O le Tusi Muamua i le Faapotopotoga i Korinito 13:1-13
-
Alofa—le auala silisili (1-13)
13 Afai ou te tautala i gagana a tagata atoa ma agelu ae e leai soʻu alofa, ua avea aʻu ma ʻapamemea taalili po o se sumepalo* paʻō leotele.
2 Afai foʻi ua iā te aʻu le meaalofa e fai ai valoaga, ma ua ou malamalama i mea lilo paia uma ma le poto uma lava,+ ma pe a iā te aʻu foʻi le faatuatua uma e siitia* ai mauga, ae e leai soʻu alofa, ua ou lē aogā.+
3 Afai foʻi ou te avatu aʻu mea uma e fafaga ai isi,+ ma afai ou te foaʻiina atu loʻu tino ia oti, ina ia ou mimita ai, ae e leai soʻu alofa,+ e leai se aogā iā te aʻu.
4 E onosaʻi*+ ma e agalelei+ le alofa.+ E lē lotoleaga+ le alofa, e lē gugutu, e lē faafefeteina,+
5 e lē amio matagā,*+ e lē saʻili mo lona lava lelei,+ e lē itaitagofie.+ E lē faitauina mea leaga* e fai atu iā te ia.+
6 E lē fiafia i le amiolētonu,+ ae e fiafia i le mea moni.
7 E onosaʻi i mea uma,+ e talitonu i mea uma,+ e faamoemoe i mea uma,+ e tumau i mea uma.+
8 E lē uma le alofa. Ae afai e iai meaalofa e fai ai valoaga, o le a faalēaogāina ia; afai e tautatala i gagana eseese,* o le a mavae ia; afai e iai le poto, o le a faalēaogāina lea.
9 Auā e lē atoatoa lo tatou poto,+ ma e lē atoatoa foʻi a tatou valoaga,
10 ae pe a taunuu mai le mea atoatoa, ona faalēaogāina lea o le mea e lē atoatoa.
11 A o oʻu laʻitiiti, sa ou tautala faatamaitiiti, mafaufau faatamaitiiti, ma manatunatu faatamaitiiti; a o lenei ua ou tagata matua, ua ou lē toe amio faatamaitiiti.
12 Auā i le taimi nei, o loo nenefu la tatou vaai i se faata ʻapamemea, ae o le a manino lava.* I le taimi nei, e lē atoa loʻu iloa, ae i le lumanaʻi, o le a ou iloa lelei* ai e pei ona iloa lelei ai aʻu e le Atua.
13 A o lenei, e tumau nei mea e tolu: o le faatuatua, o le faamoemoe, ma le alofa; a o le aupito sili o nei mea, o le alofa lea.+
Faamatalaga Pito i Lalo
^ O se meafaifaaili e lua mea lapotopoto e faafetoʻai ona lagona ai lea o le tatagi.
^ Po o le “aveesea.”
^ Po o le “faapalepale.”
^ Po o “mea sesē.”
^ Po o le “e lē amio lē mafaufau.”
^ E faasino atu i le tautatala faavavega i isi gagana.
^ Ele., “ae o le a tatou faafesagaʻi.”
^ Po o le “atoatoa.”
