O le Tusi Muamua i le Faapotopotoga i Korinito 1:1-31
1 O aʻu o Paulo, na valaauina i le finagalo o le Atua e fai ma aposetolo+ a Keriso Iesu, atoa ma Sosene lo tatou uso,
2 o le tusi lenei i le faapotopotoga a le Atua i Korinito,+ e mo outou ua faapaiaina ma ua autasi ma Keriso Iesu,+ ua valaauina e fai ma ʻaupaia, faatasi ai ma i latou uma o loo valaau i le suafa o lo tatou Alii o Iesu Keriso+ i nofoaga uma, o lo latou Alii ma o lo tatou Alii foʻi:
3 Tau ina ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso.
4 Ou te faafetai pea i loʻu Atua mo outou ona o le agalelei faifua o le Atua ua foaʻiina atu iā te outou, e ala iā Keriso Iesu;
5 auā ua faatamaoaigaina ai outou i mea uma ona o ia, ma ua mafai ai ona folafola atu le upu ma le poto uma,+
6 e pei ona mausalī iā te outou le molimau iā Keriso,+
7 ina ia lē matitiva ai outou i se meaalofa e tasi, a o outou faatalitali ma le naunau atu i le faaaliga o lo tatou Alii o Iesu Keriso.+
8 E faatumauina foʻi outou e le Atua seʻia oo i le iʻuga, ina ia lē taʻusalaina ai outou i le aso o lo tatou Alii o Iesu Keriso.+
9 E faamaoni le Atua,+ o lē na valaauina outou ina ia mafuta faatasi ma lona Alo o Iesu Keriso lo tatou Alii.
10 Uso e, ou te apoapoaʻi atu iā te outou i le suafa o lo tatou Alii o Iesu Keriso, ia outou autasi i a outou upu, ma ia leai ni fevaevaeaʻiga iā te outou,+ ae ia autasi o outou manatu ma mafaufauga.+
11 Oʻu uso e, ua faailoa mai iā te aʻu e nisi o le aiga o Keloe, ua iai fefinauaʻiga iā te outou.
12 O lona uiga e taʻitasi outou ma faapea ane: “O aʻu o le soo o Paulo,” “O aʻu o le soo o Apolo,”+ “O aʻu o le soo o Kefa,”* “O aʻu o le soo o Keriso.”
13 Po ua fevaevaeaʻi ea le Keriso? Pe na tutuʻi ea Paulo i luga o le laau mo outou? Pe na papatisoina ea outou i le igoa o Paulo?
14 Ou te faafetai i le Atua ona ou te leʻi papatisoina se tasi o outou, ae e na o Kiripo+ ma Kaio,+
15 ina ia aua neʻi faapea mai se tasi, na papatisoina outou i loʻu igoa.
16 Ioe, na ou papatisoina foʻi le aiga o Setefana.+ Peitaʻi, ou te lē o manatuaina pe na ou papatisoina isi tagata.
17 E leʻi auina mai aʻu e Keriso ina ia faia ni papatisoga, ae ia folafola atu le tala lelei;+ e lē ma le atamai i upu, ina neʻi faalēaogāina le laau na faapuapuagatia ai* le Keriso.
18 Auā o le upu i le laau na faapuapuagatia ai,* o le mea valea lea iā i latou o le a faafanoina,+ a o le mana o le Atua+ iā i tatou o ē o le a faaolaina.
19 Auā ua tusia: “Ou te faaumatia le atamai o tagata atamamai, ma ou te teena le poto o ē e popoto.”+
20 O fea o iai le tagata atamai? O fea o iai le tusiupu?* O fea o iai le tagata fai manatu o lenei lalolagi? Pe e leʻi faia ea e le Atua le atamai o lenei lalolagi ma mea valea?
21 Auā o le atamai o le Atua, ua ia finagalo ai ia faaolaina o ē ua talitonu i le valea+ o le feʻau ua talaʻia, e ui ua lē iloa e le lalolagi le Atua+ i lo latou lava atamai.+
22 Na fia vāai tagata Iutaia i ni faailoga,+ ae na saʻili e tagata Eleni le atamai;
23 ae o lo tatou talaʻia o Keriso na tutuʻi i luga o le laau, ua avea ma mea e tausuai ai tagata Iutaia, ae o se mea valea lea i tagata o nuu ese.+
24 Peitaʻi, ua avea Keriso ma faaaliga o le mana ma le atamai o le Atua+ iā i latou ua valaauina, o tagata Iutaia atoa ma Eleni.
25 Auā o le mea valea a le Atua, e sili ona atamai nai lo o tagata, ma o le mea vaivai a le Atua, e sili ona malosi nai lo o tagata.+
26 Le ʻauuso e, ua outou iloa i lona valaauina o outou, e lē toʻatele ē e atamamai e tusa ai ma manatu o tagata,*+ e lē toʻatele ē e maualuluga, e lē toʻatele foʻi ni tamālii,+
27 ae ua filifilia e le Atua mea vālea a le lalolagi, ina ia faamāsiasi ai o ē e atamamai; ma ua filifilia foʻi e le Atua mea vaivai a le lalolagi, ina ia faamāsiasi ai o mea malolosi;+
28 ma ua filifilia e le Atua o mea faatauvaa a le lalolagi ma mea ua vaai maulalo i ai tagata, ma mea e lē tāua i tagata, ina ia faalēaogāina ai o mea e tāua i tagata,+
29 ina ia leai se tasi e mimitavale i le silafaga a le Atua.
30 Ae ona o ia, ua outou autasi ai ma Keriso Iesu, o lē ua avea ma atamai mai i le Atua iā i tatou, o le amiotonu+ foʻi ma le faapaiaina+ ma le faasaʻolotoina e ala i le togiola,+
31 ina ia faapei ona tusia: “O lē e mitamita, ia mitamita o ia iā Ieova.”*+
Faamatalaga Pito i Lalo
^ E igoa foʻi iā Peteru.
^ Tagaʻi i le Uiga o Upu.
^ Tagaʻi i le Uiga o Upu.
^ E faasino atu i se tagata e atamai i le Tulafono.
^ Ele., “atamamai i la le tino.”
