Numera 36:1-13
36 Ona faalatalata mai ai lea o ulu o aiga o atalii o Kiliata, o le atalii o Makiro,+ o le atalii o Manase, o aiga o atalii o Iosefa, ma fai mai i luma o Mose, ma taʻitaʻi, o ulu o aiga o le fanauga a Isaraelu,
2 ua faapea mai: “Ua poloaʻi mai Ieova iā te oe lo matou alii, ina ia tuu atu i le fanauga a Isaraelu e ala i le vili+ le laueleele e fai ma o latou tofi; ma ua poloaʻia foʻi lo matou alii e Ieova, ina ia tuu atu le tofi o Selofeata lo matou uso, i ona afafine.+
3 Afai e faaipoipo atu tagata mai i isi ituaiga o le fanauga a Isaraelu i nei tamaʻitaʻi, o le a aveesea le tofi o ia tamaʻitaʻi mai i le tofi o lo matou tamā, ae faaopoopo atu i le tofi o le ituaiga o tane ia ua latou faaipoipo atu i ai, ona aveese lea o ia fanua mai i lo matou tofi.+
4 A faapea e oo i le Iupelī+ a le fanauga a Isaraelu, ona faaopoopo atu lea o le tofi o ia tamaʻitaʻi i le tofi o le ituaiga o tane ia ua latou faaipoipo atu i ai; ona aveese lea o o latou tofi mai i le tofi o le ituaiga o o matou tamā.”
5 Ona fai atu lea o Mose i le fanauga a Isaraelu e tusa ma le faatonuga a Ieova e faapea: “E saʻo le mea o loo fai mai ai i latou mai i le ituaiga o atalii o Iosefa.
6 O le poloaʻiga lenei a Ieova ua ia fetalai mai ai e tusa ma afafine o Selofeata,+ e faapea, ‘Ia faaipoipo i latou i ē ua latou loto i ai. Ae e tau lava o le aiga o le ituaiga o lo latou tamā e ao ona latou faaipoipo i ai.+
7 E lē feaveaʻia le tofi o le fanauga a Isaraelu mai i le tasi ituaiga i le isi ituaiga, auā e ao i atalii o Isaraelu ona taʻitasi ma tausi i le tofi o le ituaiga o ona augātamā.
8 Ai se fafine foʻi ua maua se tofi mai i ituaiga o atalii o Isaraelu, e ao iā te ia ona faaipoipo atu i se tasi o le aiga o le ituaiga o lona tamā,+ ina ia maua ai e atalii taʻitasi o Isaraelu le tofi o le ituaiga o ona augātamā.
9 E lē feaveaʻia tofi mai i le tasi ituaiga i le isi ituaiga, auā e ao i ituaiga taʻitasi o atalii o Isaraelu ona tausia lona lava tofi.’”
10 E pei ona poloaʻi mai o Ieova iā Mose, e faapea foʻi ona faia e afafine o Selofeata.+
11 Ona faaipoipo lea o Maala, o Tiresa, o Hakelu, o Meleka, ma Noa, o afafine ia o Selofeata+ i atalii o uso o o latou tamā.
12 Ua latou faaipoipo atu i nisi o le aiga o atalii o Manase le atalii o Iosefa, ina ia tumau ai pea lo latou tofi i le ituaiga o le aiga o lo latou tamā.
13 O poloaʻiga+ lava ia ma iʻuga o faamasinoga na poloaʻi mai ai Ieova e ala iā Mose, i le fanauga a Isaraelu i le fanua laugatasi o le toafa o Moapi, i tala ane o Ioritana e faafesagaʻi ma Ieriko.+
