Numera 3:1-51
3 O augātupulaga nei o Arona ma Mose i le aso na fetalai mai ai Ieova iā Mose i le Mauga o Sinai.+
2 O igoa nei o atalii o Arona: O Natapu, o le ulumatua lea, o Aviu,+ o Eleasaro+ ma Itamaro.+
3 O igoa nei o atalii o Arona, o ositaulaga faauuina o ē na tuu atu i ai le pule,* e auauna ai o ni ositaulaga.+
4 Peitaʻi ua feoti Natapu ma Aviu i luma o Ieova, ina ua la faamū le afi+ ua faasāina i luma o Ieova i le toafa o Sinai; e leʻi maua foʻi ni o la atalii. Ae ua faaauau ona auauna Eleasaro+ ma Itamaro+ o ni ositaulaga faatasi ma lo la tamā o Arona.
5 Ua fetalai mai Ieova iā Mose e faapea:
6 “Ia aami mai le ituaiga o Levi,+ ma tuuina atu i latou i luma o Arona le ositaulaga, ina ia latou auauna+ iā te ia.
7 E ao ona latou tausia o latou tiute tauave iā te ia, ma o latou tiute tauave i le faapotopotoga uma i luma o le faleʻie o le feiloaʻiga, i le faia o le auaunaga e tusa ai ma le faleʻie paia.
8 E ao ona latou vaaia ipu+ uma o le faleʻie o le feiloaʻiga, ma tausia foʻi le tiute tauave o atalii o Isaraelu i le faia o le auaunaga e tusa ai ma le faleʻie paia.+
9 Ia e tuuina atu le ʻau sa Levī iā Arona ma ona atalii. O i latou ua tofia mo ia, ma ua tuuina atu iā te ia mai i atalii o Isaraelu.+
10 E te tofia Arona ma ona atalii, ma e tatau ona latou tausia la latou galuega faaositaulaga;+ e fasiotia so o se isi e faalatalata atu i ai.”+
11 Ua fetalai atili mai Ieova iā Mose e faapea:
12 “A o aʻu, Ou te talia le ʻau sa Levī mai i atalii o Isaraelu e sui ai ulumatua*+ uma lava mai i atalii o Isaraelu; e fai mo aʻu le ʻau sa Levī.
13 E fai mo aʻu ulumatua uma.+ I le aso na ou faaumatia ai ulumatua uma a le atunuu o Aikupito,+ na ou faapaia ai mo aʻu o ulumatua uma o Isaraelu, o ulumatua a tagata atoa ma manu.+ E fai mo aʻu i latou uma. O aʻu o Ieova.”
14 Ua fetalai mai pea Ieova iā Mose i le toafa o Sinai+ e faapea:
15 “Ia lesitalaina atalii o Levi e tusa ma aiga o o latou tamā, e tusa foʻi ma o latou aiga. Ia e lesitalaina tane uma e amata mai i le tasi le masina agaʻi i luga le matutua.”+
16 Ua lesitalaina i latou e Mose e tusa ma le poloaʻiga a Ieova, e pei ona faatonuina ai o ia.
17 O igoa nei o atalii o Levi:+ o Keresona, o Koato ma Merari.+
18 O igoa nei o atalii o Keresona, o aiga ia na tupuga mai iā te ia: o Lipeni ma Semi.+
19 O atalii nei o Koato,+ o aiga ia na tupuga mai iā te ia, o Amaramo, o Isara,+ o Heperona ma Usialu.
20 O atalii nei o Merari,+ o aiga ia na tupuga mai iā te ia, o Maali+ ma Muse.+
O aiga ia o le ʻau sa Levī e tusa ma o latou tamā.
21 O aiga na tupuga mai iā Keresona o tagata Lipeni+ ma tagata Semi.+ O aiga ia o Keresona.
22 Na lesitalaina i latou e tusa ma le aofaʻi o tane uma e mai i le tasi le masina agaʻi i luga le matutua.+ E toʻafitu afe lima selau i latou na lesitalaina.+
23 E nonofo aiga o tagata Keresona i tua o le faleʻie paia.+ E faatutū o latou faleʻie i le itu i sisifo.
24 O le taʻitaʻi o le aiga* o tagata Keresona, o Eliasafo le atalii o Laeli.
25 O le tiute tauave o atalii o Keresona+ e tusa ai ma le faleʻie o le feiloaʻiga, o le faleʻie paia lea ma o mea eseese e ufiufi+ ai le faleʻie,+ o le ʻie pupuni+ i le faitotoʻa o le faleʻie o le feiloaʻiga,
26 ma mea e tautau+ i le lotoā, o le ʻie pupuni+ i le faitotoʻa o le lotoā, lea e soo ai le faleʻie paia ma le fata faitaulaga, ma maea+ o le faleʻie, ma mea uma e tusa ma lenei auaunaga.
27 Na tupuga mai iā Koato+ le aiga o Amaramo, o le aiga o Isara, o le aiga o Heperona ma le aiga o Usialu. O aiga ia o Koato.
