E manatu nisi o le taumafai e faaliliu saʻo i le upu i le upu o le a fesoasoani i le tagata faitau, ina ia maua tonu le manatu na tusia i uluaʻi gagana. Peitaʻi, e lē o le mea lenā e masani ona tupu. Seʻi manatu i nisi nei o māfuaaga:

• E lē mafai ona tutusa le kalama, upu, ma le faatulagaga o fuaiupu o ni gagana se lua. Na faapea mai S. R. Driver, o se polofesa o le gagana Eperu, o le tele o gagana “e eseese, e lē gata i le kalama ma upu faavae, ae . . . faapea foʻi le auala e tuufaatasi ai manatu ina ia maua ai se fuaiupu.” E eseese auala e mafaufau ai tagata e eseese gagana e tautatala ai. Na faaauau ona faapea mai le polofesa o Driver, “O lona uiga la, e lē tutusa le auala e faatulaga ai fuaiupu i le tele o gagana.”

• E leai se gagana i aso nei e tutusa lona kalama ma ona faaupuga ma le Tusi Paia Eperu, Arama, ma le Eleni. O lea, o le a lē manino pe sesē foʻi le uiga o le manatu pe a faaliliu le Tusi Paia i le upu i le upu.

• E ono sui le uiga o se upu po o se faaupuga e fua i le siʻomaga o loo faaaogā ai.

E iai isi mau e mafai ona faia ai se faaliliuga e faaliliu saʻo i le upu i le upu, ae e tatau ona faia ma le faaeteete.

O nisi nei o faaaʻoaʻoga o mau e mafai ona lē saʻo le manatu pe a faaliliu i le upu i le upu: 

• E faaaogā e le Tusi Paia faaupuga o le “moe” ma le “momoe” e faasino atu i le moe pe a mālōlō, po o le moe i le oti. (Mataio 28:13; Ioane 11:11) Pe a faatatau atu nei faaupuga i le oti, e mafai ona faaaogā e tagata faaliliu o le Tusi Paia faaupuga e pei o le “oti,” “momoe i le oti,” po o le “maliliu,” ina ia lē fenuminumiaʻi ai le tagata faitau.—1 Korinito 7:39; 1 Tesalonia 4:13; 2 Peteru 3:4.

• Na faaaogā e le aposetolo o Paulo se faaupuga i le Efeso 4:14, lea e mafai ona faaliliu saʻo i le upu i le upu, o le “taaalo i le maa taisi a tagata.” O lenā faaupuga anamua sa faatatau atu i le faasesēina o isi a o faaaogāina se maa taisi. I le tele o gagana, e lē malamalama tagata pe a faaliliu i le upu i le upu. E sili atu ona manino le faaupuga lenei pe a faaliliuina “togafiti a tagata,” ma o lona uiga moni lenā.

• I le Roma 12:11, o loo faaaogā ai se faaupuga Eleni o lona uiga moni “ia pupuna le agaga.” O lenā faaupuga e lē o maua ai le uiga moni i le gagana Samoa, o lea ua faaliliuina ai “ia maelega i la le agaga.”

• I le lauga taʻutaʻua a Iesu i luga o le mauga, na ia faaaogā ai se faaupuga e masani ona faaliliuina “Amuia ē matitiva i le agaga.” (Mataio 5:3, Tusi Paia Samoa—Lomiga 1969) Ae i le tele o gagana, e lē manino le uiga o lenei faaupuga pe a faaliliu i le upu i le upu. I nisi gagana, pe a faaliliuina saʻo faapena le “matitiva i le agaga,” e ono uiga atu i le lē sagatonu o le mafaufau po o le leai o se faanaunauga e faia se mea. Peitaʻi, sa aʻoaʻo e Iesu tagata e lē faalagolago lo latou fiafia i le faamalieina o o latou manaʻoga faaletino, ae ia amanaʻia e latou te manaʻomia le taʻitaʻiga a le Atua. (Luka 6:20) O lea, o le faaliliuga e pei “o ē e manatu mamafa i o latou manaʻoga faaleagaga” po o “ē e latou te amanaʻia e latou te manaʻomia le Atua,” e maua tonu ai le uiga o le manatu i le uluaʻi gagana.—Mataio 5:3; The New Testament in Modern English.

• I le tele o mau, o le upu Eperu ua faaliliuina i le “fuā,” e talitutusa ma le uiga masani o le upu Samoa, o le ita lea pe a lē faamaoni sē e vavalalata i ai, po o le lotoleaga i meafaitino a isi. (Faataoto 6:34; Isaia 11:13) Peitaʻi, e iai se uiga lelei o le upu lava lenei i le gagana Eperu. O se faataʻitaʻiga, e mafai ona  faatatau atu i le “maelega,” po o le naunau o Ieova ina ia puipuia ana auauna, po o lona maumauaʻi foʻi e “tapuaʻi atu tau lava o ia.” (Esoto 34:14; 2 Tupu 19:31; Esekielu 5:13; Sakaria 8:2) E mafai foʻi ona faasino atu i le “maelega” o ana auauna mo le Atua ma le tapuaʻiga iā te ia, po o lo latou ‘lē lagolagoina o le lē faamaoni’ iā te Ia.—Salamo 69:9; 119:139; Numera 25:11.

