Salamo 146:1-10
146 O outou le nuu e, inā vivii atu ia iā Ioa!+Loʻu loto e, inā vivii atu ia iā Ieova.+
2 Ou te vivii atu iā Ieova i loʻu olaga atoa.+Ou te fai pesega i loʻu Atua po o le ā lava le umi ou te ola ai.+
3 Aua tou te faatuatua atu i tamālii,+Po o le fanau a tagata e lē o iai se faaolataga.+
4 E alu ese lana mānava,+ e toe foʻi atu o ia i le eleele;+E faaumatia i lea lava aso ona manatunatuga.+
5 E fiafia le tagata e fai le Atua o Iakopo ma ona fesoasoani,+E iai lona faamoemoe iā Ieova lona Atua,+
6 O Lē na faia le lagi ma le lalolagi,+O le sami ma mea uma o loo iai,+O Lē na te tausia le faamaoni e faavavau,+
7 O Lē na te faamasinoina tagata ua ave faagaoi a latou mea,+O Lē foʻi na te avatu meaʻai i ē ua matelāina.+Ua tatalaina e Ieova i latou ua noanoatia.+
8 Ua faapupula e Ieova mata o ē e tauaso;+Ua faatulaʻi foʻi e Ieova i latou ua faanoʻunoʻu.+E alofa Ieova i ē e amiotonu.+
9 E leoleo e Ieova tagata ese;+E avatu foʻi e ia le mapusaga i le tama ua leai se tamā ma le fafine ua oti lana tane,+Ae e faapiʻoina e ia le ala+ o ē e amioleaga.+
10 E fai Ieova ma tupu e faavavau,+Siona e, e fai lou Atua ma tupu i lea tupulaga ma lea tupulaga.+O outou le nuu e, inā vivii atu ia iā Ioa!+
