Salamo 35:1-28
O le salamo a Tavita.
35 Ieova e, ia e finau mo aʻu e faasaga i ē o loo tetee mai iā te aʻu;+Ia e tau foʻi ma i latou o ē e faasagatau mai iā te aʻu.+
2 Ia e tago i le talita ma le talipupuni tele,+Ma ia e tulaʻi e fesoasoani mai iā te aʻu,+
3 Ia sii aʻe le tao ma le toʻi mo le taua, e faafetaiaʻi ai i latou o loo tuliloa mai iā te aʻu.+Ia e fetalai mai foʻi iā te aʻu: “O aʻu o lou faaolataga.”+
4 Tau ina ia māsiasi ma ia faalumaina i latou o loo saʻili e fasioti iā te aʻu.+Tau ina ia toe foʻi i tua, ma ia faamāina i latou o loo faufau e faia se mea leaga iā te aʻu.+
5 Tau ina ia avea i latou e pei o aputi o saito ua lelea i le matagi,+Ma ia tuliesea i latou e le agelu a Ieova.+
6 Ia pōuliuli lo latou ala ma ia maseesee,+Ia tuliloa foʻi i latou e le agelu a Ieova.
7 Auā ua latou natia fua mo aʻu se upega i le lua;+Ua latou elia fua le lua mo aʻu.+
8 Ia fano i latou e aunoa ma lo latou iloa,+Ma ia puʻea i latou e le upega na latou natia;+Ia paʻuʻū i ai i latou ma fano ai.+
9 A ia ou olioli iā Ieova;+Ia fiafia i lana faaolataga.+
10 Ia fai atu oʻu ivi uma lava:+“Ieova e, o ai ea se tasi e pei o oe,+I le laveaʻiina o lē ua puapuagatia mai i lē ua sili atu ona malosi i lo o ia,+Ma le laveaʻiina foʻi o lē ua puapuagatia ma lē ua mativa mai i lē ua faoa ana mea?”+
11 Ua tulaʻi mai molimau faasauā;+Ua latou fesili mai i mea ou te lē iloa.+
12 Ua latou taui mai iā te aʻu le leaga mo le lelei,+Ua ou faavauvau ai.+
13 A o aʻu nei, sa ou ofu i le ʻie talatala ina ua latou mamaʻi,+Na ou faatigāina aʻu i le anapogi,+Ma na toe foʻi mai laʻu tatalo i loʻu fatafata.+
14 Ua ou matuā popole lava i laʻu uō ma loʻu uso,+O le mea lea, ua ou fesavaliaʻi ai e pei o se tasi ua faanoanoa ona o lona tinā.+Ua ou faanoanoa ma ou ifo toʻele ai.
15 Ae peitaʻi, ua latou olioli ma faapotopoto faatasi ina ua ou setusetu;+Ua latou faapotopoto faatasi e faasagatau mai iā te aʻu,+E fasia aʻu ae ou te lē o iloaina;+Ua latou saeia foʻi aʻu ma e leʻi mapu i latou.+
16 Ua atigū mai o latou nifo iā te aʻu+ mo sina meaʻai itiiti,+Faatasi ma tagata faatauemu ua fulitua i le Atua.
17 Ieova e, o le ā ea le umi e te silasila pea i ai?+Ia e laveaʻiina aʻu mai i a latou faatafunaga,+E na o aʻu lava e toʻatasi+ mai i tamaʻi leona taanoa.
18 Ou te faaneenee atu iā te oe i totonu o le faapotopotoga tele;+Ou te vivii atu iā te oe faatasi ma le nuu toʻatele.+
19 Tau ina ia aua neʻi olioli o ē ua ʻinoʻino fua mai iā te aʻu;+Aua foʻi neʻi faaʻiviʻivi mata o i latou o ē ua ʻinoʻino mai fua iā te aʻu.+
20 Auā latou te lē o tautatala i le filemu;+Ae e faasaga i ē o loo toʻafilemu o le lalolagiUa latou faufau pea upu faaʻoleʻole.+
21 Ua faamamaga mai foʻi o latou gutu iā te aʻu.+Ua latou faapea mai: “Uē! Uē! ua matou vāai i ai.”+
22 Ieova e, ua e silasila i ai.+ Aua neʻi e lē tali mai.+Ieova e, aua e te taumamao mai iā te aʻu.+
23 Inā tulaʻi ia ma maleifua mai i loʻu faamasinoga,+Ieova e, loʻu Atua, ia e tauaaoina laʻu finauga.+
24 Ieova e, loʻu Atua, ia e faamasinoina aʻu e tusa ma lau amiotonu,+Ma ia aua neʻi o latou olioli ona o aʻu.+
25 Aua neʻi o latou faapea ifo i o latou loto: “Uē, i tatou nei!”+Tau ina ia aua neʻi o latou faapea ifo foʻi: “Ua tatou foloina o ia.”+
26 Ia māsiasi i latou ma ia faamāina faatasi+O ē o loo olioli i loʻu malaia.+Ia oofu i le māsiasi+ ma le faalumaina i latou o loo tautatala faamaualuluga faasaga iā te aʻu.+
27 Ia alalaga fiafia ma olioli i latou o loo fiafia i laʻu amiotonu,+Ia fai ane pea i latou:+“Ia faasilisilia Ieova, o lē e fiafia i le filemu o lana auauna.”+
28 Ia taʻutaʻu lemū atu e loʻu laulaufaiva lau amiotonu,+Ma vivii atu iā te oe i le aso atoa.+
