Tanielu 7:1-28
7 O le tausaga muamua o le nofoaiga a Pelesara+ le tupu o Papelonia, na iloa ai e Tanielu se miti ma ni faaaliga a o taoto i lona moega.+ Ona ia tusia lea o le miti.+ Na ia taʻu atu foʻi le mataupu atoa.
2 Ona fai atu lea o Tanielu e faapea:
“Na ou iloa ni faaaliga i le pō, ma vaai foʻi! ua faagaepu e matagi+ e fā o le lagi le vasaloloa.+
3 Ua ō aʻe mai i le sami+ o manufeʻai+ tetele e fā, ua ese+ le tasi mai i le isi.
4 “O le manufeʻai muamua e pei o se leona,+ ma na iai ona apaʻau e pei o se aeto.+ Na ou vaai pea i ai seʻia oo ina faʻi ese ona apaʻau, na siitia mai i le laueleele+ ma na faatūina i luga o vae e lua e pei o se tagata, ma na tuuina atu i ai le loto o le tagata.+
5 “Faauta foʻi! o le isi manufeʻai, o le lona lua lea, e pei o se pea.*+ Ua tulaʻi le tasi itu o le manufeʻai,+ o loo ū i lona gutu ni ivi ʻasoʻaso se tolu; ma o le tala lenei ua fai atu iā te ia, ‘Inā tulaʻi ia e ʻai i tino e tele.’+
6 “Ina ua mavae ia mea, na ou vaaia pea ma seʻi vaai foʻi! o le isi manufeʻai e pei o le nameri,*+ ua iai apaʻau e fā o se manulele i ona tua. E fā ulu+ o le manufeʻai, ma ua tuuina atu iā te ia le pule.
7 “Mulimuli ane, na ou vaai pea i faaaliga i le pō, vaai foʻi! o le manufeʻai lona fā, e matuā feʻai ma mataʻutia e ese foʻi lona malosi.+ E iai ona nifo uʻamea tetele. Ua ʻaina ma nutililiia, ua solipalaina foʻi mea o loo totoe i ona vae. E ese mai lava i isi manufeʻai na muamua mai, e iai foʻi ona seu e sefulu.+
8 Na ou manatunatu pea i seu, faauta foʻi! o le isi seu, e laʻitiiti ua oso mai i le va o seu,+ ma ua fafaʻi ese i ona luma o seu e tolu mai i seu muamua. Faauta! ua iai mata e pei o mata o le tagata i lenei seu, ua iai foʻi le gutu e tautala ai i upu faasausili.+
9 “Na ou vaai pea seʻia oo ina tuuina mai ni nofoālii+ ma ua alaala ai Lē e mai anamuā ona aso.+ O ona ofu ua papaʻe e pei o le kiona,+ ma lona lauao e pei o fulufulu mamoe mamā.+ O lona nofoālii o le afi mumū ia;+ ma o ona uili o se afi mumū foʻi.+
10 Ua tafe mai le afi ma ua alu atu mai i ona luma.+ Ua auauna pea iā te ia le afe o ni afe,+ ma ua tutū pea i ona luma le selau miliona.+ Ua nofoia le Faamasinoga,+ ua tatalaina foʻi o tusi.
