Roma 14:1-23
14 Ia talia lē ua vaivai+ i le faatuatua, ae aua le faamasinosino i manatunatuga o lona loto.+
2 Ua talitonu le tasi tagata e lelei ona ʻai i mea uma,+ a o le tagata e vaivai, e na te ʻaina fualaau faisua.
3 O lē e ʻai, ia aua neʻi manatu faatauvaa i lē e lē o ʻai,+ ma o lē e lē o ʻai, aua neʻi faamasino atu i lē o ʻai, auā ua talia e le Atua o lea tagata.
4 O ai ea oe e te faamasinosino ai i le auauna a le tasi tagata?+ Auā e pule lona lava matai pe tū pe paʻū o ia.+ E moni, e tū o ia auā e mafai e Ieova ona faatūina o ia.+
5 E manatu le tasi tagata e tāua le isi aso i lo o isi aso;+ ae e manatu le isi tagata e tutusa aso uma;+ ia taʻitasi le tagata ma matuā mautinoa i lona lava mafaufau.
6 O lē na te tausia le aso, e tausia e ia ina ia faamamaluina ai Ieova. O lē foʻi e ʻai, e ʻai ina ia faamamaluina ai Ieova,+ auā ua faafetai atu o ia i le Atua;+ ma o lē e lē o ʻai, ua lē ʻai o ia ina ia faamamaluina ai Ieova,+ a ua faafetai atu o ia i le Atua.+
7 O le mea moni, e leai se tasi o i tatou e ola mo ia lava,+ ma e leai foʻi se tasi e oti mo ia lava;
8 auā afai tatou te ola, e tatou te ola mo Ieova,+ ma afai tatou te oti, e tatou te oti mo Ieova.+ O lea la, pe tatou te ola pe e tatou te oti, o i tatou lava o auauna a Ieova.+
9 O le mea lea ua maliu ai Keriso ma toe soifua mai,+ ina ia avea o ia ma Alii o ē ua oti+ ma ē ua ola.+
10 Ae aiseā e te faamasinosino ai fua i lou uso?+ Pe aiseā foʻi e te manatu faatauvaa ai i lou uso? Auā tatou te tutū uma lava i luma o le nofoa faamasino+ o le Atua;
11 e pei ona tusia: “Ua fetalai mai Ieova,+ ‘Ou te ola aʻu, e tootuli foʻi tulivae uma i oʻu luma, ma e taʻutaʻu atu e laulaufaiva uma o aʻu o le Atua.’”+
12 O le mea lea, e taʻitasi ai i tatou uma ma tala atu lana amio i le Atua.+
13 O lea la, aua tatou te toe faamasinosino+ le tasi i le isi, ae ia faapenei ona faia la outou faaiʻuga,+ aua le faia se mea e tausuai ai+ pe tautevateva ai se uso.+
14 Ua ou iloa ma talitonu i le Alii o Iesu, e leai lava se mea e leaga;+ seʻi vaganā ua manatu se tagata e leaga, ona leaga lea iā te ia.+
15 Auā afai o meaʻai ua tigā ai lou uso, ua e lē toe savali la e tusa ma le alofa.+ Aua neʻi afāina* lou uso o lē na maliu ai Keriso ona o au meaʻai.+
16 O lea la, aua neʻi faia se mea e taʻuleagaina ai e se tasi mea lelei ua outou faia.
17 Auā e lē faasino atu le malo o le Atua+ i le ʻai ma le inu,+ ae e faasino atu i le amiotonu,+ ma le filemu,+ ma le olioli,+ atoa foʻi ma le agaga paia.
18 E tusa ai ma lenei mea, o lē e pologa mo Keriso, e taliaina o ia e le Atua, ma e fiafia foʻi i ai tagata.+
19 O lea, seʻi tatou tausisi i mea e faatupu ai le filemu,+ ma mea e atiaʻe ai e le tasi le isi.+
20 Aua le lepetia galuega a le Atua ona o meaʻai.+ E moni e mamā mea uma, ae e leaga pe a ʻai le tagata ma tausuai ai.+
21 E sili ona lelei pe a lē ʻai i aano o manu pe inu i le uaina, po o le faia o so o se mea e tausuai ai lou uso.+
22 Ia e tausisi pea i lou faatuatua e tusa ai ma le silafaga a le Atua.+ E fiafia le tagata e lē faamasinosino e ia o ia lava e tusa ma mea ua tonu i lona manatu.
23 Ae afai e masalosalo o ia, e taʻusalaina o ia pe a ʻai,+ auā e lē o ʻai o ia ona o lona faatuatua. O le mea moni, o mea uma e lē tusa ma le faatuatua, o le agasala lea.+
Faamatalaga Pito i Lalo
^ O lona uiga ua “afāina pe faaumatia lona faatuatua, po o lona faamoemoe mo le lumanaʻi e faavavau.”
