʻu auauna o Kalepo,+ talu ai ua ese le agaga ua iā te ia ma ua ia mulimuli ma lona lotoatoa iā te aʻu,+ ou te avatu ai o ia i le laueleele lea na ia alu atu i ai, e fai le laueleele mo lana fanau.+
25 A o nonofo tagata Amaleka ma tagata Kanana+ i le fanua laugatasi, ia outou liliu a taeao ma malaga atu i le toafa i le ala o le Sami Ulaula.”+
26 Ua fetalai atili mai Ieova iā Mose ma Arona e faapea:
27 “O le ā le umi e muimui ai lenei faapotopotoga leaga iā te aʻu?+ Ua ou faalogo i muimuiga a le fanauga a Isaraelu, ua latou muimui mai ai iā te aʻu.+
28 Ia fai atu iā i latou, ‘O loo fai mai Ieova: “O loo ola aʻu, ou te faia lava iā te outou e pei o a outou upu, ua oo mai i oʻu taliga!+
29 O le a taatitia o outou tino oti i lenei toafa,+ o outou tagata uma ua lesitalaina, e tusa ma le faitau aofaʻi o outou uma mai i le lua sefulu tausaga agaʻi i luga le matutua, o outou o ē na muimui mai iā te aʻu.+
30 A o outou, e tou te lē ulu atu lava i le atunuu na sii ai loʻu lima+ i se tautoga e faapea ou te faatasi ma outou, seʻi vaganā ai Kalepo le atalii o Iefune ma Iosua le atalii o Nuno.+
31 “ʻ“Ae o a outou fanau iti ia ua outou faapea mai e ave e fai ma pagota,+ ou te avatu i latou i lea mea ma o le a latou iloa ai le atunuu ua outou teena.+
32 Ae o le a taatitia o outou tino oti i lenei toafa.+
33 O le a fai o outou atalii ma leoleo mamoe i le toafa+ mo le fā sefulu tausaga, ma e tali atu i latou i lo outou faitaaga,+ seʻia feoti uma outou i le toafa.+
34 E tusa ma le aofaʻiga o aso na outou mataʻi faalilolilo ai le atunuu e fā sefulu aso,+ o le a faatatau atu le aso mo le tausaga,+ o le aso mo le tausaga, o le a outou tali atu mo o outou sesē i tausaga e fā sefulu,+ auā o le a outou iloa ai loʻu vavaeese mai iā te outou.+
35 “ʻ“O aʻu o Ieova ua ou fai atu, o le mea lenei ou te matuā faia i lenei faapotopotoga leaga,+ o i latou ua faapotopoto e tetee mai iā te aʻu: E feoti i latou i lenei toafa, ma faaumatia ai i latou i inā.+
36 A o tamāloloa foʻi na aauina atu e Mose e ō faalilolilo e mataʻi le atunuu, o ē na toe foʻi ane ma faapogaia ai le muimui o le faapotopotoga atoa iā te ia, e ala i le aumaia o se lipoti leaga e uiga i lenā atunuu,+
37 e moni, o tamāloloa uma na aumaia le lipoti leaga e uiga i le atunuu, o le a feoti ona o se mala mai iā Ieova.+
38 A o Iosua le atalii o Nuno ma Kalepo le atalii o Iefune o le a ola pea i laʻua, mai iā i latou o ē na ō faalilolilo e mataʻi le atunuu.”’”+
39 Ua tautala atu Mose i nei upu i le fanauga a Isaraelu, ona matuā faanoanoa ai lea o le nuu.+
40 Ona latou usupō ai lea i le taeao ma taumafai e ō aʻe i le tumutumu o le mauga ma faapea ane: “O lea, ua tatou sauni, e ao ona tatou ō aʻe i le mea na fetalai mai ai Ieova. Auā ua tatou agasala.”+
41 A ua fai atu Mose: “Aiseā ua outou sopo tapulaa ai i le faatonuga a Ieova?+ E lē taulau outou i lea mea.
42 Aua tou te ō aʻe ona e lē o faatasi Ieova ma outou, ina neʻi faatoʻilaloina outou e o outou fili.+
43 Auā o loo iai tagata Amaleka ma tagata Kanana i outou luma;+ ma e tou te feoti i le pelu, talu ai ua outou liliuese mai iā Ieova, ma e lē faatasi pea Ieova ma outou.”+
44 Peitaʻi ua latou ō aʻe ma le faamaualuluga i le tumutumu o le mauga,+ ae e leʻi alu ese Mose mai i le togālauapi atoa ma le atolaau o le feagaiga a Ieova.+
45 Ona ō ifo lea o tagata Amaleka+ ma tagata Kanana o ē na nonofo i lenā mauga, ua fasiotia i latou ma faataapeapeina i latou seʻia oo atu i Horema.+