11 “Na ou vaaia pea i lenā taimi ona o upu faasausili na tautala mai ai le seu;+ na ou vaaia pea seʻia oo ina fasimate le manufeʻai, ma faatamaʻia lona tino ma lafo i le afi o loo mumū.+
12 A o isi manufeʻai+ ua totoe, ua aveesea la latou pule, ma ua faatagaina i latou e ola pea mo se vaitaimi.+
13 “Na ou vaaia pea i le faaaliga i le pō, tagaʻi foʻi! ua afio mai i ao+ o le lagi se tasi e pei o le atalii o le tagata;+ ma ua tuu atu o ia e ulufale atu i Lē e mai anamuā ona aso,+ ua latou momoli atu o ia i Ona luma.+
14 Ua tuuina atu iā te ia le pule,+ o le mamalu+ ma le malo,+ ina ia auauna iā te ia o tagata ma nuu ma gagana uma.+ O lana pule, o le pulega lea e tumau e lē mavae atu, e lē faaumatia foʻi lona malo.+
15 “A o aʻu o Tanielu, ua popole loʻu loto ona o ia mea, ma ua ou fefe ona o faaaliga na ou vaaia.+
16 Na ou sōsō atu i se tasi o ē o loo tutū, ina ia ou maua mai iā te ia ni faamatalaga maufaatuatuaina e faatatau i ia mea.+ Na ia fai mai a o ia faailoa mai iā te aʻu le uiga o ia mea,
17 “‘A o nei manufeʻai tetelē, ona e fā ia manufeʻai,+ o tupu ia e toʻafā o le a tulaʻi mai i le lalolagi.+
18 Ae e maua e le ʻaupaia+ a Lē e Pule Aoao+ le malo, e fai mo i latou le malo+ mo se taimi umi, e oo lava i le faavavau.’
19 “Na ou manaʻo e fia iloa lelei e uiga i le manufeʻai lona fā lea ua matuā ese mai i isi manufeʻai uma, e matuā feʻai lava, e uʻamea ona nifo, e ʻapamemea ona matiuu, ma ua ia ʻaina ma nutililiia, e na te solipalaina i ona vae mea ua totoe;+
20 ma na ou fia iloa foʻi e tusa ai ma seu e sefulu i lona ulu,+ ma le isi seu+ ua oso mai ai, lea ua paʻuʻū+ ai seu e tolu i ona luma, o le seu foʻi lea ua iai mata ma le gutu e tautala ai i upu faasausili,+ ma o lona tino mai e sili ona telē i isi seu uma.
21 “Na ou vaai pea i ai ae ua siitaua atu lenā lava seu i le ʻaupaia ma ua manumalo iā i latou,+
22 seʻia oo ina afio mai o Lē e mai anamuā ona aso+ ma ua lelei le iʻuga o le faamasinoga mo le ʻaupaia a Lē e Pule Aoao,+ ma ua oo mai le taimi e maua ai e le ʻaupaia le malo.+
23 “O le tala lenei na ia fai mai, ‘O lona fā o manufeʻai, o lona fā lea o malo o le lalolagi, o le a ese mai i isi malo uma; e na te ʻaina le lalolagi uma, na te solipalaina ma nutililiia ai.+
24 A o seu e sefulu, o le a tulaʻi mai ai tupu e sefulu mai i lenā malo;+ e tulaʻi mai ai foʻi le isi pe a mavae i latou, e ese mai o ia mai i ē na iai muamua,+ e na te faamāina tupu e toʻatolu.+
25 O le a ia tautala foʻi e faasagatau i le Silisili Ese,+ o le a ia sauā pea i le ʻaupaia a Lē e Pule Aoao.+ E manaʻo o ia e sui taimi+ ma tulafono,+ ma e tuuina i latou i lona lima mo le taimi, ma taimi e lua ma le ʻafa taimi.+
26 Ua nofoia le Faamasinoga,+ ona latou aveesea ai lea o lana pulega, ina ia faatamaʻia ma faaumatia atoatoa o ia.+
27 “‘O le malo, o le pulega, ma le matagofie o malo i lalo o le lagi uma, ua tuuina atu ia i le nuu o le ʻaupaia a Lē e Pule Aoao.+ O lo latou malo+ e tumau pea, e auauna ma usiusitaʻi i ai malo uma.’+
28 “O le iʻuga lea o lenei mataupu. A o aʻu, o Tanielu, na ou matuā fefe ona o oʻu manatunatuga, ma na sesega ai oʻu mata; ae ua teu pea i loʻu loto le mataupu.”+
Faamatalaga Pito i Lalo
^ Po o le “urosa.” O le upu Peretania o le bear.
^ O se manu pulepule taufeʻai e pei o se pusi lapoʻa. E taʻua i le faa-Peretania o le leopard.
