Roma 10:1-21
10 Le ʻauuso e, o le manaʻo lenei o loʻu loto ma laʻu talosaga i le Atua mo Isaraelu, ina ia faaolaina i latou.+
2 Ua ou molimau iā i latou, ua latou maelega+ i le Atua; ae e lē tusa ai ma le poto saʻo;+
3 ona o lo latou lē iloaina o le amiotonu a le Atua+ a ua latou saʻili e faatū la latou lava amiotonu,+ ua latou lē gauaʻi ai i le amiotonu a le Atua.+
4 Auā o le iʻuga o le Tulafono o Keriso lea,+ ina ia maua e i latou uma e faatuatua le amiotonu.+
5 Auā ua tusia e Mose e faapea, o le tagata na te faia le amiotonu a le Tulafono, e ola o ia i le amiotonu.+
6 E tusa ai ma le amiotonu lea e maua mai i le faatuatua, ua faapea mai le afioga a le Atua: “Aua e te faapea ifo i lou loto,+ ‘O ai e alu aʻe i le lagi?’+ o lona uiga, ina ia ave ifo i lalo Keriso;+
7 po o ‘O ai e alu ifo i le tō?’+ o lona uiga, ina ia ave aʻe Keriso mai i le oti.”+
8 O le ā ua fai mai ai? “Ua latalata mai iā te oe le upu, i lou lava gutu ma lou lava loto”;+ o le “upu”+ lea o le faatuatua, o loo tatou talaʻia.+
9 Afai e te faalauiloa atu i luma o tagata ‘lenā upu i lou lava gutu’+ o Iesu o le Alii,+ ma faatuatua i lou lava loto ua faatūina o ia e le Atua mai i le oti,+ e faaolaina ai oe.+
10 Auā o le loto+ e faatuatua ai e maua ai le amiotonu, a o le gutu e taʻutino atu ai i luma o tagata,+ e maua ai le faaolataga.
11 Ua tusia i Tusitusiga Paia: “E leai se tasi e faatuatua+ iā te ia e faanoanoa.”*+
12 E leai se eseesega o le Iutaia ma le Eleni,+ auā e toʻatasi lava le Alii o tagata uma, e tele mea+ ua ia foaʻi mai i ē uma e valaau atu iā te ia.
13 Auā “e faaolaina i latou uma o ē e valaau i le suafa o Ieova.”+
14 Ae e faapefea ona latou valaau atu iā te ia o lē latou te lē o faatuatua i ai?+ E faapefea ona latou faatuatua iā te ia o lē latou te lē o faalogo i ai? E faapefea foʻi ona latou faalogo pe a leai se tasi e talaʻi atu?+
15 E faapefea ona latou talaʻi atu pe afai e leʻi aauina atu i latou?+ E pei ona tusia: “Maʻeu le matagofie o vae o ē e folafola atu le tala lelei o mea lelei!”+
16 Ae peitaʻi, e leʻi usiusitaʻi i latou uma i le tala lelei.+ Auā ua faapea mai Isaia: “Ieova e, o ai ua faatuatua i le mea ua matou faalogo i ai?”+
17 E tupu le faatuatua i mea ua faalogo i ai.+ O mea foʻi e faalogo i ai, o le upu lea e uiga iā Keriso.+
18 A ou te fesili atu, Pe na faalogo ea i latou? Auā o le mea moni, “ua oo atu lo latou leo i le lalolagi atoa,+ ma ua lagonaina a latou upu i tuluʻiga o le lalolagi.”+
19 Ae ou te fesili atu foʻi, pe e leʻi iloa ea e Isaraelu?+ Na muamua ona faapea mai o Mose: “Ou te faatupu iā te outou le fuā e ala i le nuu e lē o se nuu; ou te faatupu foʻi iā te outou le ita tele e ala i se nuu vālea.”+
20 A ua lototele Isaia ma faapea mai: “Ua maua aʻu e i latou e leʻi saʻili iā te aʻu;+ ua faailoa atu aʻu i ē e leʻi fesili mai mo aʻu.”+
21 A ua fetalai o ia e faatatau iā Isaraelu: “O le aso atoa na faaloaloa atu ai oʻu lima i tagata faalogogatā+ ma le finauvale.”+
Faamatalaga Pito i Lalo
^ Pe e “mā.”
