Teuteronome 31:1-30
31 Ona alu atu lea o Mose ma fai atu nei upu iā Isaraelu uma
2 ma faapea atu iā i latou: “I nei aso, ua selau lua sefulu oʻu tausaga.+ E lē toe faatagaina aʻu e alu atu ma toe sau foʻi,+ e pei ona fetalai mai ai Ieova iā te aʻu, ‘E te lē sopoʻia atu lenei Ioritana.’+
3 O le a sopoʻia muamua atu e Ieova lou Atua iā te oe.+ O ia lava e na te faaumatia ia nuu uma mai i ou luma, e ao ona e tuliesea i latou.+ E muamua ona sopoʻia atu Iosua iā te oe,+ e pei ona fetalai mai ai Ieova.
4 O le a faia e Ieova iā i latou e pei ona ia faia iā Sekono+ ma Oko,+ o tupu o tagata Amorī, atoa ma lo laʻua laueleele ina ua ia faaumatia i laʻua.+
5 E tuuina mai foʻi e Ieova i latou iā te outou,+ ma e ao ona outou faia iā i latou e tusa ma poloaʻiga uma ua ou poloaʻi atu ai iā te outou.+
6 Ia outou lototetele ma faamalolosi.+ Aua e te fefe pe mataʻu iā i latou,+ auā e savali Ieova lou Atua faatasi ma oe. Na te lē tuua oe, na te lē tuulafoaʻi lava iā te oe.”+
7 Ona aami lea e Mose o Iosua ma faapea atu iā te ia i luma o Isaraelu uma: “Ia e lototele ma faamalosi,+ auā o oe, o le a e avatua lenei nuu i le laueleele na tautō ai Ieova i o latou augātamā e avatu iā i latou, ma o oe lava o le a e avatua lea laueleele iā i latou e fai ma o latou tofi.+
8 O Ieova o ia lea o loo savali muamua atu iā te oe. E faatasi pea o ia ma oe.+ Na te lē tuua oe, na te lē tuulafoaʻi lava iā te oe. Aua e te fefe pe mataʻu.”+
9 Ona tusia lea e Mose o lenei tulafono+ ma avatu i ositaulaga, o atalii o Levi,+ o ē e amoina le atolaau o le feagaiga a Ieova,+ atoa foʻi ma toeaina uma o Isaraelu.
10 Ona poloaʻi atu lea o Mose iā i latou e faapea: “O faaiʻuga o tausaga uma e fitu, i le taimi atofaina o le tausaga o le faasaʻolotoga,+ i le tausamiga o fale lauvao,+
11 pe a ō mai Isaraelu uma e vāai i fofoga o Ieova+ lou Atua i le nofoaga o le a ia filifilia,+ ia e faitau lenei tulafono i luma o Isaraelu uma a o latou faalogo mai.+
12 Ia faapotopoto le nuu,+ o tane, o fafine, o fanau iti ma le tagata ese e aumau iā te oe i ou aai, ina ia latou faalogo ma latou aʻoaʻo ai,+ auā e ao ona latou matataʻu iā Ieova lo outou Atua,+ ma ia toʻaʻaga e tausia upu uma o lenei tulafono.
