Teuteronome 29:1-29
29 O upu nei o le feagaiga na poloaʻi mai ai Ieova iā Mose ia osia ma le fanauga a Isaraelu i le atunuu o Moapi, e ese mai i le feagaiga na ia osia ma i latou i Horepa.+
2 Ua aami e Mose Isaraelu uma ma faapea atu iā i latou: “O outou na, na vāai i mea uma na faia e Ieova i o outou luma, i le atunuu o Aikupito iā Farao ma ana auauna uma atoa ma lona atunuu uma,+
3 o tofotofoga tetele na outou vāai i ai,+ o faailoga+ ma vavega tetele.+
4 Ae e leʻi tuuina mai e Ieova iā te outou se loto e iloa ai mea ma mata e vaai ai, ma taliga e faalogo ai, ua oo mai lava i le aso nei.+
5 ‘A o oʻu taʻitaʻia outou i tausaga e fā sefulu i le toafa,+ e leʻi pala o outou ofu na oofu ai, e leʻi pala foʻi o outou seevae na see i o outou vae.+
6 E tou te leʻi aai i se falaoa,+ e tou te leʻi feinu foʻi i se uaina po o se isi lava ʻava malosi, ina ia outou iloa ai, o aʻu o Ieova o lo outou Atua.’
7 Mulimuli ane na outou ō mai i lenei mea, ona ō mai lea o Sekono le tupu o Hesepona+ ma Oko+ le tupu o Vasana e siitaua mai iā i tatou, ae na tatou faatoʻilaloina i latou.+
8 Ona tatou avea lea o o latou laueleele ma avatu e fai ma tofi o le ituaiga o Reupena, ma le ituaiga o Kato ma le ʻafa o le ituaiga o Manase.+
9 Ia outou tausia ma faia upu o lenei feagaiga, ina ia sologa lelei ai mea uma e tou te faia.+
10 “O outou uma o loo tutū i luma o Ieova lo outou Atua i le asō, o ulu o outou ituaiga, o o outou toeaina ma o o outou leoleo, o tane uma o Isaraelu,+
11 o a outou fanau, o a outou avā,+ ma le tagata ese e aumau+ iā te oe i lau togālauapi, mai i le tagata e fai au fafie e oo i le tagata e asuina ou vai,+
12 ina ia e ulu atu i le feagaiga+ a Ieova lou Atua ma lana tautoga, lea ua osia e Ieova lou Atua ma oe i le asō;+
13 ina ia faatumauina oe i lenei aso e fai ma ona nuu,+ ma ia avea foʻi o ia ma ou Atua,+ e pei ona ia folafola mai iā te oe ma e pei foʻi ona ia tautō ai i ou augātamā o Aperaamo,+ o Isaako+ ma Iakopo.+
14 “E lē na o outou ua ou osia ai lenei feagaiga ma lenei tautoga,+
15 ae atoa ma ē o loo tutū i inei ma i tatou i le asō i luma o Ieova lo tatou Atua, ma i latou foʻi e lē o faatasi ma i tatou i le asō;+
16 (auā ua outou iloa lelei na tatou nonofo i le atunuu o Aikupito ma na tatou ui mai i nuu ia na outou ui ane ai.+
17 Na masani ona outou vāai i a latou mea inosia, ma a latou tupua inosia+ na faia i laau ma maa, ma siliva ma auro, na iai iā i latou;)
18 ina ia leai ai se isi mai iā te outou, o se tamāloa po o se fafine, o se aiga po o se ituaiga, e liliuese lona loto mai iā Ieova lo tatou Atua i le aso nei ma alu atu e auauna i atua o na nuu;+ ina ia lē maua ai mai iā te outou se aa e tupu mai ai fua o le laau e oti ai ma se laau oona.+
19 “Afai e faalogo se tasi i upu o lenei tautoga,+ ma ua ia faamanuia iā te ia i lona loto, e faapea, ‘Ou te maua le filemu+ e ui lava ou te savali i loʻu lotomaaa,’+ ma le faanaunauga e faaumatia tagata uma e pei o le tafiesea o le eleele susū faatasi ma le eleele mātūtū,
20 e lē finagalo Ieova e faamagalo o ia,+ ae o le a oo mai e pei o se afi le toʻasā o Ieova+ ma lona fuā+ i lea tamāloa,+ ma o le a oo iā te ia o mala uma ua tusia i lenei tusi,+ e aveesea foʻi e Ieova lona igoa mai i lalo o le lagi.
21 E vavaeese+ e Ieova o ia mai i ituaiga uma o Isaraelu ina ia oo i ai mala, e tusa ma mala uma o le feagaiga ua tusia i lenei tusi o le tulafono.
22 “A o le tupulaga o loo fai mai, o o outou atalii o ē o le a tutū mai pe a mavae atu outou, o le a faapea mai, atoa ma le tagata ese ua sau mai i se atunuu mamao, pe a latou vāai i mala ma tulaga leaga o le laueleele o le a faaoo mai i ai e Ieova,+
23 o le teiō, o le masima+ ma le mū,+ o le a lē totō ai se mea i le laueleele atoa, e lē ola ai se mea, pe tutupu aʻe ai ni laau, e pei ona faaumatia o Sotoma ma Komoro,+ o Atama+ ma Sepoiima,+ ia na faaumatia e Ieova i lona toʻasā ma lona toʻatamaʻi;+
24 e faapea ane lava o nuu uma, ‘Aiseā na faia ai faapena e Ieova i lenei atunuu?+ Aiseā na aasa tele ai lenei toʻasā?’
25 Ona latou faapea lea, ‘Na tupu na mea talu ai ua latou tuulafoaʻia le feagaiga+ a Ieova le Atua o o latou augātamā, lea na osia ma i latou ina ua ia aumaia i latou mai i le atunuu o Aikupito.+
26 Na latou ō ma auauna i isi atua ma ifo atu i ai iā i latou, o ni atua na latou lē iloa muamua ma e na te leʻi faatagaina i latou e tapuaʻi i ai.+
27 Ona oo mai lea o le toʻasā o Ieova i le atunuu, e ala i le aumaia i o latou luga o malaia uma ua tusia i lenei tusi.+
28 O lea na liaʻieseina ai e Ieova i latou mai i o latou laueleele i lona toʻasā+ ma lona toʻatamaʻi, ma lona lē finagalo malie ma na tiaʻi i latou i se isi atunuu e pei ona iai i lenei aso.’+
29 “O mea ua lilo,+ e iā Ieova lo tatou Atua ia, a o mea ua faaalia,+ e iā i tatou ma o tatou atalii mo se taimi umi, ina ia tatou tausia upu uma o lenei tulafono.+
