Teuteronome 1:1-46
1 Ua fai atu Mose iā Isaraelu uma i le vaipanoa o Ioritana+ i le fanua laugatasi o le toafa, i luma o Sufe i le va o Parana+ ma Topelu ma Lapana ma Haserota+ ma Tisaapa,
2 e sefulu tasi aso e malaga ai mai i Horepa e ui atu i le Mauga o Seira agaʻi i Katesapanea.+
3 Ua oo i le tausaga e fā sefulu,+ i le masina e sefulu tasi, i le aso muamua o lea masina, ona faapea atu ai lea o Mose i le fanauga a Isaraelu e tusa ma mea uma na poloaʻi mai ai Ieova iā te ia mo i latou,
4 ina ua mavae foʻi lona faatoʻilaloina o Sekono+ le tupu o tagata Amorī, o lē sa nofo i Hesepona, ma Oko+ le tupu o Vasana, o lē sa nofo i Aserota,+ i Eterei.+
5 I le vaipanoa o Ioritana i le atunuu o Moapi, ua amata ona faamatala atu e Mose lenei tulafono+ e faapea:
6 “Na fetalai mai Ieova lo tatou Atua iā i tatou i Horepa+ e faapea, ‘Ua lava aso na outou nonofo ai i lenei vaega maugā.+
7 Ia sauni ma ō atu loa i vaega maugā ua iai tagata Amorī+ ma o latou tuaoi uma i Arapa,*+ o le vaega maugā+ ma Sefila* ma le laufanua o Nekepi+ ma le talafatai,+ o le laueleele o tagata Kanana,+ ma Lepanona+ e oo atu i le vaitafe tele, o le vaitafe lea o Eufirate.+
8 Vaai, ua ou tuuina atu le laueleele i o outou luma. Inā ō atu ia ma fai mo outou le laueleele lea na tautō ai Ieova i o outou tamā, o Aperaamo, o Isaako,+ ma Iakopo+ e tuuina atu iā i latou ma a latou fanau pe a mavae atu i latou.’+
9 “Ona ou faapea atu lea iā te outou i lenā taimi, ‘Ou te lē lavatia ona ou taʻitaʻiina na o aʻu o outou.+
10 Ua matuā faatoʻateleina outou e Ieova lo outou Atua, ma i le asō ua toʻatele+ outou e pei o fetu o le lagi.
11 Tau ina ia faaafe ona faatoʻateleina outou+ e Ieova le Atua o o outou augātamā, ma ia faamanuia+ outou e pei ona ia folafola mai iā te outou.+
12 Pe faapefea ona ou lavātia ona tauaveina na o aʻu o outou auā e mamafa tele ma matuā faigatā lenei avega, atoa ma a outou faitioga?+
13 Ia e aumaia ni tane atamamai, e faautauta+ ma agavaa+ mai i o outou ituaiga, ina ia ou tofia i latou e fai ma pule iā te outou.’+
14 Ona outou tali mai ai lea iā te aʻu e faapea: ‘E manaia le mea ua e fai mai ai iā i matou.’
15 Ona ou aveina lea o taʻitaʻi o o outou ituaiga, o tane atamamai ma agavaa, ma tofia i latou e fai ma pule iā te outou, o pule o le taʻitoʻaafe, o pule o le taʻitoʻaselau, o pule o le taʻitoʻalima sefulu, o pule o le taʻitoʻasefulu ma alii o o outou ituaiga.+
16 “Na ou poloaʻi atu i o outou faamasino i lenā taimi e faapea, ‘Pe a outou faalogo i se mataupu i o outou uso, ia outou faamasino ma le amiotonu+ i le va o se tamāloa ma lona uso po o le tagata ese o loo iā te ia.+
17 Aua tou te faaʻauʻau i a outou faamasinoga.+ E ao ona outou faalogo i lē e faatauvaa e pei ona outou faalogo i lē e aloaʻia.+ Aua tou te fefefe i tagata+ auā o le Atua e ona le faaiʻuga;+ o se mataupu e faigatā tele mo outou, ia outou tuu mai iā te aʻu ou te faalogo atu i ai.’+
18 Na ou poloaʻi atu foʻi iā te outou i lenā taimi i mea uma e ao ona outou faia.
19 “Ona tatou malaga ese lea mai i Horepa ma malaga atu i lenā toafa+ uma e telē ma matuā mataʻutia, lea na outou vāai i ai i le ala e ui ane i vaega maugā ua iai le ʻau Amorī,+ e pei ona fetalai mai ai Ieova lo tatou Atua iā i tatou; ma mulimuli ane taunuu ai i Katesapanea.+
20 Ona ou fai atu lea iā te outou, ‘Ua outou taunuu i le vaega maugā ua iai le ʻau Amorī, lea ua tuuina mai e Ieova lo tatou Atua iā i tatou.+
21 Vaai, ua tuuina mai e Ieova lou Atua le laueleele iā te oe.+ Ia e alu aʻe ma fai mo oe e pei ona fetalai mai ai Ieova le Atua o ou augātamā iā te oe.+ Aua le fefe, aua foʻi le mataʻu.’+
22 “Peitaʻi, na faalatalata mai outou uma iā te aʻu ma faapea mai, ‘Seʻi o tatou aauina atu ni tamāloloa e muamua atu i o tatou luma, ina ia latou vaavaai i le laueleele mo i tatou ma taʻu mai se faamatalaga e faatatau i le ala e ao ona tatou ō aʻe ai, ma aai o le a tatou ō atu i ai.’+
23 Ua lelei lea mea i loʻu manatu, o lea na ou aauina atu ai tane e toʻasefulu lua mai iā te outou, e taʻitasi mai i le ituaiga.+
24 Ona sauni lea o i latou ma ō aʻe i le vaega maugā,+ na oo atu i le vanu o Esekolo+ ma mataʻi faalilolilo le laueleele.
