Numera 27:1-23
27 Ona ō mai ai lea o afafine o Selofeata+ le atalii o Eferu, le atalii o Kiliata, le atalii o Makiro, le atalii o Manase+ mai i le aiga o Manase, le atalii o Iosefa. O igoa nei o ona afafine: O Maala, o Noa, o Hakelu, o Meleka ma Tiresa.+
2 Ua latou tutū i luma o Mose ma Eleasaro le ositaulaga,+ ma luma foʻi o taʻitaʻi ma le faapotopotoga atoa, i le faitotoʻa o le faleʻie o le feiloaʻiga, ma ua latou faapea mai:
3 “Ua oti si o matou tamā i le toafa,+ ae e leʻi iai o ia i le faapotopotoga, o le faapotopotoga lea a Koru,+ o i latou na tetee atu iā Ieova, ae ua oti ona o lana lava agasala;+ ae e leʻi maua ni ona atalii.
4 Aiseā ua aveesea ai le igoa o lo matou tamā mai i lona aiga ona ua leai ni ona atalii?+ Seʻi aumai so matou tofi faatasi ma uso o lo matou tamā.”+
5 Ona tuuina atu lea e Mose o la latou mataupu i luma o Ieova.+
6 Ua fetalai mai Ieova ua faapea mai iā Mose:
7 “E saʻo faamatalaga a afafine o Selofeata. E ao lava ona e avatu iā i latou le tofi faatasi ma uso o lo latou tamā, ma e ao foʻi ona e faia ni fuafuaga e tuu atu le tofi o lo latou tamā iā i latou.+
8 Ia e fai atu i le fanauga a Isaraelu e faapea, ‘Afai e oti se tamāloa ae e leai sona atalii, ia outou faia ni fuafuaga e tuu atu ai le tofi i ona afafine.
9 Ae afai e leai ni ona afafine, ia outou tuu atu lona tofi i ona uso.
10 Ae afai e leai ni ona uso, ia outou tuu atu lona tofi i uso o lona tamā.
11 Ae afai e leai ni uso o lona tamā, ia outou tuu atu lona tofi i le tagata o lona aiga+ e sili ona latalata lana faiā iā te ia, ma e ave mo ia le tofi. Ia fai lenei mea ma tulafono e tusa ma iʻuga o faamasinoga mo le fanauga a Isaraelu, e pei ona poloaʻi mai ai Ieova iā Mose.’”
12 Ona fetalai mai lea o Ieova iā Mose: “Ia e alu aʻe i lenei mauga o Aperima,+ ma e vaai atu i le laueleele o le a ou avatu i le fanauga a Isaraelu.+
13 A e vaai i le laueleele, ona faatasia ai lea o oe ma ou tagata+ e pei ona faatasia o Arona lou uso,+
14 talu ai na oulua fouvale i laʻu faatonuga i le toafa o Tisina i le taimi na vevesi ai le faapotopotoga,+ e tusa ai ma lo oulua lē faapaiaina+ o aʻu i o latou luma e ala i le vai. O vai nei o Meripa+ i Katesa+ i le toafa o Tisina.”+
15 Ua faapea atu Mose iā Ieova:
16 “Ia tofia se tane e Ieova, o le Atua o agaga+ o mea uma lava ua iai le ola,+ ina ia vaavaaia le faapotopotoga,+
17 o lē e ulu atu i o latou luma ma toe sau i o latou luma, ma o lē e taʻitaʻia i latou i mea uma,+ ma o lē e latou te mulimuli i ai i mea uma ina neʻi avea le faapotopotoga a Ieova e pei o ni mamoe ua leai se leoleo mamoe.”+
18 Ona fetalai mai lea o Ieova iā Mose: “Ia e ave Iosua le atalii o Nuno, o ia o se tane ua agavaa,*+ ma e ao ona e faaee lou lima i ona luga;+
19 ia e faatū o ia i luma o Eleasaro le ositaulaga ma luma o le faapotopotoga atoa, ia e tuu atu iā te ia le pule e taʻitaʻia ai le nuu a o latou vāai mai.+
20 Ia e tuuina atu iā te ia se vaega o lou mamalu,+ ina ia faalogo ai le faapotopotoga atoa o le fanauga a Isaraelu iā te ia.+
21 E tū foʻi o ia i luma o Eleasaro le ositaulaga, e ao ona ia fesili+ atu mo ia e tusa ai ma le faamasinoga o le Urima+ i luma o Ieova. E latou te ō ona o lana faatonuga, e latou te ō mai foʻi ona o lana faatonuga, o ia atoa ma atalii uma o Isaraelu ua faatasi ma ia, ma le faapotopotoga atoa.”
22 Ona faia lea e Mose e pei ona poloaʻi mai ai o Ieova iā te ia. Ua ia ave Iosua ua faatū o ia i luma o Eleasaro+ le ositaulaga, ma luma foʻi o le faapotopotoga atoa
23 ma faaee ona lima i ona luga ma tuu atu le pule iā te ia,+ e pei ona fetalai mai ai o Ieova e ala iā Mose.+
Faamatalaga Pito i Lalo
^ I le gagana Eleni, “o se tane ua iai le agaga.”
