Numera 17:1-13
17 Ua fetalai mai Ieova iā Mose e faapea:
2 “Ia e talanoa atu i le fanauga a Isaraelu, ma ia e aumaia mai iā i latou ni tootoo,+ e taʻitasi aiga o o latou tamā ma le tootoo mai i o latou taʻitaʻi,+ e tusa ma le aiga o o latou tamā, e sefulu lua tootoo. Ia e tusia le igoa o le tagata i luga o lona tootoo.
3 Ia e tusia le igoa o Arona i le tootoo o Levi, auā e tasi le tootoo mo ulu o aiga o o latou tamā.
4 E ao ona e tuuina na tootoo i le faleʻie o le feiloaʻiga i luma o le Atolaau o le Feagaiga,*+ i le mea e masani ona ou faaali atu ai iā te outou.+
5 O le tagata ou te filifilia,+ o le a fuga mai fua i lona tootoo, ou te faamuta ai muimuiga+ a le fanauga a Isaraelu iā te aʻu, ua latou muimui ai iā te oulua.”+
6 Ua fai atu Mose i le fanauga a Isaraelu, ona aumaia lea e o latou taʻitaʻi iā te ia o le tootoo mo taʻitaʻi taʻitoʻatasi, o le tootoo mo taʻitaʻi taʻitoʻatasi, e tusa ma aiga o o latou tamā, e sefulu lua tootoo;+ ma ua iai le tootoo o Arona faatasi ma o latou tootoo.+
7 Ona tuuina lea e Mose o tootoo i luma o Ieova i le faleʻie i le mea ua iai le Atolaau o le Feagaiga.+
8 I le aso na sosoo ai, ona alu atu ai lea o Mose i le faleʻie i le mea ua iai le Atolaau o le Feagaiga, faauta foʻi! ua fuga mai le tootoo o Arona mo le aiga o Levi, ua tuli oso mai moemoe, ua matala mai fua, ma ua fua mai sekati matutua.
9 Ua aumai i fafo e Mose o tootoo uma mai i luma o Ieova i atalii o Isaraelu, ua latou vaavaai i ai ma ua taʻitasi ma ave lona tootoo.
10 Ona fetalai mai lea o Ieova iā Mose: “Ia toe tuu le tootoo o Arona+ i luma o le atolaau o le feagaiga, ia fai ma faailoga+ i atalii fouvale,+ ina ia taofia ai lo latou faitio iā te aʻu, neʻi feoti i latou.”
11 Ua faapea lava ona faia e Mose e pei ona poloaʻi mai ai Ieova iā te ia. Ua faapea lava ona faia e ia.
12 Ona fai mai lea o le fanauga a Isaraelu iā Mose: “O le a matou feoti, o le a fano i matou, o le a fano lava i matou uma.+
13 E oti+ so o se tasi e faalatalata+ i le faleʻie paia o Ieova! Po o le a feoti uma i matou?”+
Faamatalaga Pito i Lalo
^ Po o le “Molimau.”
