Roma 8:1-39
8 O le mea lea, o i latou o ē o autasi ma Keriso Iesu, e lē faasalaina.+
2 Auā ua aumaia e le tulafono+ a lenā agaga+ le ola+ i le autasi ma Keriso Iesu, lea ua faasaʻolotoina+ ai oe mai i le tulafono a le agasala ma le oti.+
3 Auā o le mea na lē mafaia e le Tulafono+ ina ua vaivai+ ona o le tino, ua faia lea e le Atua i lona auina mai o lona lava Alo+ e pei o se tagata agasala,+ ina ia aveesea ai le agasala,+ na ia taʻusalaina ai agasala i le tino,
4 ina ia faataunuuina+ mea tonu e manaʻomia e le Tulafono iā i tatou, o ē e savavali e tusa ma le agaga,+ ae e lē tusa ma le tino.
5 Auā o i latou e naunau i le tino, e taulaʻi atu o latou manatu i mea a le tino,+ a o ē e naunau i le agaga, e taulaʻi atu i mea a le agaga.+
6 O le uaʻi atu i le tino, e iʻu ai i le oti,+ a o le uaʻi atu i le agaga,+ e iʻu ai i le ola ma le filemu;
7 auā o le uaʻi atu i le tino ua avea ai se tasi ma fili+ o le Atua, auā ua lē usiusitaʻi+ atu i le tulafono a le Atua, ma e lē mafai lava.
8 O i latou la e ola e tusa ma galuega a le tino,+ e lē mafai ona latou faafiafiaina le Atua.
9 A o outou, tou te ola e tusa ma le agaga,+ ae e lē tusa ma le tino, pe afai e iā te outou moni le agaga o le Atua.+ Ae afai e lē i se tasi le agaga+ o Keriso, e lē fai o ia mo Keriso.
10 Ae afai e autasi le Keriso ma outou,+ ua oti le tino ona o le agasala, a ua maua le ola+ e ala i le agaga ona o le amiotonu.
11 Afai la ua nofo iā te outou le agaga o lē na toe faatūina mai Iesu mai i le oti,+ e faaola foʻi e lē na faatūina mai Keriso Iesu mai i le oti o o outou tino augavale,+ e ala i lona agaga o loo nofo iā te outou.
12 Uso e, e lē faamalosia i tatou e ola i le tino, ma faia galuega a le tino+
13 auā afai tou te ola e tusa ma le tino, e oti lava outou;+ ae afai tou te faaumatia+ galuega a le tino e ala i le agaga, e ola ai outou.
14 O i latou uma e taʻitaʻiina e le agaga o le Atua, o atalii ia o le Atua.+
15 Tou te leʻi maua le agaga o pologa e toe fefefe ai,+ ae ua outou maua le agaga+ o ataliifai,+ o le agaga foʻi lea ua tatou alalaga atu ai: “Ava,*+ le Tamā e!”
16 Ua molimau+ le agaga+ lava lea faatasi ma o tatou agaga,+ o i tatou o fanau a le Atua.+
17 Afai o fanau i tatou, o i tatou foʻi o suli: o suli o le Atua, o suli+ faatasi ma Keriso, pe afai tatou te tigāina+ faatasi, ina ia faamamaluina faatasi foʻi i tatou.+
18 O le mea lea, ua ou manatu ai o puapuaga+ e oo mai i le taimi nei, e lē mafai ona faatusaina i le mamalu+ e faaalia mai e ala iā i tatou.
19 Auā o loo faatalitali+ ma le matuā naunau atu le foafoaga+ i le faaalia mai o atalii o le Atua.+
20 Ua faatoʻilaloina le foafoaga i le iʻuvale,+ e lē ona o lona lava loto, ae e ala iā te ia na faatoʻilaloina ai, ma saunia foʻi le faamoemoe+
21 ina ia saʻoloto+ ai le foafoaga+ mai i le faapologaina i mea leaga, ma maua ai le saʻolotoga mamalu o le fanau a le Atua.