25 Na latou aumaia ni fua o le laueleele+ i o latou lima ma tuuina mai iā i tatou, ma ua latou ō mai ma le faamatalaga e faapea, ‘E lelei le laueleele ua tuuina mai e Ieova lo tatou Atua iā i tatou.’+
26 Ae na outou lē mananaʻo e ō aʻe ai,+ ma na outou fouvale i le faatonuga a Ieova lo outou Atua.+
27 Na outou muimui pea i o outou faleʻie, ma faapea ane, ‘Na aumaia i tatou e Ieova mai i Aikupito+ auā na ia ʻinoʻino+ iā i tatou, ina ia tuuina atu ai i tatou e faaumatia e lima o le ʻau Amorī.+
28 O fea a tatou ō i ai? Ua faavaivaia o tatou loto+ e o tatou uso, i le faapea mai: “Na matou vāai i inā i ni tagata e sili atu ona malolosi ma uumi nai lo o i tatou,+ o aai tetele malupuipuia e oo i le lagi,+ atoa ma atalii o Anakima.”’+
29 “Ona ou fai atu lea iā te outou, ‘Aua tou te matataʻu pe fefefe ona o i latou.+
30 E muamua Ieova o lo outou Atua iā te outou. O le a tau o ia mo outou+ e tusa ma mea uma na ia faia mo outou i Aikupito a o outou vāai i ai,+
31 atoa foʻi ma le toafa+ lea na e vaai i ai i le tausiga o oe+ e Ieova lou Atua e pei ona tausia e se tamā o lona atalii, i mea uma na outou savavali ai seʻia outou oo mai i lenei mea.’+
32 Peitaʻi e ui i ia upu ae e tou te leʻi faatuatua iā Ieova lo outou Atua,+
33 o lē na muamua atu iā te outou i le ala e mataʻi faalilolilo se mea e faatutū ai o outou faleʻie,+ e ala i le afi i le pō ina ia outou iloa ai po o lē fea ala e ao ona outou savavali ai, a o le ao foʻi ina o ao.+
34 “Na faafofoga Ieova i a outou faamatalaga uma. Ona toʻatamaʻi ai lea o ia ma tautō mai e faapea,+
35 ‘E lē vaai se tasi o nei tagata o lenei tupulaga leaga i le laueleele lelei lea na ou tautō ai e avatu i o outou tamā,+
36 seʻi vaganā ai Kalepo le atalii o Iefune.+ O le a ia vaai i ai, ma o le a ou tuuina atu iā te ia ma ona atalii le laueleele na ia savali ai, auā na matuā mulimuli o ia iā Ieova.+
37 (Na oo foʻi iā te aʻu le toʻatamaʻi o Ieova ona o outou ma na ia fetalai mai, ‘O oe foʻi e te lē alu i ai.+
38 O Iosua le atalii o Nuno o lē o loo tū i ou luma, o ia lea o le a alu i inā.’+ Ua Ia faamalosia+ o ia auā e na te taʻitaʻia Isaraelu ina ia ō atu i inā ma nonofo ai.)
39 Ae o a outou fanau iti o ē na outou faapea mai: “O le a ave i latou e fai ma pagota!”+ atoa ma o outou atalii o ē ua lē iloa le lelei ma le leaga i nei aso, o i latou ia e ō atu i le laueleele, ma ou te avatu iā i latou ma fai mo i latou.
40 A o outou ia suia o outou ala ma ō atu i le toafa e agaʻi i le auala i le Sami Ulaula.’+
41 “Ona outou tali mai lea ma faapea mai iā te aʻu, ‘Ua matou agasala iā Ieova.+ O le a matou ō aʻe e tau e tusa ma mea uma na poloaʻi mai ai Ieova lo matou Atua iā i matou!’ Na taʻitasi foʻi outou ma fusi i ana auupega o le taua, ma manatu e faigofie le ō aʻe i le mauga.+
42 Ae ua fetalai mai Ieova iā te aʻu, ‘Ia fai atu iā i latou: “Aua tou te ō aʻe ma siitaua, auā ou te lē o faatasi ma outou;+ neʻi faatoʻilaloina outou e o outou fili.”’+
43 Ona ou fai atu ai lea iā te outou ae tou te leʻi faalogo lava ma outou fouvale+ ma lē usitaʻi i le faatonuga a Ieova, ma na outou osovale ma taumafai e ō aʻe i le mauga.+
44 Ona ō mai lea o le ʻau Amorī o ē na nonofo i le la mauga e faafetaui outou ma tuliloa iā te outou,+ e pei ona faia e pi, ma faatoʻilaloina outou i Seira e oo lava i Horema.+
45 Mulimuli ane, ona outou toe foʻi lea ma fetagisi i luma o Ieova, ae e leʻi faafofoga mai Ieova iā te outou,+ e leʻi liliu mai ona fofoga iā te outou.+
46 Ona outou nonofo ai lea i Katesa i aso e tele, e pei o aso e tele na outou nonofo ai i inā.+
Faamatalaga Pito i Lalo
^ Po o le “itu i saute,” o lona uiga o le itu i saute o le Nuu Folafolaina.
^ Po o “laufanua laugatasi o le toafa.”
