Teuteronome 2:1-37
2 “Ona tatou liliu lea ma malaga atu i le toafa, i le ala e tau atu i le Sami Ulaula, e pei ona fetalai mai ai o Ieova iā te aʻu;+ ma na tele aso na tatou savalia ai le mea o loo iai le mauga o Seira.
2 Ona fetalai mai lea o Ieova iā te aʻu e faapea,
3 ‘Ua lava aso ua outou savavali ai i le mea ua iai lenei mauga.+ Ia sui i mātū le mea tou te agaʻi atu i ai.
4 Ia faatonuina le nuu e faapea: “E tou te ui ane i le tuaoi o o outou uso,+ o atalii ia o Esau+ o loo nonofo i Seira;+ o le a fefefe i latou iā te outou,+ ma e ao ona outou faaeteete.
5 Aua tou te tau ma i latou, auā ou te lē tuuina atu iā te outou sina vaega o lo latou fanua, e leai lava sina mea e tusa ma se alofivae; auā na ou avatu le Mauga o Seira iā Esau e fai ma ona tofi.+
6 Ia outou aai i meaʻai ua outou faatau mai iā i latou i tupe; ia outou feinu foʻi i vai ua outou faatau mai iā i latou i tupe.+
7 Auā ua faamanuia Ieova lou Atua iā te oe i mea uma ua e faia i ou lima.+ Ua ia silafia lelei lau savaliga i lenei toafa telē. Na iā te oe Ieova lou Atua i tausaga e fā sefulu.+ E leai se mea na e mativa ai.”’+
8 Na tatou ui ane i o tatou uso, o atalii o Esau,+ o loo nonofo i Seira, ma na tatou lē ui atu i le ala lea e tau i Arapa,+ o Elata ma Esiokape.+
“Ona tatou liliu lea ma ō atu i le ala e tau atu i le toafa o Moapi.+
9 Na fetalai mai Ieova iā te aʻu, ‘Aua e te faaita i tagata Moapi pe tau ma i latou, auā ou te lē avatua iā te oe se vaega o lona fanua e fai mo oe, auā na ou tuuina atu Aro+ i atalii o Lota+ e fai ma o latou tofi.
10 (Na nonofo muamua ai tagata Emema,+ o se nuu malosi ma le toʻatele, ma uumi e pei o tagata Anakima.+
11 Ua taʻua foʻi tagata Rafaimi+ ua pei o tagata Anakima,+ ma sa masani ona taʻua e tagata Moapi i latou o tagata Emema.
12 Na nonofo muamua tagata Hori+ i Seira, ona faatoʻilaloina lea ma faaumatia i latou mai i o latou luma e atalii o Esau,+ ae nonofo ai i le mea sa iai i latou,+ o le a faia faapea foʻi e Isaraelu i le laueleele ua fai ma ona tofi, lea o le a foaʻi mai e Ieova iā i latou.)
13 O lenei, ia tulaʻi ma ia outou sopoʻia le vanu o Sareta.’ O lea na tatou sopoʻia ai le vanu o Sareta.+
14 O aso uma na tatou savavali ai mai i Katesapanea seʻia o tatou sopoʻia atu le vanu o Sareta, e tolu sefulu valu tausaga, seʻia oo ina feoti le tupulaga uma o tane mai i le nuu e mafai ona tau, e pei ona tautō mai ai Ieova iā i latou.+
15 Na oo le aao+ o Ieova iā i latou ma faaatuatuvaleina ai i latou seʻia oo ina feoti uma i latou ma lē toe iai i le nuu.+
16 “Na oo ina feoti uma tane e mafai ona tau mai i le nuu,+
17 ona toe fetalai mai lea o Ieova iā te aʻu e faapea,
18 ‘O le asō, e te ui ane ai i le vaipanoa o Moapi, o Aro lea,+
19 ma e te faalatalata atu foʻi i luma o atalii o Amoni. Aua e te faaita iā i latou pe tau ma i latou, auā ou te lē avatua iā te oe se vaega o le fanua o atalii o Amoni e fai ma ou tofi, auā na ou tuuina atu i atalii o Lota e fai ma o latou tofi.+
20 Na taʻua foʻi o le laueleele o tagata Rafaimi.+ (Na nonofo muamua ai tagata Rafaimi, ma na faaigoa foʻi i latou e tagata Amoni o tagata Samasuma.