28 E toʻavalu afe ono selau le aofaʻi o tane uma, e amata mai i le tasi le masina agaʻi i luga le matutua, o loo tausia le tiute tauave e tusa ma le mea paia.+
29 Ua faatutū faleʻie o aiga o atalii o Koato i le itu i saute o le faleʻie paia.+
30 O le taʻitaʻi o le aiga tamā o aiga uma o Koato, o Elisafano le atalii o Usialu.+
31 O la latou tiute tauave+ o le vaavaaia lea o le Atolaau,+ o le laulau,+ o le tuugāmolī,+ o fata faitaulaga,+ ma mea uma+ o le mea paia ia e faaaogā e fai ai le auaunaga, o le ʻie pupuni,+ ma mea uma e tusa ma lea auaunaga.
32 O le taʻitaʻi o taʻitaʻi uma o le ʻau sa Levī, o Eleasaro+ o ia o le atalii o Arona le ositaulaga, o lē e vaaia ē e tausia tiute tauave e tusa ma le mea paia.
33 Na tupuga mai iā Merari le aiga o Maali+ ma le aiga o Muse.+ O aiga ia o Merari.+
34 Na lesitalaina i latou e tusa ma le aofaʻi o tane uma e mai i le tasi le masina agaʻi i luga le matutua, e toʻaono afe lua selau i latou.+
35 O le taʻitaʻi o le aiga o aiga uma o Merari, o Surielu le atalii o Aviaila. Ua latou faatutū o latou faleʻie i le itu i mātū o le faleʻie paia.+
36 O le tiute tauave o atalii o Merari, o le vaavaaia lea o auivi laupapa+ o le faleʻie paia, o ona faalava,+ o ona poutū,+ o ona lagolago ma ona ipu+ ma mea uma e tusa ma lenei auaunaga,+
37 o poutū+ uma e soo ai le lotoā, o lagolago,+ o pine ma maea o le faleʻie.
38 O i latou e faatutū o latou faleʻie i le itu i sasaʻe o le faleʻie paia, i luma o le faleʻie o le feiloaʻiga i le mea e oso aʻe ai le lā, o Mose, o Arona ma ona atalii, o i latou ia e tausia le tiute tauave e tusa ai ma le faleʻie paia,+ o le tiute tauave lea mo atalii o Isaraelu. E fasiotia so o se isi e faalatalata ane i ai.+
39 O i latou uma ua lesitalaina o le ʻau sa Levī, na lesitalaina e Mose ma Arona ona o le faatonuga a Ieova, e tusa ma o latou aiga, o tane uma e amata mai i le tasi le masina agaʻi i luga le matutua, e toʻalua sefulu lua afe i latou.
40 Ona fetalai mai lea o Ieova iā Mose: “Ia lesitalaina tane ulumatua uma o atalii o Isaraelu e amata mai i le tasi le masina agaʻi i luga le matutua,+ ma faamauina lo latou faitau aofaʻi.
41 Ia e aumai le ʻau sa Levī mo aʻu, e sui ai ulumatua uma o atalii o Isaraelu,+ ma manu lalata a le ʻau sa Levī e sui ai ulumatua o manu lalata a le fanauga a Isaraelu.+ O aʻu o Ieova.”
42 Ona faia lea e Mose e pei ona poloaʻi mai ai Ieova iā te ia, ua ia lesitalaina ulumatua uma o atalii o Isaraelu.
43 O ulumatua uma e tusa ma le aofaʻi o o latou igoa e amata mai i le tasi le masina agaʻi i luga le matutua, o i latou ia ua lesitalaina e toʻalua sefulu lua afe, lua selau fitu sefulu tolu.
44 Ua fetalai mai pea Ieova iā Mose e faapea:
45 “Ia e ave le ʻau sa Levī e sui ai ulumatua uma o atalii o Isaraelu, ia sui manu lalata a le ʻau sa Levī i a latou manu lalata; e ao ona avea le ʻau sa Levī ma oʻu tagata.+ O aʻu o Ieova.
46 O le tau foʻi e faatauina+ mai ai ulumatua e toʻalua selau fitu sefulu tolu o atalii o Isaraelu, ia ua sili atu i le aofaʻi o le ʻau sa Levī,+
47 e tatau ona e talia o sekeli e lima mo le tagata e toʻatasi.+ E ao ona e talia ia mea e tusa ma le fua masani o le mea paia. O le sekeli e tasi, e lua sefulu kire.+
48 E ao ona e avatu iā Arona ma ona atalii le tupe, o le tau ua faatauina ai i latou ua sili atu i lo latou aofaʻi.”
49 Ona ave lea e Mose o le tupe na totogi mo i latou ua sili atu lo latou aofaʻi nai lo o le aofaʻi o le ʻau sa Levī, e fai ma tau e faatauina ai.
50 Na ia talia le tupe mai i ulumatua o atalii o Isaraelu, e afe tolu selau ono sefulu lima sekeli, e tusa ma le fua masani o le mea paia.
51 Ona tuuina atu lea e Mose o le tau na faatauina ai iā Arona ma ona atalii e tusa ma le faatonuga a Ieova, e pei ona poloaʻi mai ai Ieova iā Mose.
Faamatalaga Pito i Lalo
^ I le gagana Eperu, “ia faatumu le lima” ma e faasino atu lenei faaupuga i le pule atoa i lima o ē e auauna o ni ositaulaga.
^ I le gagana Eperu, “o ulumatua uma ua tatala ai le faaʻautagata.”
^ O loo iai foʻi lenei faaupuga i le gagana Eperu i le fuaiupu e 30 ma le 35: “o le aiga o le tamā.”
