Salamo 55:1-23
I le faatonu o le ʻaufaimusika o meafaifaaili e iai uaua. O le Masekila.* O le salamo a Tavita.
55 Le Atua e, ia e faafofoga mai i laʻu tatalo;+Aua foʻi e te lē amanaʻia laʻu talosaga atu mo lou finagalo malie.+
2 Ia e faafofoga mai ma tali mai iā te aʻu.+Ua ou fememeaʻi i loʻu popole,+Ma ua na o loʻu atugalu ai lava,
3 E tusa ai ma leo o le fili, ona o omiga a lē e amioleaga.+Auā ua latou faaoo mai pea iā te aʻu o mea e tigā ai,+Ma ua latou ʻinoʻino pea iā te aʻu ona o lo latou ita.+
4 Ua matuā tigā lava loʻu loto i totonu iā te aʻu,+Ma ua oo mai foʻi iā te aʻu le fefe i le oti.+
5 Ua oo mai iā te aʻu le mataʻu ma le gatete,+Ma ua ou matuā gatete lava.
6 Ua ou faapea ifo: “E! pe ana iai ni oʻu apaʻau e pei o le lupe.+Ou te lele ese ai ma ou nofo i se isi mea.+
7 Faauta! Ou te sola mamao ese ai;+Ou te nofo ai foʻi i le toafa.+—Selā—
8 Ou te faatopetope atu i le mea ou te sao aiMai i le matagi malosi ma le afā.”+
9 Ieova e, ia e faafenumiaʻi la latou gagana,+Auā ua ou vaaia faiga sauā ma femisaʻiga i le aai.+
10 Ua latou savavali faataamilo i le pā i le ao ma le pō;+Ua i totonu iā te ia mea e tigā ai ma faafitauli.+
11 Ua iai foʻi i totonu iā te ia o mea faigatā;Ma ua lē ō ese mai i lona nofoaga faitele o sauāga ma faiga taufaasesē.+
12 Auā e lē o se fili na faalumaina aʻu;+E semanū e mafai ona ou faapalepale i ai,E lē o se tagata e matuā ita iā te aʻu na tautala faasausili e faasaga iā te aʻu;+E semanū e mafai ona ou lafi mai iā te ia.+
13 A o oe lava, o le tagata e ma te tutusa lelei,+O lē ou te iloaina ma ou te masani ai,+
14 Auā na masani ona māfana la ta mafutaga;+Na masani foʻi ona ta savavali faatasi ma tagata e toʻatele i le fale o le Atua.+
15 Ia i luga iā i latou le faatafunaga!+Ia latou ō ifo foʻi i le Tuugamau* a o feola;+Auā i le taimi na latou aumau ai o ni tagata ese, na iai pea mea leaga iā i latou.+
16 A o aʻu, ou te valaau atu i le Atua;+Ma e faaolaina lava aʻu e Ieova.+
17 I le afiafi, i le taeao, ma le aoauli, ou te faaalia ai loʻu popole ma loʻu ōi,+Ma e faafofoga mai o ia i loʻu leo.+
18 E na te laveaʻiina ma faatoʻafilemu aʻu mai i le taua ua sii mai iā te aʻu,+Auā ua matuā toʻatele i latou ua faasagatau mai iā te aʻu.+
19 E faafofoga mai le Atua ma tali mai iā i latou,+E oo lava i Lē o loo afio i le nofoālii talu mai anamua+—Selā—O i latou e lē o faia ni suiga+Ma o ē e lē o matataʻu i le Atua.+
20 Ua faaoo atu ona lima i ē o loo nonofo filemu ma ia;+Ua ia faalēaogāina lana feagaiga.+
21 E sili atu ona molemole upu a lona gutu nai lo o le pata,+Ae peitaʻi ua manaʻo lona loto e tau.+E sili atu foʻi ona mālū ana upu nai lo o le suāuu,+Ae peitaʻi ua pei o ni pelu maʻai.+
22 Ia tuuina atu iā Ieova ou popolega uma,*+O ia lava e na te tausia oe.+E na te lē tuua lava le tagata amiotonu ia tautevateva.+
23 Ae peitaʻi le Atua e, o oe lava e te ave ifo i latou i le lua e sili ona maulalo.+A o tagata ua nofosala i le toto ma ē e taufaaʻoleʻole, e feoti i latou a o leʻi taitai o latou olaga.+A o aʻu, ou te faatuatua atu iā te oe.+
Faamatalaga Pito i Lalo
^ O le uiga o lenei upu Eperu o le “solo o manatunatuga loloto o se tasi.”
^ Tagaʻi i le Faaopoopoga e 6.
^ I le gagana Eperu, “Ia lafo atu iā Ieova lau avega.”
