Teuteronome 21:1-23
21 “Afai e maua se tasi ua fasiotia i le laueleele ua tuuina mai e Ieova lou Atua e fai mo oe, ua taatia i le fanua, ma ua lē iloa po o ai na fasiotia o ia,+
2 e ao i ou toeaina ma ou faamasino+ ona ō atu ma fua le mamao o le va o lē ua fasiotia ma aai ua siʻomia ai;
3 ma iloa ai le aai e sili ona latalata i ai lē ua fasiotia. E ao i toeaina o lenā aai ona ave se tamaʻi povi fafine o le lafu e leʻi faia se galuega, ua na lē toso foʻi i le amo;
4 e ao i toeaina o lenā aai ona avatu le tamaʻi povi fafine i le vanu i le mea o loo tafe ai le vai, lea e leʻi faatoʻaina pe totōina ai ni fatu, ma e ao ona latou gausia le ua o le tamaʻi povi fafine i le vanu.+
5 “E ao i ositaulaga o atalii o Levi ona faalatalata atu, auā o i latou ua filifilia e Ieova lou Atua e auauna iā te ia+ ma faamanuia+ atu i le suafa o Ieova, o a latou upu e foʻia ai feeseeseaʻiga uma i faiga sauā uma.+
6 Ona fafano lea o lima+ o toeaina uma o lenā aai o ē e sili ona latalata i lē ua fasiotia, i luga o le tamaʻi povi fafine lea na gausia le ua i le vanu;
7 e ao ona latou tali mai e faapea, ‘E leʻi faamasaa e o matou lima lenei toto, pe vāai foʻi i ai o matou mata o faamasaaina.+
8 Ieova e, aua neʻi taʻusalaina lou nuu o Isaraelu o ē ua e laveaʻiina,+ aua foʻi e te tuu le nofosala i le toto+ o lē ua lē sala i luga o lou nuu o Isaraelu.’ Aua neʻi nofosala i latou i le toto.
9 A o oe, e te aveesea le nofosala i le toto o sē ua lē sala mai iā te outou,+ auā e te faia le mea ua saʻo i le silafaga a Ieova.+
10 “Afai e te alu e tau ma ou fili, e tuuina mai foʻi e Ieova lou Atua i latou i lou lima,+ ma e ave faapagota i latou;+
11 ua e vaaia foʻi se fafine aulelei mai i tagata na ave faapagota, ua e alofa iā te ia+ ma ua e ave o ia e fai ma au avā,
12 e ao ona e aumaia o ia i totonu o lou fale. E ao ona sele lona ulu+ ma ʻoti ona atigilima,
13 ia aveese lona ofu tele na ave faapagota ai, e nofo foʻi i lou fale ma tagi mo lona tamā ma lona tinā mo le masina atoa;+ mulimuli ane, ona lua feusuaʻi lea ma ia, e te ave o ia ma e faaipoipo iā te ia, ma avea ai o ia ma au avā.
14 Afai ua e lē fiafia iā te ia, e ao ona e tuu o ia e alu+ i le mea ua manaʻo i ai o ia; ae aua lava e te faatauina o ia i se tupe. Aua e te agaleaga+ iā te ia pe a uma ona e faalumaina o ia.
15 “Afai e toʻalua ni avā a se tamāloa, e alofa o ia i le tasi ae ʻinoʻino i le tasi, ma ua fanaua e i laʻua, o lē ua alofa i ai ma lē ua ʻinoʻino i ai ni ona atalii, ma o le atalii ulumatua ua fanaua e lē ua e ʻinoʻino i ai,+
16 a oo i le aso e na te avatu ai i ona atalii ni tofi mai i ana oloa, e lē faatagaina ona avea ma ulumatua le tama a lē ua alofa i ai, ae tuua le tama a lē ua ʻinoʻino i ai auā o ia o le ulumatua.+
17 Auā e ao ona ia amanaʻia le ulumatua a lē ua ia ʻinoʻino i ai, e ala i le tuuina atu iā te ia o vaega e lua o ana oloa uma,+ auā o ia lea na ia muaʻi fai fanau ai.+ O ia e ana le aiā tatau o le ulumatua.+
18 “Afai e iai se atalii o se tamāloa e lē finauaʻia ma faalogogatā,+ e lē faalogo o ia i le upu a lona tamā po o le upu a lona tinā,+ ma ua la aʻoaʻi iā te ia ae e lē faalogo o ia iā i laʻua,+
19 ona fetagofi lea o lona tamā ma lona tinā ma avatu o ia i toeaina o lona aai i le faitotoʻa o le mea e nofo ai,+
20 e ao ona la fai atu i toeaina o lona aai, ‘O la ma tama lea, e lē finauaʻia ma e faalogogatā; e lē faalogo o ia i a ma upu,+ e soona ʻai tele+ foʻi ma onā.’+
21 E ao i tane uma o lona aai ona fetogia o ia i maa ina ia oti ai o ia. E ao foʻi ona e aveesea le mea leaga mai iā te oe, e faalogo foʻi i ai Isaraelu uma ma fefefe ai.+
22 “Afai e faia e se tamāloa se agasala ua tatau i ai le oti, ma ua fasiotia o ia,+ ua e faatautau foʻi o ia i luga o le laau,+
23 aua neʻi tuua lona tino oti i luga o le laau i le pō atoa;+ ae ia e tanu lava o ia i lenā aso, auā ua faamalaia e le Atua lē ua faatautauina i se laau;+ aua foʻi e te faaleagaina lou laufanua, lea ua tuuina mai e Ieova lou Atua iā te oe e fai ma ou tofi.+
