Numera 4:1-49
4 Ua fetalai mai Ieova iā Mose ma Arona e faapea:
2 “Ia faitau le aofaʻi o atalii o Koato+ mai i atalii o Levi, e tusa ma o latou aiga, o aiga ia o o latou tamā,
3 e amata mai i le tolu sefulu tausaga le matutua+ e oo atu i le lima sefulu tausaga,+ o ē uma ua ō atu e galulue i le vaega+ e faia galuega i le faleʻie o le feiloaʻiga.
4 “O le galuega lenei a atalii o Koato i le faleʻie o le feiloaʻiga.+ O se mea lea e sili ona paia:
5 Pe a latou sauni e ō, e ao iā Arona ma ona atalii ona ulufale i le faleʻie, ma e ao ona latou tatala i lalo le ʻie puipui+ ma ufiufi ai le atolaau+ o le feagaiga.*
6 E ao ona latou ufiufi i paʻu takesa+ ma fofola ai i luga se ʻie lanu moana ma sulu ai ona amo.+
7 “E latou te fofola le ʻie lanu moana i luga o le laulau+ lea e laulauina ai le falaoa, e ao foʻi ona tuu ai ipu mafolafola,+ o ipu, o ipu faaofuofu,+ o fagu e ave ai le taulaga i meainu; ma e ao ona faaauau ona iai falaoa+ e ofoina atu pea.
8 E ao ona latou fofola le ʻie ua vali mūmū sesega+ i luga o ia mea, e ao foʻi ona latou ufiufi i paʻu takesa+ ma sulu ai ona amo.+
9 E ao ona latou ave le ʻie lanu moana ma ufiufi ai le tuugāmolī+ e faamalamalama ai, o ona molī,+ o ona iofi,+ o ona salefu,+ ma ipu+ e tuu ai le suāuu ua latou faaaogā mo molī.
10 E latou te tuu ai foʻi ma isi ana mea uma i totonu o le ufiufi o le paʻu takesa,+ ma tuu i luga o se laau e ave ai.
11 E latou te fofola le ʻie lanu moana i luga o le fata faitaulaga+ auro, ona latou ufiufi lea i paʻu takesa+ ma sulu ai ona amo.+
12 E ao ona latou ave mea uma+ o le auaunaga, e masani ona faaaogā i le auaunaga i le mea paia, e latou te tuu ia mea i se ʻie lanu moana ma ufiufi ai i paʻu takesa,+ ma tuu i luga o se laau e ave ai.
13 “E latou te aveese lefulefu gaʻoa o le fata faitaulaga,+ ma fofola ai i luga se ʻie ua vali lanu violē.
14 E ao ona latou tuu ai i luga o mea uma e masani ona latou faaaogā i le auaunaga, o salefu, o tui, o suō, o ipu faaofuofu, ma mea uma o le fata faitaulaga;+ e latou te fofola ai foʻi i luga le ufiufi o le paʻu takesa ma sulu ai ona amo.+
15 “E ao iā Arona ma ona atalii ona faamāeʻa le ufiufiina o le mea paia,+ ma mea uma+ e faaaogā i le mea paia pe a latou sauni e ō, ona ō mai lea o atalii o Koato e latou te amoina ia mea,+ ae aua lava neʻi o latou papaʻi+ atu i le mea paia neʻi latou feoti. O avega nei a atalii o Koato i le faleʻie o le feiloaʻiga.+
16 “O Eleasaro le atalii o Arona le ositaulaga, e vaaia+ le suāuu+ mo molī, o le mea manogi lelei e faamū,+ o taulaga i meaʻai i aso fai soo,+ ma le suāuu e faauu ai,+ o lē foʻi e vaaia le faleʻie paia ma mea uma ua iai, o lona uiga o le mea paia ma mea uma ua iai.”
17 Ua fetalai atili mai Ieova iā Mose ma Arona e faapea:
18 “Aua neʻi tuua le ituaiga o aiga o Koato+ ia fasiotia mai i le ʻau sa Levī.
19 A ia faia lenei mea ina ia ola ai i latou ae lē feoti, ona o le faalatalata atu i mea e sili ona paia.+ O le a ulufale Arona ma ona atalii ma e latou te tofia atu i le tagata lana galuega ma lana avega.
20 Aua neʻi o latou ō mai i totonu e vaavaai i mea paia i sina sekone lava, ina neʻi feoti i latou.”+
21 Ona fetalai mai lea o Ieova iā Mose e faapea:
22 “Ia faitau le aofaʻi o atalii o Keresona,+ e tusa ma le aiga o o latou tamā ma e tusa foʻi ma o latou aiga.
23 E te lesitalaina i latou e amata mai i le tolu sefulu tausaga le matutua e oo atu i le lima sefulu tausaga,+ o i latou uma ua ō atu e galulue i le vaega e faia galuega i le faleʻie o le feiloaʻiga.
24 O le galuega lenei a aiga o Keresona e tusa ma le auaunaga ma avega latou te tauave.+
25 E tatau ona latou ave ʻie+ o le faleʻie paia ma le faleʻie o le feiloaʻiga,+ o lona ufiufi+ ma le ufiufi paʻu takesa+ lea e i le pito i luga, ma le ʻie pupuni+ o le faitotoʻa o le faleʻie o le feiloaʻiga,
26 atoa ma ʻie e tautau+ i le lotoā, ma le ʻie pupuni+ i le faitotoʻa o le lotoā, e faataamilo ai le faleʻie paia ma le fata faitaulaga, ma maea o le faleʻie ma mea uma e faaaogā ai, ma mea uma e manaʻomia mo le faia o galuega i aso uma. O la latou galuega lea.