• E tele uiga eseese o le upu Eperu lea e masani ona faasino atu i le lima o le tagata. E fua i le siʻomaga, e mafai ona faaliliuina lenei upu i le “pule,” “limafoaʻi,” po o le “malosi.” (2 Samuelu 8:3; 1 Tupu 10:13; Faataoto 18:21) O le mea moni, e tele auala ua faaliliuina ai lenei upu i le Tusi Paia—O le Faaliliuga a le Lalolagi Fou.

Pe a fua la i nei māfuaaga, o le faaliliuga o le Tusi Paia e lē tau ina faaliliu saʻo upu mai i uluaʻi gagana i taimi uma o loo faaaogā ai. E tatau i le tagata faaliliu ona faaaogā le faautaga loloto e filifili ai upu i lana gagana, ia e maua tonu ai manatu i uluaʻi gagana. E lē gata i lea, e manaʻomia foʻi ona faatulaga fuaiupu e ōgatusa ma tulafono o le kalama i lana gagana, ina ia faigofie ai ona faitau.

I le taimi e tasi, e tatau ona ʻalofia le soona toe faaupu o le faaliliuina o mau. Pe afai e soona toe faaupu e se tagata faaliliu se mau e tusa ai ma lona malamalamaga i le uiga o le mau, e ono suia ai le uiga o le manatu. E faapefea? E ono sesē ona ia tuuina i ai se manatu e tusa ai ma lona malamalamaga i le uiga o se uluaʻi tusitusiga, pe aveesea foʻi nisi o faamatalaga tāua o loo iai i uluaʻi tusitusiga. E ui lava la e faigofie ona faitau faaliliuga o le Tusi Paia ia e toe faaupu manatu, ae e ono lē maua ai e le tagata faitau le uiga moni o le feʻau.

E mafai ona aafia se faaliliuga ona o talitonuga faalelotu o se tagata faaliliu. O se faataʻitaʻiga, o loo taʻua i le Mataio 7:13: “E . . . lautele le auala e tau atu i le faaumatiaga.” O nisi o tagata faaliliu ua latou faaaogāina le faaupuga “afi i seoli” ona ua aafia i o latou talitonuga faalelotu, nai lo o le faaaogāina o le upu Eleni lea e uiga atu i le “faaumatiaga.”

E tatau foʻi ona manatua e se tagata faaliliu o le Tusi Paia, na tusia le Tusi Paia i le gagana e masani ona tautatala ai i aso uma tagata  lautele, e pei o le ʻaufaifaatoʻaga, o leoleo mamoe, ma le ʻaufaifaiva. (Neemia 8:8, 12; Galuega 4:13) O lea, o se faaliliuga lelei o le Tusi Paia e tatau ona malamalama ai tagata lotofaamaoni i le feʻau, e tusa lava po o ā o latou tulaga. E sili atu faaupuga e manino, taatele, ma malamalamagofie, nai lo o faaupuga e seāseā faaaogā e tagata lautele.

E toʻatele tagata faaliliu ua latou aveesea e aunoa ma ni māfuaaga tatau le suafa o le Atua o Ieova mai i faaliliuga i aso nei, e ui lava o loo iai lenā suafa i manusikulipi anamua o le Tusi Paia. (Tagaʻi i le Faaopoopoga A4.) O le tele o faaliliuga ua latou suia lenā suafa i taʻu e pei o “le Alii,” ma o nisi ua latou natia le mea moni e iai le suafa o le Atua. O se faataʻitaʻiga, i nisi o Tusi Paia, ua faaliliuina le tatalo a Iesu i le Ioane 17:26 e faapea: “Ua ou faailoa atu oe iā i latou,” ma le Ioane 17:6, “Ua ou faailoa atu oe i tagata ua e foaʻi mai iā te aʻu.” Peitaʻi, o le faaliliuga saʻo lenei o le tatalo a Iesu: “Ua ou faailoa atu lou suafa iā i latou,” ma le “Ua ou faailoa atu lou suafa i tagata ua e foaʻi mai iā te aʻu.”

E pei ona taʻua i upu tomua o le uluaʻi lomiga i le faa-Peretania O le Faaliliuga a le Lalolagi Fou: “E matou te lē toe faaupuina le faaliliuina o mau o le Tusi Paia. O loo matou taumafai e faaliliu i le upu i le upu i le tele e mafai ai, pe afai e lē natia pe suia ai le uiga o le manatu.” O lea, na taumafai malosi ai le Komiti o le Faaliliuga o le Tusi Paia o le Lalolagi Fou ia paleni le faaaogāina o faaupuga, ina ia maua tonu ai le uiga o uluaʻi tusitusiga, ae i le taimi e tasi ia ʻalofia faaupuga e salaese i le faalogo, pe natia ai le uiga moni o le feʻau. O le iʻuga, ua faigofie ai i tagata ona faitau i le Tusi Paia, ma mautinoa atoatoa e faamaoni le faaliliuina o feʻau mai i le Atua.—1 Tesalonia 2:13.