Numera 28:1-31
28 Ua toe fetalai mai Ieova iā Mose e faapea:
2 “Ia e poloaʻi atu i le fanauga a Isaraelu, ma ia e faapea atu iā i latou, ‘Ia outou aumaia pea iā te aʻu o aʻu taulaga, o laʻu meaʻai,+ o aʻu taulaga ua faia i le afi o se mea ua faamalieina ai aʻu,+ i taimi ua atofaina.’+
3 “Ia e fai atu iā i latou, ‘O le taulaga lenei e tou te avatu iā Ieova ua faia i le afi: e lua tamaʻi mamoe poʻa e matuā lelei lava e taʻitasi tausaga, mo aso taʻitasi e fai ma taulaga mū faifai pea.+
4 E te fai taulaga i le isi tamaʻi mamoe poʻa i le taeao, a o le isi tamaʻi mamoe poʻa e te fai taulaga ai i le afiafipō,*+
5 e te avatu faatasi ma ia taulaga le taulaga i meaʻai,+ ua faia i le tasi vaesefulu o le efa+ o le falaoamata lelei, ua iai le tasi vaefā o le suāuu mai i olive ua tuʻia;+
6 o le taulaga mū faifai pea,+ lea sa faavaeina i le Mauga o Sinai o se mea manogi e faamalieina ai, o le taulaga iā Ieova ua faia i le afi,+
7 faatasi ma taulaga i meainu,+ o le tasi vaefā o le sinu mo tamaʻi mamoe poʻa taʻitasi.+ Ia liligi atu i le mea paia le taulaga i meainu o ʻava malosi+ iā Ieova.
8 E te fai taulaga i le isi tamaʻi mamoe poʻa i le afiafipō. E te faia faatasi foʻi ma le taulaga i meaʻai e pei ona faia i le taeao, e faapea foʻi i le taulaga i meainu, o le taulaga ua faia i le afi o se mea manogi e faamalieina ai Ieova.+
9 “‘Peitaʻi i le aso sapati,+ e lua ni tamaʻi mamoe poʻa e taʻitasi tausaga e matuā lelei lava, ma le lua vaesefulu o le efa o le falaoamata lelei ua iai sina suāuu e fai ma taulaga i meaʻai, faatasi ma le taulaga i meainu,
10 e faia ai le taulaga mū i sapati uma, faatasi ma le taulaga mū faifai pea+ ma taulaga i meainu.+
11 “‘O le amataga foʻi o o outou masina, ia outou aumaia ni tamaʻi povi poʻa se lua, o le mamoe poʻa e tasi, ma tamaʻi mamoe poʻa e fitu e matuā lelei lava e taʻitasi tausaga, e fai ai le taulaga mū iā Ieova,+
12 ma le tolu vaesefulu o le efa o le falaoamata lelei ua iai sina suāuu mo povi poʻa taʻitasi, ma le lua vaesefulu o le efa o le falaoamata lelei ua iai sina suāuu, e fai ma taulaga i meaʻai+ mo le mamoe poʻa e tasi,+
13 ma le tasi vaesefulu o le efa o le falaoamata lelei ua iai sina suāuu, e fai ma taulaga i meaʻai mo tamaʻi mamoe poʻa taʻitasi, e fai ai le taulaga mū o se mea manogi e faamalieina ai,+ o se taulaga iā Ieova ua faia i le afi.
14 O taulaga i meainu e tatau ona iai le ʻafa+ o le sinu o le uaina mo se povi poʻa, o le tasi vaetolu+ o le sinu mo le mamoe poʻa, o le tasi vaefā+ o le sinu mo le tamaʻi mamoe poʻa. O le taulaga mū lenei i masina taʻitasi uma o masina o le tausaga.+
15 E ao foʻi ona fai taulaga i le tamaʻi ʻoti e tasi,+ e fai ma taulaga o agasala iā Ieova e ese mai i le taulaga mū faifai pea lea e fai faatasi ma le taulaga i meainu.+
16 “‘O le masina muamua, i le aso lona sefulu fā o le masina, e fai ai le paseka a Ieova.+
17 E fai le tausamiga i le aso sefulu lima o lea masina. E ʻai ai falaoa e lē faafefeteina mo aso e fitu.+
18 O le aso muamua e fai ai le tauaofiaga paia.+ Aua tou te faia ai ni galuega mamafa.+
19 E ao ona outou aumaia tamaʻi povi poʻa e lua, o le mamoe poʻa e tasi ma tamaʻi mamoe poʻa e fitu e taʻitasi tausaga, ina ia fai ai ni taulaga i le afi, o le taulaga mū+ lea iā Ieova.+ E ao ona outou vaavaai ua matuā lelei lava ia manu.+
20 O taulaga i meaʻai+ ia e avatu faatasi ma na manu, o le falaoamata lelei ua iai sina suāuu, e ao ona outou avatu le tolu vaesefulu o le efa mo le povi poʻa, ma e lua vaesefulu o le efa+ mo le mamoe poʻa.
21 E te avatu le tasi vaesefulu o le efa+ mo tamaʻi mamoe poʻa taʻitasi e fitu;
22 ma le ʻoti e tasi e fai ai le taulaga o agasala ina ia fai ma togisala mo outou.+
23 E tou te fai taulaga i ia mea e ese mai i le taulaga mū o le taeao, lea e fai ma taulaga mū+ faifai pea.+
24 O ia mea tou te fai taulaga ai i aso taʻitasi mo aso e fitu o meaʻai ia,+ o le taulaga ua faia i le afi, o se mea manogi e faamalieina ai Ieova.+ E ao foʻi ona avatu faatasi ma le taulaga mū faifai pea atoa ai ma le taulaga i meainu.
25 E ao ona outou faia se tauaofiaga paia i le aso lona fitu.+ Aua tou te faia ai ni galuega mamafa.+
26 “‘E ao ona outou faia se tauaofiaga paia i le aso o uluaʻi fua matua,+ pe a outou avatu a outou taulaga i meaʻai fou iā Ieova, i la outou tausamiga o vaiaso.+ Aua tou te faia ai ni galuega mamafa.+
27 E ao ona outou avatu ni tamaʻi povi poʻa se lua, o se mamoe poʻa e tasi, o tamaʻi mamoe poʻa e fitu e taʻitasi tausaga, e fai ai le taulaga mū, o se mea manogi lea e faamalieina ai Ieova;+
28 ma o taulaga i meaʻai e avatu faatasi ma ia manu, o le tolu vaesefulu o le efa o le falaoamata lelei ua iai sina suāuu mo povi poʻa taʻitasi, ae e lua vaesefulu o le efa+ mo le mamoe poʻa e tasi,
29 o le tasi vaesefulu o le efa+ mo tamaʻi mamoe poʻa taʻitasi o tamaʻi mamoe poʻa e fitu;
30 o le ʻoti e tasi e fai ai le togisala mo outou.+
31 E tou te faia ia taulaga e ese mai i taulaga mū faifai pea ma taulaga i meaʻai.+ E ao ona outou vaavaai ua matuā lelei lava ia manu,+ atoa ai ma taulaga i meainu.+
Faamatalaga Pito i Lalo
^ I le gagana Eperu, i “le va o afiafi e lua.” O lona uiga o le va o le goto o le lā ma le pō.