27 O galuega uma a atalii o Keresona,+ o mea e latou te ave, o galuega uma latou te faia, e latou te faia ona o le faatonuga a Arona ma ona atalii,+ ma ia outou faatonu iā i latou o mea uma e ao ona latou tauaveina, auā o lo latou tiute tauave lea.
28 O le galuega lenei a aiga o atalii o Keresona+ i le faleʻie o le feiloaʻiga, ma a latou galuega e ao ona faia, e faia i le taʻitaʻiga a Itamaro,+ le atalii o Arona le ositaulaga.
29 “Ia e lesitalaina atalii o Merari+ e tusa ma o latou aiga, ma aiga o o latou tamā.
30 E te lesitalaina i latou e amata mai i le tolu sefulu tausaga le matutua e oo atu i le lima sefulu tausaga, o i latou uma ua ō atu e galulue i le vaega e faia galuega i le faleʻie o le feiloaʻiga.+
31 O la latou tiute tauave e ao ona fai, o a latou avega+ e tusa ma a latou galuega i le faleʻie o le feiloaʻiga: o auivi laupapa+ o le faleʻie paia ma pou faalava,+ o ona poutū+ ma ona lagolago,+
32 o poutū+ e soo ai le lotoā ma lagolago,+ o pine+ ma maea o le faleʻie, atoa foʻi ma mea uma e faaaogā ia e aofia ai i lenei auaunaga. E tusa ma o latou igoa e tou te tofia ai mea e ao ona latou aveina.+
33 O le galuega lenei a aiga o atalii o Merari,+ e tusa ai ma a latou galuega i le faleʻie o le feiloaʻiga, e faia i le taʻitaʻiga a Itamaro, le atalii o Arona le ositaulaga.”+
34 Ona lesitalaina lea e Mose ma Arona ma taʻitaʻi+ o le faapotopotoga, o atalii o Koato+ e tusa ma o latou aiga, e tusa foʻi ma aiga o o latou tamā,
35 e amata mai i le tolu sefulu+ tausaga le matutua e oo atu i le lima sefulu tausaga,+ o i latou uma ua ō atu e galulue i le vaega e faia galuega i le faleʻie o le feiloaʻiga.+
36 O i latou ua lesitalaina e tusa ma o latou aiga, e toʻalua afe fitu selau lima sefulu.+
37 O i latou ia mai i aiga o le fanauga a Koato ua lesitalaina,+ o ē ua auauna i le faleʻie o le feiloaʻiga, o ē ua lesitalaina e Mose ma Arona ona o le faatonuga a Ieova e ala atu iā Mose.
38 O i latou foʻi ua lesitalaina o atalii o Keresona+ e tusa ma o latou aiga, ma aiga o o latou tamā,
39 e amata mai i le tolu sefulu tausaga le matutua e oo atu i le lima sefulu tausaga, o i latou uma ua ō atu e galulue i le vaega e faia galuega i le faleʻie o le feiloaʻiga,+
40 o i latou ua lesitalaina e tusa ma o latou aiga ma le aiga o o latou tamā, e toʻalua afe ono selau tolu sefulu.+
41 O i latou nei mai i aiga o atalii o Keresona ua lesitalaina, o ē ua auauna i le faleʻie o le feiloaʻiga, o ē ua lesitalaina e Mose ma Arona ona o le faatonuga a Ieova.+
42 O i latou foʻi ua lesitalaina mai i aiga o atalii o Merari e tusa ma o latou aiga, ma le aiga o o latou tamā,
43 e amata mai i le tolu sefulu tausaga le matutua e oo atu i le lima sefulu tausaga, o i latou uma ua ō atu e galulue i le vaega e faia galuega i le faleʻie o le feiloaʻiga,+
44 o i latou ua lesitalaina e tusa ma o latou aiga, e toʻatolu afe lua selau.+
45 O i latou nei mai i aiga o atalii o Merari ua lesitalaina, o ē ua lesitalaina e Mose ma Arona ona o le faatonuga a Ieova e ala atu iā Mose.+
46 O i latou uma nei ua lesitalaina e Mose ma Arona ma taʻitaʻi o Isaraelu, ua lesitalaina o ni sa Levī, e tusa ma o latou aiga ma aiga o o latou tamā,
47 e amata mai i le tolu sefulu tausaga le matutua+ e oo atu i le lima sefulu tausaga, o i latou uma ua ō atu e faia galuega mamafa ma le galuega o le amoina o avega i le faleʻie o le feiloaʻiga,+
48 e toʻavalu afe, lima selau valu sefulu le aofaʻi o o latou tagata ua lesitalaina.+
49 O le faatonuga a Ieova na lesitalaina ai i latou e ala atu iā Mose, e taʻitasi e tusa ma lana galuega ma lana avega; na lesitalaina ai i latou e pei ona poloaʻi mai ai Ieova iā Mose.+
Faamatalaga Pito i Lalo
^ Po o le “Molimau.”
