Sakaria 2:1-13
2 Ua tepa aʻe oʻu mata ma ou iloa ai; faauta! o se tamāloa ua i lona lima se manoa e fua ai mea.+
2 Ona ou fai atu lea: “O fea e te alu i ai?”
Ua ia faapea mai iā te aʻu: “E fua Ierusalema ina ia iloa ai pe e fia lona lautele ma lona umi.”+
3 Faauta! ua agaʻi atu le agelu o loo ma talanoa ma ua alu ane foʻi se isi agelu e faafetaui iā te ia.
4 Ona ia fai atu lea iā te ia: “Inā tamoʻe ia ma fai atu i le tauleʻaleʻa lale e faapea, ʻ“E ʻainā Ierusalema e pei o ni aai e leai ni pā puipui,+ ona o le toʻatele o tagata ma le tele o manu lalata o loo iai.+
5 A o aʻu,” ua fetalai mai ai Ieova, “o le a avea aʻu ma pā afi e siʻo ai o ia,+ o le a fai foʻi aʻu ma mamalu i totonu iā te ia.”’”+
6 “Faavave! Ia faavave! Ia outou sosola ese mai i le laueleele i le itu i mātū,”+ ua fetalai mai ai Ieova.
“Auā na ou faataapeape solo outou i itulagi o matagi e fā o le lagi,”+ ua fetalai mai ai Ieova.
7 “Siona e,+ faavave ia! Ia e sola ese, o oe o lē o loo nofo faatasi ma le tama fafine a Papelonia.+
8 Auā o le fetalaiga lenei a Ieova o ʻau,‘E mulimuli ane i le taimi o lona mamalu,+ e na te auina mai aʻu i atunuu na vetea a outou mea.+ O lē e paʻi atu iā te outou,+ ua paʻi o ia i le ʻiʻoimata o loʻu lava mata.+
9 O lea, ou te sii aʻe loʻu lima faasaga iā i latou,+ e fai foʻi i latou ma mea na vetea a o latou pologa.’+ Ona outou iloa ai lea ua auina mai aʻu e Ieova o ʻau.+
10 “Le tama fafine a Siona e,+ inā alaga leotele ia ma olioli; auā ou te sau+ ma ou nofo iā te oe,”+ ua fetalai mai ai Ieova.
11 “E aufaatasi mai foʻi atunuu e tele iā Ieova i lea aso,+ ona fai ai lea o i latou ma oʻu nuu;+ ma ou te nofo foʻi iā te oe.” Ona e iloa ai lea ua auina mai aʻu iā te oe e Ieova o ʻau.+
12 E maua lava e Ieova o Iuta e fai ma ona tofi i le laueleele paia,+ ma e toe filifilia foʻi e ia o Ierusalema.+
13 Ia fifilemu tagata uma i luma o Ieova,+ auā ua tulaʻi mai o ia+ mai i lona afioaga paia.+