21 O i latou o se nuu malosi ma le toʻatele, ma uumi e pei o tagata Anakima;+ na faaumatia e Ieova+ i latou mai i o latou luma, ina ia faatoʻilaloina i latou ma nonofo ai i le mea sa latou iai;
22 e pei ona sa ia faia i atalii o Esau na nonofo i Seira,+ ina ua ia faaumatia tagata Hori+ mai i o latou luma, ina ia faatoʻilaloina i latou ma nonofo ai i le mea sa latou iai seʻia oo mai i le asō.
23 A o tagata Gavi+ o ē na nonofo i nuu e oo i Kasa,+ na faaumatia i latou e tagata Kafatori+ o ē na ō mai mai i Kafatori,+ ina ia latou nonofo i le mea sa latou iai.)
24 “‘Inā tutū ia outou, ia ō atu ma sopoʻia le ālia o Arinona.+ Vaai! ua ou tuuina atu i ou lima Sekono,+ o le tupu o Hesepona, o le tagata Amorī. Ia amata loa ona fai mo oe lona fanua, ma siitaua atu iā te ia.
25 O le aso nei ou te faaoo atu ai le atuatuvale ma le fefe ona o oe i nuu uma i lalo o le lagi, o ē o le a faalogo i le tala e uiga iā te oe; o le a matuā atugalu i latou ma tigā e pei o le tigā o le fafine a fanau ona o oe.’+
26 “Ona ou aauina atu lea o avefeʻau mai i le toafa o Katemoti,+ iā Sekono+ le tupu o Hesepona ma ni upu o le filemu,+ e faapea,
27 ‘Seʻi oʻu ui atu i lou laueleele. E na o le auala tele ou te savali ai. Ou te lē liliu i le itu taumatau po o le itu tauagavale.+
28 Ou te ʻai i meaʻai ua e faatau mai iā te aʻu i tupe; ou te inu foʻi i vai ua e faatau mai iā te aʻu i tupe. Na ona ui atu lava o oʻu vae,+
29 e pei ona sa faia iā te aʻu e atalii o Esau o loo nonofo i Seira,+ ma tagata Moapi+ o loo nonofo i Aro, seʻia oo ina ou sopoʻia atu Ioritana ma oo atu i le laueleele o le a tuuina mai e Ieova lo matou Atua iā i matou.’+
30 Ae e leʻi faatagaina aʻu e Sekono le tupu o Hesepona e ui ane i ai, auā na tuu pea o ia e Ieova lou Atua e faamaaaina lona loto+ ma loto malō ai, ina ia tuuina atu o ia i ou lima e pei ona iai i le asō.+
31 “Ona fetalai mai lea o Ieova iā te aʻu, ‘Vaai! o lea ua amata ona ou tuuina atu Sekono ma lona laueleele iā te oe. Ia amata nei ona e ave lona fanua mo oe.’+
32 Na ō mai Sekono, o ia ma ona tagata e faafetaui iā i tatou i le taua i Iaesa,+
33 ona tuuina mai lea o ia e Ieova lo tatou Atua,+ ma na tatou faatoʻilaloina o ia+ ma ona atalii ma lona nuu atoa.
34 I lenā taimi, na tatou faoa ona aai uma ma faaumatia aai uma,+ o tane, o fafine atoa ma fanau. E leai se tasi na tatou faatotoeina.
35 E na o manu lalata na tatou ave e fai mo tatou, atoa ma vete i o latou aai na tatou faoa.+
36 E amata mai i Aroeru,+ e lata i le pito o le vanu o Arinona, o le aai foʻi lea i totonu o le vanu, e oo lava i Kiliata, e leai lava se aai ua sili le malosi i lo o tatou.+ Na tuuina mai e Ieova lo tatou Atua ia aai uma iā i tatou.
37 Ae e tou te leʻi ō atu i le laueleele o atalii o Amoni,+ o le pito atoa o le ālia o Iapoka,+ po o aai o vaega maugā, po o so o se mea na poloaʻi mai ai Ieova lo tatou Atua e aua neʻi ō i ai.
