Numera 16:1-50
16 Ua auaufaatasi Koru+ le atalii o Isara,+ o le atalii o Koato,+ o le atalii o Levi,+ faatasi ma Tatano+ ma Apiramo,+ o atalii o Eliapo+ ma Onu le atalii o Peleto, o atalii ia o Reupena.+
2 Ua latou auaufaatasi e tetee atu iā Mose, o i latou atoa ma tane e toʻalua selau lima sefulu o le fanauga a Isaraelu, o taʻitaʻi o le faapotopotoga, o tagata ua masani ona iai i le fono, o tane taʻutaʻua.
3 Ona latou faapotopoto lea e tetee+ atu iā Mose ma Arona ma ua faapea mai iā i laʻua: “Ua matou fiu iā te oulua, auā e paia+ le faapotopotoga atoa ma ua faatasi Ieova ma i latou.+ Aiseā ua oulua faasili ai oulua i le faapotopotoga a Ieova?”+
4 Ua faalogo Mose i ia upu ona faapaʻū faō lea o ia.
5 Ona ia fai atu lea iā Koru ma lana faapotopotoga atoa e faapea: “O taeao o le a faailoa mai ai e Ieova po o ai lē e fai mo ia+ ma o ai foʻi e paia,+ ma o ai e ao ona faalatalata atu iā te ia.+ O lē e na te filifilia+ o ia lea e faalatalata atu iā te ia.
6 Ia faia lenei mea: Ia outou ave salefu,+ o Koru ma lana faapotopotoga atoa,+
7 ma tuu i ai le afi ma avane i ai mea manogi, i luma o Ieova i le aso a taeao, ma o le tagata e filifilia+ e Ieova, o ia lea e paia. Ua lava na mea ua outou faia, o outou o atalii o Levi!”+
8 Ua faapea atili atu Mose iā Koru: “O outou o atalii o Levi, faamolemole ia faalogo mai.
9 Po o se mea faatauvaa ea iā te outou ina ua vavaeese+ outou e le Atua o Isaraelu mai i le faapotopotoga o Isaraelu, ina ia tuuina atu outou iā te ia e galulue i le faleʻie paia o Ieova, ma tutū i luma o le faapotopotoga e auauna iā i latou,+
10 ma ua ia avatu oe ma ou uso uma o atalii o Levi e faalatalata atu faatasi ma oe? Po o se mea tatau la ona outou taumafai ia tou maua foʻi ma le faiva o ositaulaga?+
11 O le mea lea ua outou tetee ai iā Ieova,+ o oe ma lau faapotopotoga atoa o ē ua faapotopoto faatasi. Aiseā ua outou muimui ai iā Arona?”+
12 Mulimuli ane ua auina atu e Mose se isi e aami mai Tatano ma Apiramo+ o atalii o Eliapo, ae ua la faapea mai: “E ma te lē ō atu!+
13 Po o se mea faatauvaa ea lou aumaia o i matou mai i le laueleele o loo tafe ai le suāsusu ma le meli ma e fasiotia i matou i le toafa,+ o lea ua tele naʻuā foʻi lou manaʻo e avea oe ma o matou perenise?+
14 Auā foʻi e te leʻi avea i matou i se laueleele e tafe ai le suāsusu ma le meli,+ ina ia e tuuina mai iā i matou ni tofi o fanua ma togāvine. Po ua e fia manaʻo ea e sali ese mata o ia tagata? E ma te lē ō atu!”
15 Ona matuā ita ai lea o Mose ma faapea atu iā Ieova: “Aua lava neʻi e silasila i a latou taulaga i meaʻai.+ Ou te leʻi avea sa latou asini poʻa se tasi, pe agaleaga atu i se tasi o i latou.”+
16 Ua faapea atu Mose iā Koru:+ “O oe ma lau faapotopotoga atoa, ia outou tulaʻi i luma o Ieova+ a taeao, o oe ma i latou ma Arona.
17 Ia taʻitasi ma ave lana salefu, ma outou avane i ai mea manogi ma ia taʻitasi ma alu atu ma lana salefu i luma o Ieova, e lua selau lima sefulu mea e faamū ai mea manogi, ia taʻitasi oe ma Arona ma ave lana salefu.”
18 Ua taʻitasi ma ave lana mea e faamū ai mea manogi, ua tuu i ai le afi ma avane i ai mea manogi, ma tutū i luma o le faleʻie o le feiloaʻiga faatasi ma Mose ma Arona.
19 Ina ua faapotopoto mai e Koru le faapotopotoga+ atoa i le faitotoʻa o le faleʻie o le feiloaʻiga e tetee iā i laʻua, ona faaali mai lea o le mamalu o Ieova i le faapotopotoga uma.+
20 Ua fetalai mai Ieova iā Mose ma Arona e faapea:
21 “Ia oulua ō ese+ mai i lenei faapotopotoga, ina ia ou faaumatia+ vave i latou.”
22 Ona la faapaʻuʻū faō lea ma faapea atu: “Le Atua e, le Atua o le ola o tagata ma mea uma,+ pe e te toʻatamaʻi ea i le faapotopotoga atoa ona o le agasala a le tagata e toʻatasi?”+
23 Ona fetalai mai lea o Ieova iā Mose:
24 “Ia e fai atu i le faapotopotoga e faapea, ‘Ia ō ese mai i autafa o faleʻie o Koru, Tatano, ma Apiramo!’”+
25 Mulimuli ane ona ō atu lea o Mose ma toeaina+ o Isaraelu iā Tatano ma Apiramo.
26 Ua ia fai atu i le faapotopotoga e faapea: “Faamolemole ia outou ō ese mai i luma o faleʻie o ia tane leaga ma aua tou te fetagofi i so o sa latou mea,+ ina neʻi faaumatia outou ona a latou agasala uma.”
