O le Tusi Muamua i le Faapotopotoga i Korinito 12:1-31
12 O lenei le ʻauuso e, ou te manaʻo ina ia outou iloa e faatatau i meaalofa faaleagaga.+
2 Ua outou iloa a o avea outou ma tagata o nuu ese,* na taaʻina outou ma taʻitaʻisesēina atu i tupua e lē tautatala,+ ma mulimuli atu i so o se mea e latou te taʻitaʻia i ai outou.
3 O lea la, ou te faailoa atu iā te outou, e leai se tasi e mafai ona faapea atu e ala i le agaga o le Atua: “Ua faamalaiaina Iesu!” ma e leai foʻi se tasi e mafai ona faapea atu: “O Iesu o le Alii!” seʻi vaganā ai e ala i le agaga paia.+
4 O lenei, e eseese meaalofa, a o le agaga lava e tasi;+
5 ma e eseese foʻi auaunaga,+ a o le Alii lava e tasi;
6 e eseese foʻi galuega e fai, peitaʻi o le Atua lava e tasi, o lē o loo faatinoina galuega uma i tagata uma.+
7 Ae o le faaaliga o le agaga, ua foaʻiina atu i tagata taʻitoʻatasi mo se fuafuaga aogā.+
8 Auā ua foaʻiina atu i le tasi le meaalofa e tautala ai ma le atamai, e ala i le agaga, a o le isi o le meaalofa e tautala ai ma le poto, e tusa ai ma lea lava agaga,
9 ae ua foaʻiina atu i le tasi le faatuatua+ e lea lava agaga, a o le isi o meaalofa e faamālōlō ai maʻi,+ e ala i le agaga lava lea e tasi,
10 ua foaʻiina atu foʻi i le tasi e faia galuega mamana,+ a o le isi e faia valoaga, o le isi ia iloa ai afioga mai i le Atua,+ a o le tasi e tautala ai i gagana eseese,+ ma le isi o le faamatalaina o gagana eseese.+
11 A o nei galuega uma, e faia e lea lava agaga, e na te tufatufaina atu i tagata taʻitoʻatasi e pei ona loto i ai.
12 E pei ona tasi le tino ae tele ona itutino, ma o itutino uma o lenā tino, e ui ina tele, ae tasi lava le tino,+ e faapena foʻi le Keriso.
13 Auā na papatisoina i tatou uma i le tino e tasi e le agaga e tasi, e tusa lava po o ni Iutaia po o ni Eleni, po o ni pologa po o ni ē e saʻoloto, ma na faainuina foʻi i tatou i le agaga e tasi.
14 Auā e lē tasi se itutino o le tino, ae e tele.+
15 Afai e faapea mai le vae: “Ona e lē o aʻu o le lima, e lē o aʻu la o se vaega o le tino,” e lē faapea ai la e lē o se vaega moni o le tino.
16 Afai foʻi e faapea mai le taliga: “Ona e lē o aʻu o le mata, e lē o aʻu la o se vaega o le tino,” e lē faapea ai la e lē o se vaega moni o le tino.
17 Afai o le tino atoa o le mata lea, e faapefea la ona faalogo? Afai o le tino atoa e faalogo ai, e faapefea la ona sogisogi?
18 Ae ua faatulaga e le Atua itutino taʻitasi o le tino, e pei ona ia finagalo i ai.
19 Ana faapea e tutusa uma itutino o le tino, po o se tino ea?
20 A o lenei, e ui ina tele itutino, ae e tasi lava le tino.
21 E lē mafai e le mata ona faapea ane i le lima: “E leai sou aogā iā te aʻu”; ma e lē mafai foʻi ona faapea ane le ulu i vae: “E leai so oulua aogā iā te aʻu.”
22 O le mea moni, e aogā foʻi i le tino itutino e foliga mai e vaivai,
23 ma o o tatou itutino ua manatu i ai e faalētāua, ua tatou faatāuaina,+ ma ua matagofie ai o tatou itutino faatauvaa,
24 peitaʻi e lē manaʻomia e o tatou itutino matagofie se mea. Ae e ui i lea, ua tuufaatasia e le Atua itutino o le tino, ma atili faatāuaina ai itutino ua faalētāua,
25 ina ia lē fevaevaeaʻi ai le tino, ae ia faapea ona fetausia‘i ona itutino.+
26 Afai e tigā se itutino e tasi, e tigā ai foʻi itutino uma;+ afai e faamamaluina se itutino e tasi, e olioli ai foʻi itutino uma.+
27 O lenei, o outou o le tino o Keriso,+ ma o tagata taʻitoʻatasi o se itutino o lona tino.+
28 Ua tofia foʻi e le Atua tagata eseese i le faapotopotoga: muamua o aposetolo;+ lona lua o perofeta;+ lona tolu o faiaʻoga;+ ona sosoo ai lea ma galuega mamana;+ o meaalofa o le faamālōlōina o maʻi;+ o galuega fesoasoani; o agavaa e faatonutonu ai;+ ma gagana eseese.+
29 Po o i latou uma ea o ni aposetolo? Po o i latou uma ea o ni perofeta? Po o i latou uma ea o ni faiaʻoga? Pe e faia uma ea e i latou ni galuega mamana?
30 Po ua maua ea e i latou uma meaalofa e faamālōlōina ai maʻi? Pe e tautatala ea i latou uma i gagana eseese?+ Po o i latou uma ea o ni faaliliu upu?*+
31 Ae ia outou naunau pea* i meaalofa e sili atu ona tāua.+ Peitaʻi, ou te faailoa atu iā te outou le auala silisili.+
Faamatalaga Pito i Lalo
^ E faasino atu i tagata lē talitonu.
^ Po o “tagata faaliliu.”
^ Po o le “saʻili pea ma le maelega.”
