Numera 31:1-54
31 Ona fetalai mai lea o Ieova iā Mose e faapea:
2 “Ia faaoo atu le tauimasui+ i tagata Mitiana+ ona o le fanauga a Isaraelu. Mulimuli ane e faatasia atu oe i ou tagata.”+
3 Ua fai atu Mose i le nuu e faapea: “Ia sauni ni tamāloloa mai iā te outou mo le ʻautau, ina ia latou faasagatau iā Mitiana, ma faaoo le tauimasui a Ieova iā Mitiana.+
4 Ia e saunia le toʻaafe mai i ituaiga taʻitasi o ituaiga uma o Isaraelu ina ia ō atu e tau.”
5 Ona saunia lea o le toʻaafe mai i ituaiga taʻitasi mai i le faitau afe+ o Isaraelu, e toʻasefulu lua afe ua nofosauni e ō atu e tau.+
6 Ona aauina atu ai lea o i latou e Mose e toʻaafe mai i ituaiga taʻitasi e ō i le taua, o i latou atoa ma Fineaso+ le atalii o Eleasaro le ositaulaga, ua i lona lima foʻi o mea paia ma pū+ mo iligāpū o le taua.
7 Ua latou tau ma Mitiana, e pei ona poloaʻi mai ai Ieova iā Mose, ma ua latou fasiotia o tane uma lava.+
8 Ua latou fasiotia tupu o Mitiana faatasi ma i latou uma ua fasiotia, o Evi, o Rekima, o Suro, o Huro ma Repa, o tupu ia e toʻalima o Mitiana;+ ma ua latou fasiotia foʻi i le pelu o Palaamo+ le atalii o Peoro.
9 Ae ua ave faapagota e atalii o Isaraelu o fafine Mitiana ma a latou fanau;+ ua latou faoa foʻi a latou manu lalata uma, ma lafumanu uma, ma o latou tamaoaiga uma.
10 Ua latou susunuina i le afi o latou aai uma na latou nonofo ai, ma o latou faleʻie na siʻomia i pā.+
11 Ua latou ave le vete+ uma ma mea uma na faoa, o tagata atoa foʻi ma manu lalata.
12 Ona latou aumaia lea o pagota, o le vete ma mea na faoa iā Mose ma Eleasaro le ositaulaga, ma le faapotopotoga atoa o le fanauga a Isaraelu, i le togālauapi i le fanua laugatasi o Moapi,+ e lata ane i Ioritana e faafesagaʻi ma Ieriko.
13 Ona ō atu lea o Mose ma Eleasaro le ositaulaga, ma taʻitaʻi uma o le faapotopotoga, e feiloaʻi ma i latou i tua o le togālauapi.
14 Ua matuā ita Mose i tamāloloa ua tofia o le ʻautau,+ o taʻitaʻi o le taʻitoʻaafe, o taʻitaʻi o le taʻitoʻaselau o ē na ō mai i le taua.
15 Ona fai atu lea o Mose iā i latou: “Po ua outou faasaoina fafine uma?+
16 Vaai outou! O i latou ia na faapogaia ai le lē faamaoni+ o atalii o Isaraelu iā Ieova, ona o le tala a Palaamo, e tusa ai ma le mataupu iā Peoro,+ ma na oo mai ai le mala i le faapotopotoga a Ieova.+
17 Ia fasiotia loa tama tama uma mai i tamaiti, ma fasiotia fafine uma na feusuaʻi ma se tamāloa.+
18 Ia faasao teine muli uma mai i fafine ia e leʻi momoe ma ni tamāloloa.+
19 A o outou, ia outou nonofo i tua o le togālauapi mo aso e fitu. O i latou uma o ē na fasiotia se tasi,+ ma i latou uma o ē na paʻi i se isi ua fasiotia,+ e ao ona outou faamamā+ iā te outou i le aso lona tolu, ma i le aso lona fitu, o outou ma a outou pagota.
20 Ia outou faamamāina ofu uma, ma mea uma e faia i le paʻu, ma mea uma e faia i le fulufulu ʻoti, ma mea uma e faia mai i laau.”+
21 Ua fai atu foʻi Eleasaro le ositaulaga, i tamāloloa o le ʻautau o ē na ō atu i le taua: “O le aiāiga lenei o le tulafono na poloaʻi mai ai Ieova iā Mose,
22 ‘A o le auro ma le siliva, o le ʻapamemea, o uʻamea, o ʻapa ma pulu,*
23 o mea uma e lē mū i le afi,+ e ao ona outou tuu i le afi, ina ia faamamā ai.+ E ao foʻi ona faamamāina i le vai. O mea uma e mū i le afi, e ao ona outou tuu i le vai.+
24 E ao ona outou tatā o outou ofu i le aso lona fitu ma ia mamā ai, ona mafai ai lea ona outou ō mai i le mea o iai faleʻie.’”+
25 Ona fetalai mai lea o Ieova iā Mose:
26 “Ia faitau le aofaʻi o mea na maua, o tagata na ave faapagota, atoa foʻi ma manu lalata na ave, o oe ma Eleasaro le ositaulaga, ma ulu o aiga o le faapotopotoga.
