Salamo 60:1-12
I le faatonu o le ʻaufaimusika i Lili e Faamanatu ai. O le Mikitamu. O le salamo a Tavita. E aʻoaʻo atu ai.+ Ina ua tau o ia ma ʻau a Arama-naalaima ma Arama-Sopa, ina ua toe foʻi mai Ioapo ma fasiotia tagata Etoma e toʻasefulu lua afe i le Vanu Masima.+
60 Le Atua e, na e lafoaʻiina i matou, na e lepetia i matou,+Na e toʻatamaʻi iā i matou. A ia e toe faafoʻisia i matou.+
2 Ua e lūlūina le laueleele, ua e faamavaevaeina foʻi.+Ia e faaleleia mea ua mavetevete, auā ua maluelue.+
3 Ua e faavaai lou nuu i puapuaga.+Ua e faainu foʻi i matou i uaina e tautevateva ai.+
4 Ua e tuuina mai se faailoga i ē e matataʻu iā te oe+Ina ia sosola ma ʻaloʻalo solo ona o le ʻaufana. Selā.
5 Ina ia laveaʻiina ai o ē e pele iā te oe,+Ia e faaola mai i lou aao taumatau ma ia e tali mai iā i matou.+
6 Ua fetalai mai le Atua i lona uiga paia:+“Ou te fiafia lava aʻu, ou te tuuina atu Sekema e fai ma tofi;+Ma ou te fuaina atu foʻi le fanua laugatasi o Sukota.+
7 O aʻu e ona Kiliata, ma o aʻu e ona Manase,+O Efaraima foʻi o le malosi o loʻu taʻitaʻi;O Iuta o le tootoo lea o loʻu alii.+
8 O Moapi o le tanoa lea e fufulu ai oʻu lima ma oʻu vae.+Ou te lafoina atu oʻu seevae iā Etoma.+Ou te alaga atu i le manumalo iā Filisitia.+
9 O ai e na te avatua aʻu i le aai o loo siʻosiʻomia?+O ai foʻi e na te taʻitaʻi atu aʻu e oo lava i Etoma?+
10 Le Atua e, pe e lē o oe ea, o lē na lafoaʻiina i matou+Ma ua e lē afio atu le Atua e, faatasi ma a matou ʻautau?+
11 Ia e fesoasoani mai i lo matou puapuaga,+Auā e lē aogā le faaolataga mai i tagata.+
12 O le Atua e matou te maua ai le malosi,+Ma o ia lava e na te solia i lalo o matou fili.+
