Salamo 65:1-13
I le faatonu o le ʻaufaimusika. O le salamo a Tavita. O le pese.
65 Le Atua e, e iā te oe le viiga ma le faalologo i Siona;+E totogi atu foʻi iā te oe le tautoga.+
2 Le Faafofoga tatalo e, e ō atu iā te oe tagata uma lava.+
3 Ua sili atu ona malosi o mea sesē nai lo o aʻu.+Ae e te ufiufia lava a matou solitulafono.+
4 E fiafia lē ua e filifilia ma faalatalata atu,+Ina ia nofo o ia i ou lotoā.+E matou te malilie foʻi i mea lelei i lou fale,+I lou malumalu paia.+
5 E te tali mai iā i matou i mea mataʻutia e faia i le amiotonu,+Le Atua e, o lo matou faaolataga,+O le Faatuatuaga oe o tuaoi uma o le lalolagi ma ē o mamao i le sami.+
6 Ua ia matuā faatumauina mauga i lona mana;+Ua fusia foʻi o ia i le malosi.+
7 Ua ia faafilemuina le taalili o le sami,+O le taalili o ona galu ma le vevesi o nuu.+
8 E fefefe foʻi ē o nonofo i mea e sili ona mamao i au faailoga;+E te faia foʻi ia alalaga fiafia mea e aliali mai i le taeao ma le afiafi.+
9 Ua e liuliualo mai i le laueleele, ina ia e foaʻiina mai i ai mea e tele lava;+Ua e matuā faaʻoaina foʻi.Ua tumu le vaitafe mai i le Atua i vai.+Ua e saunia a latou saito,+Auā ua faapea lava ona e saunia le laueleele.+
10 Ua e faasusū ona alāvai ma faagatasia ona mea maupuʻepuʻe;+Ua e faamalūina le laueleele i timuga tetele; ua e faamanuia foʻi i laau iti e tutupu ai.+
11 Ua e faapaleina le tausaga i lou lelei,+O ou ala foʻi e tafe mai ai mea lololo.+
12 Ua tafe mai pea mea lololo mai i fanua e aai ai lafumanu o le toafa,+Ua fusia foʻi aʻega i le olioli.+
13 Ua ufitia laufanua e tataa ai manu i lafu mamoe,+Ua ufitia foʻi fanua laugatasi i le saito.+Ua latou alalaga i le manumalo, ma ua pepese i latou.+
