Numera 35:1-34
35 Ua fetalai mai Ieova iā Mose i le fanua laugatasi o le toafa o Moapi, i tala ane o Ioritana,+ e faafesagaʻi ma Ieriko e faapea:
2 “Ia poloaʻi atu i le fanauga a Isaraelu e ao ona latou avatu i le ʻau sa Levī, ni aai+ mai i o latou tofi ina ia latou nonofo ai, ma e ao foʻi ona latou avatu i le ʻau sa Levī o fanua ia ua siʻomia ai aai, ina ia aai ai lafumanu.+
3 E fai ia aai ma mea e nonofo ai i latou, a o o latou fanua e aai ai lafumanu e fai ma a latou manu lalata, o a latou manu uma ma a latou fale manu ma isi mea.
4 O fanua ia e siʻomia ai aai, e tou te avatu i le ʻau sa Levī, e amata mai i le pā e oo i le mea e gata mai ai le afe kupita.
5 Ia outou fuatia fafo o le aai i le itu i sasaʻe e lua afe kupita, ma le itu i saute e lua afe kupita, ma le itu i sisifo e lua afe kupita, ma le itu i mātū e lua afe kupita, a ua i le ogatotonu le aai. E fai lea ma laufanua e aai ai lafumanu o le aai.
6 “O aai nei tou te avatu i le ʻau sa Levī: e ono aai o sulufaʻiga+ e tou te avatu ina ia sola atu i ai le tagata fasioti tagata paʻivalea,+ atoa ma isi aai e fā sefulu lua tou te avatu iā i latou.
7 E fā sefulu valu aai uma e tou te avatu i tagata o le ʻau sa Levī atoa ai ma fanua e aai ai lafumanu.+
8 O aai tou te avatu e mai i tofi o le fanauga a Isaraelu.+ O ē ua tele o latou aai tou te aumaia ai aai e tele a o ē ua itiiti o latou aai e itiiti foʻi aai tou te aumaia ai.+ E avatu e ituaiga taʻitasi e tusa ma lo latou tofi lea o le a fai mo i latou, nisi o o latou aai mo le ʻau sa Levī.”
9 Ua fetalai mai pea Ieova iā Mose e faapea:
10 “Ia e fai atu i le fanauga a Isaraelu, ma e ao ona e faapea atu iā i latou, ‘O le a outou sopoʻia Ioritana e agaʻi atu i le laueleele o Kanana.+
11 E ao ona outou filifilia aai e talafeagai mo outou. E fai mo outou aai o sulufaʻiga, ma e sola atu i ai le fasioti tagata, o lē na fasioti tagata paʻivalea.*+
12 E fai foʻi ia aai ma sulufaʻiga iā te outou mai i le tagata e tauimasui*+ i le toto, ina neʻi oti le fasioti tagata paʻivalea ae e leʻi tū mo le faamasinoga i luma o le faapotopotoga.+
13 O aai ia tou te avatu, e ono aai o sulufaʻiga e tou te faaaogāina mo outou.
14 E tolu aai e tou te tuuina atu i lenei itu o Ioritana,+ e tolu foʻi aai e tou te tuuina atu i le laueleele o Kanana.+ E fai ia aai ma aai o sulufaʻiga.
15 E fai na aai e ono ma aai o sulufaʻiga mo le fanauga a Isaraelu, mo tagata ese+ ma ē e aumau ma i latou, ina ia sola atu i ai le fasioti tagata paʻivalea.+
16 “‘Afai e tāina e se tagata se isi i se mea ua faia i le uʻamea ma oti ai, o le fasioti tagata o ia.+ Ia matuā fasiotia lava le fasioti tagata.+
17 Ae afai na te tuʻi o ia i se maa lea e ono oti ai ma e oti ai lava, o le fasioti tagata o ia. Ia matuā fasiotia lava le fasioti tagata.