22 Auā ua tatou iloa o loo ōi faatasi pea ma tigā faatasi foafoaga uma e oo mai i aso nei.
23 O i tatou foʻi o loo iai uluaʻi fua,+ o le agaga lea, ua tatou feoi+ foʻi i totonu iā i tatou lava, a o tatou matuā faatalitali atu e avea ma ataliifai,+ ma le faasaʻolotoina mai i o tatou tino e ala i le togiola.
24 Ua faaolaina i tatou i lenei faamoemoe;+ a o le faamoemoe ua vaaia, e lē o le faamoemoe lea, auā pe e faapefea ona toe faamoemoe se tasi i le mea ua ia vaaia?
25 Ae afai tatou te faamoemoe+ i mea tatou te lē o vaaia,+ e tumau+ pea ona tatou faatalitali i ai.
26 E faapena foʻi ona fesoasoani le agaga+ i o tatou vaivaiga;+ auā o le faafitauli, e tatou te lē iloa po o ā mea e ao ona tatou tatalo atu ai,+ a ua ʻaiʻoi atu le agaga+ mo i tatou ma le ōi e lē mafai ona faamatalaina.
27 O lē e suʻesuʻe i loto,+ ua ia silafia gaoioiga a le agaga,+ auā o le agaga lea o loo ʻaiʻoi atu i le Atua mo le ʻaupaia.+
28 O lenei, ua tatou iloa ua faia e le Atua ana galuega uma,+ ina ia felagolagomaʻi mo le lelei o i latou o ē alolofa i le Atua, o i latou ia ua valaauina e tusa ma lona finagalo;+
29 auā o i latou na ia silafia muamua,+ ua ia muaʻi tofia+ foʻi i latou ina ia atagia+ atu ai lona Alo, ina ia avea o ia ma ulumatua+ i le toʻatele o uso.+
30 O ē foʻi ua ia muaʻi tofia,+ o i latou na ua ia valaauina;+ ma o ē ua ia valaauina, o i latou na ua ia taʻuamiotonuina.+ O ē ua ia taʻuamiotonuina, o i latou na ua ia faamamaluina.+
31 O le ā sa tatou upu i nei mea? Afai e ʻau le Atua ma i tatou, o ai la e faasagatau mai?+
32 O lē na te leʻi faasaoina lona lava Alo,+ a ua foaʻiina mai o ia mo i tatou uma,+ pe na te lē o agalelei mai ea faatasi ma ia, ma foaʻi mai iā i tatou isi mea uma?+
33 O ai na te faia ni moliaga e tetee ai i tagata ua filifilia e le Atua?+ O le Atua na te taʻuamiotonuina i latou.+
34 O ai e na te faasalaina i latou? O Keriso Iesu o lē na maliu, ma o lē ua toe faatūina mai i le oti, o loo iai o ia i le itu taumatau+ o le Atua, o loo ʻaiʻoi atu foʻi o ia mo i tatou.+
35 O ai e na te faateʻaeseina i tatou mai i le alofa o Keriso?+ Po o puapuaga ea, po o mafatiaga, po o sauāga, po o le fia ʻai, po o le lē lavalavā, lamatiaga, po o le pelu?+
36 E pei ona tusia: “Ua fasiotia i matou i le aso atoa ona o oe, ua faitaulia foʻi i matou e pei o mamoe o le a fasia.”+
37 Peitaʻi, ua tatou manumalo atoatoa i nei mea uma,+ ona o ia na alofa mai iā i tatou.
38 Ua ou mautinoa, e lē mafai e le oti, po o le ola,+ po o agelu,+ po o malo,+ po o mea ua iai nei, po o mea e oo mai, po o ē e malolosi,+
39 po o le maualuga, po o le loloto, po o se isi lava foafoaga, ona faateʻaeseina i tatou mai i le alofa o le Atua ua iā Keriso Iesu, lo tatou Alii.+
Faamatalaga Pito i Lalo
^ O le upu Arama, o lona uiga “o le tamā,” po o le “Tamā e!” O le upu Eleni, Ab·baʹ.