13 O o latou atalii o ē e leʻi iloa muamua ia aʻoaʻoga, e ao ona latou faalogo+ ma aʻoaʻoina ia matataʻu iā Ieova lo outou Atua i aso uma e tou te ola ai i le laueleele, lea tou te sopoʻia atu ai Ioritana e fai mo outou.”+
14 Mulimuli ane ona fetalai mai lea o Ieova iā Mose: “Vaai oe! ua lata mai aso e te oti ai.+ Ia aami iā Iosua, ma ia oulua tutū i le faleʻie o le feiloaʻiga, ina ia ou faatonuina o ia e avea ma taʻitaʻi.”+ Ona ō lea o Mose ma Iosua ma tutū i le faleʻie o le feiloaʻiga.+
15 Ona faaali mai lea o Ieova i se ao faaniutū i luga o le faleʻie, ma ua tū ai le ao faaniutū i tala ane o le faitotoʻa o le faleʻie.+
16 Ona fetalai mai lea o Ieova iā Mose: “Vaai! O le a e taoto faatasi ma ou augātamā;+ ae o le a tulaʻi lenei nuu+ ma faitaaga ma atua ese o le atunuu lea latou te ō atu i ai,+ i totonu o i latou, ma latou te tuulafoaʻia aʻu+ ma solia laʻu feagaiga na ou osia ma i latou.+
17 Ona ou matuā ita ai lea iā i latou i lenā aso,+ ma ou tuulafoaʻia i latou+ ma natia oʻu mata mai iā i latou,+ ma e avea i latou o se mea e faaumatia; e oo foʻi iā i latou o mala ma puapuaga e tele,+ ma e latou te faapea mai i lenā aso, ‘Pe e lē ua oo mai ea ia mala iā i tatou ona ua lē faatasi mai lo tatou Atua ma i tatou?’+
18 A o aʻu, ou te matuā natia oʻu mata i lenā aso ona o mea leaga uma latou te faia, auā ua latou liliu atu i isi atua.+
19 “Ia oulua tusia lenei pese+ ma aʻoaʻo ai i le fanauga a Isaraelu.+ Ia tuu i o latou gutu ina ia fai ai lea pese ma aʻu molimau faasaga i le fanauga a Isaraelu.+
20 Auā ou te aumaia i latou i le laueleele na ou tautō ai i o latou augātamā,+ o le laueleele e tafe ai le suāsusu ma le meli,+ e latou te aai+ ma maoona ai, e tamaoaiga ai,*+ ma latou liliu atu i isi atua,+ e latou te auauna foʻi i na atua ma lē ava mai ai iā te aʻu ma solia laʻu feagaiga.+
21 Pe a oo iā i latou le tele o mala ma puapuaga,+ ona fai lea o lenei pese ma molimau iā i latou, auā e lē tatau ona galo mai i gutu o a latou fanau, ona ua ou iloa lelei o latou faanaunauga+ ua latou atiaʻe i lenei taimi, ae ou te leʻi avatua i latou i le laueleele na ou tautō atu ai.”
22 Ona tusia lea e Mose o lenei pese i lenā aso, ina ia aʻoaʻo atu ai i le fanauga a Isaraelu.+
23 Ua faatonuina e le Atua o Iosua le atalii o Nuno+ e fai ma taʻitaʻi ma fetalai mai: “Ia lototele ma faamalosi,+ auā o oe o le a e avatua le fanauga a Isaraelu i le laueleele na ou tautō ai iā i latou,+ ma ou te faatasi pea ma oe.”
24 Ua uma foʻi ona tusia e Mose o upu o lenei tulafono i se tusi seʻia oo ina māeʻa lelei,+
25 ona poloaʻi atu lea o Mose i le ʻau sa Levī, o ē e amoina le atolaau o le feagaiga a Ieova+ e faapea:
26 “Ia ave lenei tusi o le tulafono,+ ma ia outou tuu i autafa o le atolaau+ o le feagaiga a Ieova lo outou Atua, ia fai ma molimau faasaga iā te outou.+
27 Auā o aʻu, ou te iloa lelei lou fouvale+ ma lou faauamaaa.+ Pe afai na outou gaoioi ma le fouvale iā Ieova+ a o oʻu ola pea faatasi ma outou i le asō, o le a sili atu ona outou faia pe a ou oti!
28 Ia faapotopoto mai iā te aʻu o toeaina uma o o outou ituaiga ma o outou leoleo,+ seʻi oʻu tautala atu iā i latou i ia upu a o latou faalogo mai, ma seʻi oʻu faia le lagi ma le lalolagi e fai ma molimau faasaga iā i latou.+
29 Auā ua ou iloa lelei pe a mavae loʻu oti, o le a outou matuā gaoioi ma le leaga,+ e tou te liliuese foʻi mai i le ala na ou poloaʻi atu ai iā te outou; e oo mai foʻi mala+ iā te outou i le lumanaʻi, auā o le a outou faia le mea e leaga i le silafaga a Ieova, ma faatigā ai lona finagalo ona o galuega a o outou lima.”+
30 Ona tautala atu lea o Mose a o faalogologo mai le faapotopotoga uma o Isaraelu i upu o lenei pese seʻia oo ina māeʻa:+
Faamatalaga Pito i Lalo
^ I le gagana Eperu, “ia puputa ai.”