18 Afai e na te tāina o ia i se laau lea e ono oti ai ma oti ai, o le fasioti tagata o ia. Ia matuā fasiotia lava le fasioti tagata.
19 “‘O lē na te tauimasui+ i le toto, o ia lea na te fasiotia le fasioti tagata. Afai na te maua atu lea tagata, e na te fasiotia o ia.
20 Afai foʻi e tulei e se tasi i se isi ona o lona ita,+ pe lamalama iā te ia ma togi atu i ai se mea iā te ia,+ ina ia oti ai o ia;
21 pe na te faaoo lona lima iā te ia ona o lona ita ma oti ai, e ao ona fasiotia lava lea tagata. O ia o le fasioti tagata. O lē na te tauimasui atu i le toto e na te fasiotia le fasioti tagata pe a maua atu o ia.+
22 “‘Ae afai e teʻi ua ia tulei iā te ia e aunoa ma le ita pe togi atu se mea iā te ia e aunoa ma le lamalama i ai,+
23 pe na te togi atu se maa ae e lē iloa o ia, lea e ono oti ai o ia, pe faapaʻū i ona luga se maa ma oti ai ae e lē ita iā te ia ma e lē fia faia foʻi se mea leaga iā te ia,
24 e ao i le faapotopotoga ona faamasino i lea tagata na faia le mea leaga ma lē na te tauimasui i le toto e tusa ma ia tulafono.+
25 E tatau i le faapotopotoga+ ona laveaʻi le fasioti tagata paʻivalea mai i lima o lē e tauimasui i le toto, ma e ao i le faapotopotoga ona toe faafoʻi o ia i lona aai o sulufaʻiga, lea ua sola i ai ma ia nofo ai i inā seʻia oti le ositaulaga sili, o lē na faauuina i le suāuu paia.+
26 “‘Ae afai e alu atu lava le fasioti tagata paʻivalea i fafo o le tuaoi o lona aai o sulufaʻiga lea ua ia sola atu i ai,
27 ma ua maua ai o ia e lē e tauimasui+ i le toto i fafo o le tuaoi o lona aai o sulufaʻiga, ma fasiotia le fasioti tagata paʻivalea e lē e tauimasui i le toto, e lē nofosala lē e tauimasui i le toto o lea tagata.
28 Auā e ao ona nofo o ia i lona aai o sulufaʻiga seʻia oti le ositaulaga sili,+ ma a mavae le oti o le ositaulaga sili e mafai ona toe foʻi le fasioti tagata paʻivalea i lona lava fanua.
29 E fai nei mea ma aiāiga mo faamasinoga mo outou ma o outou tupulaga uma i mea tou te nonofo ai.
30 “‘O se tasi e fasiotia se tagata+ e tatau ona fasiotia o ia ona o le faamatalaga a molimau,+ ma e lē lava le faamatalaga a le molimau e toʻatasi e oti ai o ia.
31 E lē tatau ona outou talia se togiola mo le ola o se fasioti tagata o lē ua tatau i ai le oti,+ e ao lava ona fasiotia lea tagata.+
32 E lē tatau foʻi ona outou talia se togiola mo se tasi ua sola i lona aai o sulufaʻiga, ina ia toe foʻi mai i lona fanua ae e leʻi oti le ositaulaga sili.
33 “‘Aua foʻi tou te faaleagaina le laueleele tou te nonofo ai; auā ua faaleagaina le laueleele i le toto,+ e lē mafai ona togiolaina le laueleele ona o le toto ua faamaligiina i ai seʻi vaganā ai le toto o lē ua faamaligiina le toto.+
34 Aua tou te faaleagaina le laueleele tou te nonofo ai, lea ou te iai; auā o aʻu o Ieova ou te nofo faatasi ma le fanauga a Isaraelu.’”+
Faamatalaga Pito i Lalo
^ Po o “le fasioti tagata e leʻi fuafuaina.”
^ O se tasi e aiga vavalalata i lē ua fasiotia.
