Numera 8:1-26
8 Ona fetalai mai lea o Ieova iā Mose e faapea:
2 “Ia e fai atu iā Arona ma e faapea atu iā te ia, ‘Pe a e tutu le molī, e ao ona susulu atu le malamalama o molī e fitu i le pito i luma o le tuugāmolī.’”+
3 Ua faapena ona faia e Arona. Ua ia tutu molī ina ia malamalama ai le pito i luma o le tuugāmolī,+ e pei ona poloaʻi mai ai Ieova iā Mose.
4 Ua faapenei ona faia le tuugāmolī. Ua faia i le auro e ala i le faaaogāina o le samala. O lona ʻau ma ona fuga ua faia e ala i le faaaogāina o le samala.+ Ua faia e Mose le tuugāmolī e tusa ai ma mea na faaali+ mai e Ieova iā te ia.
5 Ua fetalai mai pea Ieova iā Mose e faapea:
6 “Ia e aumai le ʻau sa Levī mai i le fanauga a Isaraelu, ma e ao ona e faamamāina i latou.+
7 O mea nei e ao ona e faia ina ia faamamā ai i latou: Ia sausau le vai e faamamā ai mai i agasala i o latou luga,+ e ao ona latou tafi o latou tino uma,+ ma ia tatā o latou ofu+ ma faamamā iā te i latou lava.+
8 Ona latou aumaia lea o se tamaʻi povi poʻa+ ma le taulaga i meaʻai+ o falaoamata lelei ua iai sina suāuu, ma e te aumaia foʻi se tamaʻi povi poʻa e fai ai le taulaga o agasala.+
9 E ao ona e aumaia le ʻau sa Levī i luma o le faleʻie o le feiloaʻiga, ma faapotopoto mai le faapotopotoga atoa o atalii o Isaraelu.+
10 E te aumaia le ʻau sa Levī i luma o Ieova, ma e ao i atalii o Isaraelu ona faaee+ o latou lima i luga o le ʻau sa Levi.+
11 E ao iā Arona ona faapogaia le minoi o le ʻau sa Levī i le tasi itu ma le isi itu i luma o Ieova, e fai ma taulaga lūlū+ mai i le fanauga a Isaraelu, ma e ao ona latou auauna i le galuega a Ieova.+
12 “Ona faaee lea o lima o le ʻau sa Levī i luga o ulu o povi poʻa.+ Mulimuli ane, ona avatu lea o le tasi e fai ai le taulaga o agasala, ma le isi e fai ai le taulaga mū iā Ieova, e faia ai le togisala+ mo le ʻau sa Levī.
13 E ao ona e faatutū le ʻau sa Levī i luma o Arona ma ona atalii, e faapogaia ai lo latou minoi i le tasi itu i le isi itu o se taulaga lūlū iā Ieova.
14 E ao ona e vavaeese le ʻau sa Levī mai i le fanauga a Isaraelu, ma e fai le ʻau sa Levī ma oʻu tagata.+
15 A mavae lea, o le a ō mai le ʻau sa Levī e auauna i le faleʻie o le feiloaʻiga.+ Ia e faamamāina i latou ma faapogaia i latou e minoi mai i le tasi itu i le isi itu o se taulaga lūlū.+
16 Auā o i latou ua tofia mo aʻu mai i le fanauga a Isaraelu.+ E fai i latou mo aʻu ina ia sui ai ulumatua* uma lava, o ulumatua uma o le fanauga a Isaraelu.+
17 Auā o aʻu e ana ulumatua uma o le fanauga a Isaraelu, o tagata atoa ma manu.+ I le aso na ou fasiotia ai ulumatua uma i le atunuu o Aikupito,+ na ou faapaiaina ai i latou mo aʻu.+
18 Ou te aumaia le ʻau sa Levī e sui i ulumatua uma o le fanauga a Isaraelu.+
19 Ou te avatu le ʻau sa Levī o ē ua tofia iā Arona ma ona atalii mai i le fanauga a Isaraelu,+ ina ia auauna i le galuega mo atalii o Isaraelu i le faleʻie o le feiloaʻiga,+ ma fesoasoani i le faia o le togisala mo atalii o Isaraelu, ina neʻi oo se mala i atalii o Isaraelu,+ auā e faalatalata atu atalii o Isaraelu i le mea paia.”
20 Ona faia lea faapea e Mose ma Arona ma le faapotopotoga o atalii o Isaraelu i le ʻau sa Levī. Ua faapena lava ona faia e atalii o Isaraelu iā i latou, e tusa ma poloaʻiga uma a Ieova iā Mose e faatatau i le ʻau sa Levī.
21 Ua faamamā e le ʻau sa Levī i latou lava,+ ma tatā o latou ofu, mulimuli ane ua faapogaia e Arona lo latou minoi mai i le tasi itu i le isi itu o se taulaga lūlū i luma o Ieova.+ Ona faia lea e Arona o le togisala mo i latou e faamamā ai i latou.+
22 Ua mavae lea ona ō mai ai lea o le ʻau sa Levī ina ia faia la latou galuega i le faleʻie o le feiloaʻiga i luma o Arona ma ona atalii.+ Ua faapea lava ona latou faia e pei ona poloaʻi mai ai Ieova iā Mose e faatatau i le ʻau sa Levī.
23 Ua fetalai mai foʻi Ieova iā Mose e faapea:
24 “O le mea lenei e faatatau i le ʻau sa Levī: O se tane e alu atu e galue i le vaega e faia galuega i le faleʻie o le feiloaʻiga, e amata mai i le lua sefulu lima tausaga agaʻi i luga le matua.
25 Ae a atoa le lima sefulu tausaga ona mālōlō ai lea o ia mai i lea vaega e faia le galuega ma lē toe galue ai.
26 E ao ona ia auauna i ona uso o ē e tausia le faleʻie o le feiloaʻiga e tusa ma o latou tiute tauave, ae e lē faigaluega ai o ia. Ia outou faia faapea i le ʻau sa Levī e tusa ma o latou tiute tauave.”+
Faamatalaga Pito i Lalo
^ I le gagana Eperu, “o ulumatua uma ua tatala ai le faaʻautagata.”
