Teuteronome 7:1-26
7 “Pe a oo ina ave oe e Ieova lou Atua i le laueleele lea o le a e alu atu i ai ma fai mo oe,+ e na te aveesea foʻi nuu e matuā toʻatele ona tagata mai i ou luma,+ o tagata Hetī,+ o tagata Kirekasē,+ o tagata Amorī,+ o tagata Kanana,+ o tagata Perisē,+ o tagata Hivī,+ ma tagata Iepusē,+ o nuu ia e fitu e sili atu ona toʻatele ona tagata ma malolosi nai lo o oe.+
2 E tuuina mai i latou e Ieova lou Atua iā te oe ma e ao ona e faatoʻilaloina i latou.+ E te matuā faaumatia lava i latou.+ Aua e te osia se feagaiga ma i latou aua foʻi e te agalelei atu iā i latou.+
3 Aua tou te faaipoipo atu iā i latou. Aua e te avatu lou afafine ma lona atalii, aua foʻi e te aumaia lona afafine ma lou atalii.+
4 Auā latou te faaliliuina o outou atalii mai i le mulimuli atu i le Atua, ma latou auauna atu foʻi i isi atua;+ ona matuā toʻasā ai lea o Ieova iā te outou, ma ia faaumatia ai loa outou.+
5 “Ae o le mea nei e ao ona outou faia iā i latou: E ao ona outou tala i lalo a latou fata faitaulaga,+ e ao foʻi ona outou gausia a latou poutū paia,+ o a latou pou paia+ ia outou talepe i lalo,+ ma e ao ona outou susunu i le afi a latou tupua ua tā.+
6 Auā o oe o le nuu paia iā Ieova lou Atua.+ O oe na filifilia e Ieova lou Atua e fai ma ona nuu, o le oloa tāua mai i tagata uma i le fogāeleele.+
7 “E lē ona o outou o le nuu e sili ona toʻatele i lo o isi nuu, na ala ai ona alofa Ieova iā te outou i lona filifilia o outou,+ auā e toʻaitiiti lava outou mai i nuu uma.+
8 Ae ona o le alofa o Ieova iā te outou,+ ma lona tausia o lana tautoga lea na ia tautō ai i o outou augātamā,+ na aumai ai outou e Ieova i le aao malosi,+ ina ia laveaʻiina outou mai i le mea sa nofo pologa ai,+ mai i le lima o Farao le tupu o Aikupito.
9 Ua e iloa lelei o Ieova lou Atua o le Atua moni,+ o le Atua faamaoni,+ e tausi i feagaiga+ ma e faaalia le alofa faamaoni i ē e alolofa iā te ia, ma tausia ana poloaʻiga i le faitau afe o tupulaga,+
10 ae e tauia e ia o lē e ʻinoʻino iā te ia i ona lava luma e ala i le faaumatiaina o ia.+ E lē faatalatū o ia i lē e ʻinoʻino iā te ia; ae e na te taui atu iā te ia i ona lava luma.
11 E ao ona e tausia poloaʻiga, o tulafono ma iʻuga o faamasinoga ua ou poloaʻi atu ai iā te oe i le asō e ala i le faia o ia mea.+
12 “O le mea e tupu, pe a outou faalogo pea i nei iʻuga o faamasinoga, ma outou tausia ma faia,+ o le a tausia la e Ieova lou Atua le feagaiga ma oe,+ ma faaalia le alofa faamaoni lea na ia tautō ai i ou augātamā.+
13 E alofa foʻi o ia ma faamanuia iā te oe,+ e faatoʻateleina ai oe,+ e faamanuia foʻi i lau fanau,*+ ma fua o lou fanua,+ o au fatu, o lau uaina fou ma lau suāuu, o au tamaʻi povi ma le fanau a lau lafu,+ i le eleele na ia tautō ai i ou augātamā e avatu iā te oe.+
14 O le a sili ona faamanuiaina oe i tagata uma.+ E lē maua iā te oe se tane po o se fafine e leai sana fanau, e oo lava i au manu lalata.+
15 E aveesea e Ieova mai iā te oe o maʻi uma; ma e na te lē faaoo atu iā te oe o maʻi leaga o Aikupito lea na e iloa,+ ae na te faaoo atu i ē ua ʻinoʻino iā te oe.
16 E ao foʻi ona e faaumatia nuu uma ia e tuuina atu e Ieova lou Atua iā te oe.+ Aua e te alofa iā i latou;+ aua foʻi neʻi e auauna i o latou atua,+ auā e fai ia mea ma mailei iā te oe.+
17 “Afai ua e faapea ifo i lou loto, ‘E sili ona toʻatele tagata o ia nuu nai lo o aʻu. E faapefea ona mafai ona ou tuliesea i latou?’+
18 aua e te fefe iā i latou.+ Ia e matuā manatua le mea na faia e Ieova lou Atua iā Farao ma Aikupito uma,+
19 o tofotofoga tetele na vaai i ai ou mata,+ o faailoga, o vavega,+ o le aao malosi+ ma le aao faaloaloa+ lea na aveese ai outou e Ieova lou Atua.+ O le auala foʻi lea o le a faia e Ieova lou Atua i nuu uma ia e te fefe i ai.+
20 E faatupuina e Ieova lou Atua le atuatuvale iā i latou,+ seʻia faaumatia ē o totoe+ ma ē o lalafi i ou luma.
21 Aua neʻi e popolevale ona o i latou, auā o loo faatasi Ieova lou Atua ma oe,+ o le Atua silisili ma le mataʻutia.+
22 “E auauaʻi ona tuliesea e Ieova lou Atua ia nuu mai i ou luma.+ E lē faatagaina ona e vave faaumatia i latou, neʻi faatoʻateleina o manufeʻai o le fanua ma faalavelave iā te oe.
23 E tuuina atu i latou e Ieova lou Atua iā te oe, ma faamalosia i latou e tuumuli ma le fenuminumiaʻi seʻia oo ina faaumatia i latou.+
24 E na te tuuina mai foʻi o latou tupu i lou lima,+ e ao ona e soloiesea o latou igoa mai i lalo o le lagi.+ E leai se tasi e tū mausalī e tetee mai iā te oe,+ seʻia oo ina e faaumatia i latou uma.+
25 Ia outou susunu o latou tupua ua tā i le afi.+ Aua e te manaʻo i le siliva ma le auro o ia mea,+ pe ave foʻi mo oe,+ neʻi maileia ai oe;+ auā o se mea lea e inosia e Ieova lou Atua.+
26 Aua foʻi e te aumaia se mea inosia i lou fale, ma avea oe ma sē e ao ona faaumatia e pei o lea mea. Ia e matuā ʻinoʻino i ai ma matuā ita foʻi i ai,+ auā o se mea lea e ao ona faaumatia.+
Faamatalaga Pito i Lalo
^ I le gagana Eperu, “o fua o lou manava.”
