Sakaria 5:1-11
5 Ona toe tepa aʻe lea o oʻu mata ma iloa ai; tagaʻi foʻi! o le tusi tāʻai ua lele.+
2 Ua ia faapea mai iā te aʻu: “O le ā se mea ua e vaai atu i ai?”+
Ona ou fai atu lea: “O loo oʻu vaai atu i le tusi tāʻai ua lele, o le umī e lua sefulu kupita, ma le lautele e sefulu kupita.”
3 Ona ia faapea mai lea iā te aʻu: “O le fetuu lenei o loo alu atu i le fogāeleele uma lava,+ auā o i latou uma o loo gāoi+ e pei ona fetuu i le pito mai o le tusi tāʻai, ua sao mai i le faasalaga; a o i latou uma ua faia le tautoga+ e pei ona fetuu ai i le isi itu o le tusi tāʻai,+ ua sao mai i le faasalaga.
4 O le fetalaiga lenei a Ieova o ʻau: ‘Ua ou auina atu le fetuu ma e ao ona ulu atu i le fale o le tagata gaoi, i le fale foʻi o le tagata na tautō pepelo i loʻu igoa;+ ma e ao ona tumau i totonu o lona fale ma faatamaʻia ai le fale, o ona laupapa ma ona maa.’”+
5 Ua toe faalatalata mai iā te aʻu le agelu o loo ma talanoa ma faapea mai iā te aʻu: “Ia tepa aʻe ou mata faamolemole, ma vaai i le mea o loo alu atu.”
6 Ona ou fai atu lea: “O le ā lea mea?”
Ua ia faapea mai: “O le fua lenei o le efa* o loo alu atu.” Ona ia toe faapea mai lea: “O o latou foliga na i le lalolagi atoa.”
7 Faauta! ua siitia i luga le ufi lapotopoto ua faia i le pulu;* ma o loo nofo ai se fafine i totonu o le efa.
8 Ua ia faapea mai foʻi: “O le Amioleaga lenei.” Ona ia toe lafo lea o ia i totonu o le efa,+ ma lafo le ufi pulu i le gutu o le efa.
9 Ua tepa aʻe oʻu mata ma ou iloa ai, o fafine e toʻalua o loo ō mai, ma ua iai le matagi i o la apaʻau. Ua iai o la apaʻau e pei o apaʻau o le manulele o le kasita. Ua auaumālie ona la sii aʻe le efa i le va o le lalolagi ma le lagi.
10 Ona ou fai atu lea i le agelu o loo ma talanoa: “O fea o le a la ave i ai le efa?”
11 Ua faapea mai o ia iā te aʻu: “I le laufanua o Senara+ ina ia fausia+ ai se fale mo le fafine; e ao ona faatumauina lea fale, ma tuu ai o ia i inā i le mea e tatau ona iai o ia.”
Faamatalaga Pito i Lalo
^ O le fua o le “efa” pe tusa ma le 22 lita. Tagaʻi i le Faaopoopoga e 14.
^ O le metala (uʻamea) e vaivai toe faaʻefuʻefu lanu moana, e liusuavaigofie.