27 Ia e vaeluaina mea na maua iā i latou o ē na auai ma na ō atu i le taua ma le faapotopotoga atoa.+
28 Ina ia fai ma lafoga+ mo Ieova, e ao ona e aumai mai i tane o le taua o ē na ō atu i le taua, le tagata e toʻatasi mai i tagata e toʻalima selau, ma le manu e tasi mai i povi e lima selau ma asini ma mamoe.
29 E ao ona latou aumaia ai mai i la latou ʻafa, ma e ao ona latou avatu iā Eleasaro le ositaulaga, e fai ma foaʻi iā Ieova.+
30 E ao ona e aumaia mai i le ʻafa o le fanauga a Isaraelu le tagata e toʻatasi mai i tagata e toʻalima sefulu, ma le manu e tasi mai i povi e lima sefulu, o asini ma mamoe, ma manu lalata eseese, ma e ao ona e avatu ai i tagata o le ʻau sa Levī,+ o ē o loo tausia le matafaioi e tusa ma le faleʻie paia o Ieova.”+
31 Ua faia e Mose ma Eleasaro le ositaulaga, e pei ona poloaʻi mai ai Ieova iā Mose.
32 O mea na maua, ma mea na totoe o mea na faoa e tagata i le taua, e ono selau fitu sefulu lima afe mamoe,
33 e fitu sefulu lua afe povi,
34 ma asini e ono sefulu tasi afe.
35 O le aofaʻi o tagata+ o fafine ia e leʻi momoe ma ni tamāloloa,+ e toʻatolu sefulu lua afe i latou.
36 O le ʻafa lea ua fai mo i latou na ō atu i le taua, e tusa ma le tolu selau tolu sefulu fitu afe lima selau o mamoe.
37 O le lafoga+ mo Ieova mai i mamoe, e ono selau fitu sefulu lima.
38 E tolu sefulu ono afe le aofaʻi o povi, ma o le lafoga mo Ieova mai i ia manu e fitu sefulu lua.
39 E tolu sefulu afe lima selau asini, ma o le lafoga mo Ieova mai i ia manu e ono sefulu tasi.
40 E sefulu ono afe le aofaʻi o tagata, ma o le lafoga mo Ieova mai i ia tagata e toʻatolu sefulu lua tagata.
41 Ona avatu lea e Mose o le lafoga e fai ma foaʻi mo Ieova iā Eleasaro le ositaulaga,+ e pei ona poloaʻi mai ai o Ieova iā Mose.+
42 O mea nei e tusa ma le ʻafa o le fanauga a Isaraelu, lea na vaevaeina e Mose mai i mea a tagata na ō i le taua:
43 O le ʻafa lenei o le faapotopotoga, o mamoe e tolu selau tolu sefulu fitu afe lima selau,
44 o povi e tolu sefulu ono afe,
45 o asini e tolu sefulu afe lima selau,
46 ma tagata e toʻasefulu ono afe.
47 Ona avatu lea e Mose mai i le ʻafa o le fanauga a Isaraelu, le tagata e toʻatasi mai i tagata e toʻalima sefulu, ma le manu e tasi mai i le lima sefulu o manu lalata, ma ua avatu ai i le ʻau sa Levī,+ o ē o loo tausia le matafaioi+ e tusa ma le faleʻie paia o Ieova, e pei ona poloaʻi mai ai o Ieova iā Mose.
48 Ua faalatalata atu tane ua tofia e taʻitaʻia vaega* o le ʻautau,+ o lona uiga o taʻitaʻi o le taʻitoʻaafe ma taʻitaʻi o le taʻitoʻaselau,+
49 ma ua fai mai iā Mose: “Ua faitauina e au auauna le aofaʻi o tamāloloa o le taua na i la matou vaavaaiga ma ua leai se isi o i matou na fasiotia.+
50 Seʻi o matou taʻitasi ma avatu mea ua maua e le tagata lava ia e fai ma foaʻi iā Ieova,+ o teuga o auro, o tauvae filifili, o taulima, o mama,+ o tautaliga, ma teuga a fafine,+ ina ia fai ai le togisala mo i matou i luma o Ieova.”
51 Ona talia lea e Mose ma Eleasaro le ositaulaga, o auro uma mai iā i latou+ ma teuga uma.
52 O le tau o auro uma o ia foaʻi ua latou foaʻi ai iā Ieova, e sefulu ono afe fitu selau lima sefulu sekeli, o mea ia mai i taʻitaʻi o le taʻitoʻaafe ma taʻitaʻi o le taʻitoʻaselau.
53 Ua taʻitasi ma ave e tamāloloa o le ʻautau o mea ua faoa mo ia lava.+
54 Ona talia lea e Mose ma Eleasaro le ositaulaga, o auro mai i taʻitaʻi o le taʻitoʻaafe ma taʻitaʻi o le taʻitoʻaselau, ma avatu na mea i totonu o le faleʻie o le feiloaʻiga, e fai ma faamanatuga+ o le fanauga a Isaraelu i luma o Ieova.
Faamatalaga Pito i Lalo
^ O le metala (ituaiga o uʻamea) e vaivai toe faaʻefuʻefu lanu moana, e liusuavaigofie pe a faavevela i se afi.
^ I le gagana Eperu, “o vaega e taʻitoʻaafe.”