27 Ua latou ō ese loa mai i itu uma o faleʻie o Koru, Tatano, ma Apiramo, ona ō mai lea i fafo o Tatano ma Apiramo, ua tutū i faitotoʻa o o la faleʻie+ faatasi ma a la avā, o o la atalii, ma a la fanau iti.
28 Ua fai atu Mose: “O nei mea e tou te iloa ai ua auina mai aʻu e Ieova e faia ia galuega uma,+ ae ou te lē faia ona o loʻu loto:+
29 Afai e feoti ia tagata e pei o le feoti o tagata uma, ma e faasalaina i latou e pei o le faasalaga e oo i tagata uma,+ o lona uiga la e lē o Ieova na auina mai aʻu.+
30 Ae afai o se mea fou o le a faia e Ieova,+ e faamaga le gutu o le eleele ma folo i latou+ ma a latou mea uma, ma ō ifo i latou a o feola i le Tuugamau,*+ ona outou iloa ai lea ua matuā lē faaaloalo ia tane iā Ieova.”+
31 Ina ua uma ona ia fai atu nei upu uma, ona amata lea ona māvaevae le eleele i lalo ifo o i latou.+
32 Ua faamaga le gutu o le eleele ma folo i latou, o o latou aiga, o tagata uma na iā Koru ma a latou mea uma.+
33 Ua latou ō ifo i lalo i le Tuugamau a o feola i latou, ma ē uma ua iā i latou, ua tanumia i latou i le eleele+ ma faaumatia ai mai i le faapotopotoga uma.+
34 Ua feʻei i latou ma ua sosola ai tagata Isaraelu uma nai i lea mea, auā ua latou faapea ane: “Ua tatou fefefe ina neʻi folo i tatou e le eleele!”+
35 Ua alu ifo se afi mai iā Ieova+ ma faaumatia ai le toʻalua selau lima sefulu o tane o loo avatua mea manogi.+
36 Ua fetalai mai Ieova iā Mose e faapea:
37 “Ia e fai atu iā Eleasaro le atalii o Arona le ositaulaga, e ao ona ia aveina aʻe salefu+ mai i le afi, ‘Ia e faasalalau le afi i o; auā e paia ia mea,
38 o salefu a tane o ē ua feoti ona o a latou lava agasala.+ Ia faaaogā ia mea e faia ai ni mea mafolafola manifinifi e ufiufi ai le fata faitaulaga,+ auā na latou aveina atu ai i luma o Ieova, ma ua paia ai; e fai ma faailoga i atalii o Isaraelu.’”+
39 Ona ave lea e Eleasaro le ositaulaga, o salefu ʻapamemea,+ na avatu e i latou na susunuina, ua latou sasa ia mea ina ia faalautele e ufiufi ai le fata faitaulaga,
40 e fai ma faamanatuga i atalii o Isaraelu ina neʻi faalatalata atu se tagata ese+ e lē o se tasi o le fanau a Arona, e faamū mea manogi i luma o Ieova,+ ma aua neʻi pei se tasi o Koru ma lana faapotopotoga,+ e pei ona fetalai mai ai Ieova iā te ia e ala iā Mose.
41 A o le aso na sosoo ai na muimui ai le fanauga a Isaraelu iā Mose ma Arona+ e faapea: “O oulua na, ua oulua fasiotia tagata o Ieova.”
42 Ua faapotopoto e le faapotopotoga i latou lava e tetee atu iā Mose ma Arona, ua latou liliu atu i le faleʻie o le feiloaʻiga; faauta ua ufitia i le ao ma ua faaali mai ai le mamalu o Ieova.+
43 Ona ō atu lea o Mose ma Arona i luma o le faleʻie o le feiloaʻiga.+
44 Ua fetalai mai Ieova iā Mose e faapea:
45 “Ia oulua ō ese mai i lea faapotopotoga, ae seʻi ou faaumatia vave i latou.”+ Ona la faapaʻuʻū faō ai lea.+
46 Ona fai atu lea o Mose iā Arona: “Ia e ave le mea e faamū ai mea manogi ma tuu i ai le afi mai i le fata faitaulaga,+ ma avane i ai ni mea manogi, ma ia e alu faavave i le faapotopotoga e fai le togisala mo i latou,+ auā ua toʻatamaʻi Ieova.+ Ua amata le mala!”
47 Ona ave loa lea e Arona o le mea e faamū ai mea manogi e pei ona fai atu ai Mose, ua ia tamoʻe atu i le mea o iai le faapotopotoga; faauta! ua amata le mala i le nuu. Ona ia tuu lea o le mea manogi i luga o le afi ma faia le togisala mo le nuu.
48 Ua ia tū pea i le va o ē ua feoti ma ē o loo ola.+ Mulimuli ane ua taofia le mala.+
49 E toʻasefulu fā afe, fitu selau i latou na feoti i le mala, e ese mai iā i latou na feoti ona o Koru.
50 Ua toe foʻi Arona iā Mose i le faitotoʻa o le faleʻie o le feiloaʻiga, ae ua taofia le mala.
Faamatalaga Pito i Lalo
^ Po o “Seoli,” e mai le upu Eperu sheʼohlʹ. Tagaʻi i le Faaopoopoga e 6.
