Roma 5:1-21
5 O lenei, talu ai ua taʻuamiotonuina i tatou ona o le faatuatua,+ inā tatou olioli ia i le filemu+ ma le Atua e ala i lo tatou Alii o Iesu Keriso,
2 o ia foʻi ua tatou maua+ ai le faatuatua e ala i le agalelei faifua lea ua tatou iai, ma ia tatou olioli ona o le faamoemoe+ i le mamalu o le Atua.
3 Ia tatou olioli foʻi i puapuaga,+ auā ua tatou iloa o puapuaga e iʻu ai ina tatou tumau;+
4 o le tumau e maua ai le finagalo malie o le Atua;+ o le finagalo malie o le Atua e tupu ai le faamoemoe,+
5 ma o le faamoemoe e lē iʻu ai i le faanoanoa*+; auā ua liligi mai i o tatou loto+ le alofa o le Atua+ e ala i le agaga paia,+ lea na tuuina mai iā i tatou.
6 Auā na maliu Keriso i le taimi atofaina+ mo tagata lē amioatua, a o tatou vaivai pea.+
7 E toetoe ina a lē mafai ona oti o se tagata e sui aʻi se tasi e amiotonu;+ ae atonu e lototele se tasi e oti+ mo se tagata lelei.+
8 A ua faaali mai e le Atua lona lava alofa+ iā i tatou, auā na maliu Keriso mo i tatou+ a o tatou agasala pea.
9 O le mea lea, ona ua taʻuamiotonuina nei i tatou i lona toto,+ ua atili ai ona faaolaina i tatou mai le toʻasā+ o le Atua e ala iā te ia.
10 Auā a o fai i tatou ma ona fili,+ na tatou toe lelei ai ma le Atua e ala i le maliu o lona Alo,+ ua toe lelei ai i tatou ma ia, ma o le a matuā faaolaina i tatou i lona ola.+
11 E lē gata i lea, ua tatou olioli foʻi i le Atua ona o lo tatou Alii o Iesu Keriso, o lē ua tatou maua ai nei le leleiga.+
12 E pei ona oo mai o le agasala i le lalolagi ona o le tagata e toʻatasi,+ o le oti+ foʻi ona o le agasala, ona oo mai ai lea o le oti i tagata uma auā ua agasala uma lava.+
13 Auā na iai le agasala i le lalolagi a o leʻi iai le Tulafono, ae e lē taʻusalaina se tasi pe a leai se tulafono.+
14 Ae peitaʻi, na pule le oti e pei o se tupu mai iā Atamu e oo iā Mose,+ e oo lava iā i latou e leʻi agasala e pei o le agasala a Atamu,+ o ia ua fai ma faatusa o lē e maliu mai.+
15 Peitaʻi, o le iʻuga o le meaalofa e lē pei o le iʻuga o le agasala. Pe afai ua oti le toʻatele i le agasala a le tagata e toʻatasi, e faasilisili lava i le toʻatele le agalelei faifua o le Atua ma lana meaalofa foaʻifua,+ ma le agalelei faifua lea ua ala mai i le tagata e toʻatasi+ o Iesu Keriso.
16 E lē pei foʻi le meaalofa foaʻifua,+ o le mea na oo mai ina ua agasala+ le tagata e toʻatasi. Auā ua oo mai le faasalaga+ ona o le agasala e tasi,+ a o le meaalofa foaʻifua, ua oo mai ona o le tele o solitulafono, ma ua taʻuamiotonuina ai.+
17 Afai ua pule le oti e pei o se tupu+ ona o le agasala a le tagata e toʻatasi,+ e sili atu la i latou ua maua le tele o le agalelei faifua+ ma le meaalofa foaʻifua+ o le amiotonu, ona pule o ni tupu+ i le ola, e ala i le tagata e toʻatasi o Iesu Keriso.+
18 O lea la, na faasalaina+ ituaiga uma o tagata ona o le mea sesē e tasi, e faapena foʻi ona taʻuamiotonuina+ mo le ola+ o ituaiga uma o tagata,+ ona o le amiotonu a le tagata e toʻatasi.
19 E pei ona agasala le toʻatele+ ona o le lē usiusitaʻi o le tagata e toʻatasi, e faapea foʻi ona taʻuamiotonuina+ le toʻatele+ ona o le usiusitaʻi+ o le tagata e toʻatasi.
20 O lenei, na faaopoopoina foʻi le Tulafono+ ina ia faateleina ai le agasala.+ Peitaʻi, ua silisili lava le agalelei faifua,+ ina ua faateleina le agasala.+
21 O le ā e iʻu i ai? E pei ona pule le agasala ma le oti+ o ni tupu, e faapea foʻi ona pule le agalelei faifua+ o se tupu, ona o le amiotonu e oo ai i le ola e faavavau,+ e ala iā Iesu Keriso lo tatou Alii.
Faamatalaga Pito i Lalo
^ Pe e “lē mā ai.”
