Salamo 33:1-22
33 Ia alalaga fiafia outou o ē e amiotonu ona o Ieova.+E ono ma tatau foʻi i ē e amio saʻo ona avatu le viiga.+
2 Ia avatu le faafetai iā Ieova i le kitara;*+Ia fai foʻi pesega iā te ia i le meafaifaaili e sefulu uaua.+
3 Ia usu atu iā te ia se pese fou;+Ia outou faia le mea e sili ona lelei i le tāina o uaua faatasi ma le alaga fiafia.+
4 Auā e saʻo le afioga a Ieova,+Ma ua faia foʻi ana galuega uma i le faamaoni.+
5 E fiafia o ia i le amiotonu ma le faamasinogatonu.+Ua tumu foʻi le lalolagi i le alofa faamaoni o Ieova.+
6 Na faia le lagi i le afioga a Ieova,+Na faia foʻi a latou ʻau uma i le mānava a lona fofoga.+
7 Ua ia faapotopotoina suāsami e pei o se mea maupuʻepuʻe,+Ua tuu foʻi i fale teuoloa o galu maualuluga.
8 Ia matataʻu iā Ieova i latou uma o loo i le lalolagi.+Ia fefefe foʻi i latou uma o loo nonofo i le laueleele.+
9 Auā ua fetalai o ia, ma ua faapea ona taunuu;+Ua poloaʻi mai foʻi o ia, ona faapea lea ona iai.+
10 Ua faalēaogāina e Ieova o taupulepulega a nuu;+Ua faafenumiaʻi foʻi e ia o manatu o tagata.+
11 E tumau le pule a Ieova e oo i le faavavau;+E tumau foʻi manatunatuga o lona finagalo mai i lea tupulaga i lea tupulaga.+
12 E fiafia le nuu e fai Ieova ma o latou Atua,+O le nuu ua ia filifilia e fai ma ona tofi.+
13 Ua silasila ifo Ieova mai i le lagi,+Ma ua ia silafia ai le fanau uma a tagata.+
14 Mai i le afioaga tumau o loo ia afio ai+Ua ia silasila ifo ai iā i latou uma o loo nonofo i le lalolagi.
15 Ua ia faia loto o i latou uma lava;+Ua ia manatunatu foʻi i a latou galuega uma.+
16 E lē faaolaina se tupu i le tele o ʻautau;+E lē laveaʻiina foʻi se tagata malosi i le tele o lona malosi.+
17 E lē aogā le solofanua mo le faaolataga,+E lē mafai foʻi ona ia laveaʻiina se tasi i le tele o lona malosi.+
18 Faauta! O fofoga o Ieova e faasaga iā i latou e matataʻu iā te ia,+Iā i latou foʻi o loo faatalitali i lona alofa faamaoni,+
19 Ina ia laveaʻi i latou mai i le oti,+Ma ia faaolaina i latou i le oge.+
20 O loo matou faatalitali atu iā Ieova.+O ia o lo matou fesoasoani ma lo matou talita.+
21 Auā ua olioli o matou loto iā te ia;+Ua matou faatuatua foʻi i lona suafa paia.+
22 Ieova e, ia oo mai iā i matou lou alofa faamaoni,+Auā o loo matou faatalitali atu pea iā te oe.+
Faamatalaga Pito i Lalo
^ O se meafaifaaili anamua e ese mai i le kitara i aso nei. O le upu Peretania, o le harp.
