Teuteronome 25:1-19
25 “Afai e aliaʻe se feeseeseaʻiga i le va o ni tagata+ ma ua latou ō atu ina ia faamasinoina le mataupu,+ e ao foʻi ona latou faamasinoina ia tagata ma taʻu atu e amiotonu lē ua amiotonu, ma taʻu atu foʻi e amioleaga lē ua amioleaga.+
2 Afai e tatau ona sasaina lē ua amioleaga,+ e ao i le faamasino ona faatonu atu e faafaō o ia, ma sasa+ o ia i ona luma e fua le aofaʻiga o ana tā i lana gaoioiga leaga.
3 E ao ona sasa o ia i tā e fā sefulu. Aua neʻi faaopoopo e ia nisi tā neʻi faaauau ona ia sasaina o ia i nisi tā se tele e faaopoopo i nei tā+ ma faalumaina ai lou uso i ou luma.
4 “Aua e te fusi le gutu o le povi poʻa a o solisolia le saito.+
5 “Afai e nonofo faatasi ni uso ma ua oti le tasi o i latou ae e leai sona atalii, e lē tatau ona fai le avā a lē ua oti ma avā a se tasi e ese mai i le aiga. E ao i le uso o lana tane ona alu atu iā te ia, ma fai o ia ma ana avā e ala i le faaipoipo* atu i le toʻalua o lona uso ua oti.+
6 O le a tauaveina e le ulumatua e na te fanaua, le igoa o lona uso ua oti,+ ina ia aua neʻi soloia le igoa o lona uso mai i Isaraelu.+
7 “Afai e lē manaʻo le tamāloa i le avā a lona uso ua oti, e ao ona alu atu le avā a lona uso ua oti i toeaina+ o loo i le faitotoʻa o le aai ma faapea atu, ‘E musu le uso o laʻu tane e faatumauina le igoa o lona uso i Isaraelu. E lē ioe o ia e faaipoipo i le toʻalua o lona uso ua oti.’
8 E ao i toeaina o lona aai ona aami o ia ma talanoa atu iā te ia, ma e ao ona ia tū ma faapea mai, ‘Ou te lē manaʻo e fai avā iā te ia.’+
9 Ona faalatalata atu lea o le toʻalua o lona uso ua oti iā te ia i luma o toeaina, ma tatala ese le seevae mai i le vae o le tamāloa+ ma feanu i ona foliga+ ma faapea atu, ‘O le mea lenā e fai i le tagata e musu e faaauau le gafa o le aiga o lona uso.’+
10 Ona taʻua lea o lona igoa i Isaraelu, ‘O le aiga o lē na tatalaina ese lona seevae.’
11 “Afai e fufusu ni tamāloloa o le tasi ma le isi, e alu atu le avā a se tasi e laveaʻi i lona toʻalua mai i le lima o lē ua tuʻi iā te ia, ua ia tuu atu lona lima ma tago atu i totogasā+ o le isi tamāloa,
12 e ao ona e tipi ese lona tapulima. Aua neʻi e vaai alofa iā te ia.+
13 “Aua neʻi iai i totonu o lau ato ni fua eseese se lua e fua ai mea,+ o le fua telē ma le fua laʻitiiti.
14 Aua neʻi iai i lou fale ni fua eseese se lua o le efa,+ o le fua telē ma le fua laʻitiiti.
15 E ao pea ona iai iā te oe se fua e saʻo ma tonu e fua ai mea. E ao pea foʻi ona iai iā te oe le fua o le efa e saʻo ma tonu, ina ia faaumiumi ai ou aso i le laueleele o le a tuuina mai e Ieova lou Atua iā te oe.+
16 Auā o i latou uma ua faia ia mea, o i latou uma ua faia le mea lē tonu, o mea ia e inosia e Ieova lou Atua.+
17 “E ao ona manatua le mea na faia e Amaleka iā te oe i le ala ina ua outou ō ese mai i Aikupito,+
18 ina ua ia faafetaui iā te oe i le ala ma osofaʻia oe mai i ou tua o ē uma ia na vaivai ma mulimuli mai iā te oe, a o e lē lavā ma lailoa; ma na lē mataʻu o ia i le Atua.+
19 Pe a oo ina tuuina mai e Ieova lou Atua iā te oe, le mapusaga mai i ou fili uma, o ē e siʻomia oe i le laueleele e tuuina mai e Ieova lou Atua iā te oe e fai ma ou tofi,+ ina ia fai mo oe, e ao ona e soloiesea le toe taʻua o Amaleka mai i lalo o le lagi.+ Aua lava neʻi galo iā te oe.
Faamatalaga Pito i Lalo
^ O le ituaiga o faaipoipoga lea e faaipoipo ai se tane i le avā a lona uso ua oti ae leai sana fanau, ina ia faaauau ai le gafa o lona uso.
