O le Tusi Muamua i le Faapotopotoga i Korinito 14:1-40
14 Ia tausisi i le alofa, ae ia naunau pea* i meaalofa faaleagaga, aemaise lava i le faamatalaina atu o valoaga.+
2 Auā o lē e tautala i gagana eseese, ua lē tautala o ia i tagata a o le Atua, auā e leai se tasi e malamalama+ e ui lava ua tautala o ia i mea lilo paia+ e ala i le agaga.
3 Peitaʻi, o lē e faamatalaina valoaga, e na te atiaʻe, ma faalaeiau, ma faamāfanafana i tagata e ala i ana upu.
4 O lē e tautala i gagana eseese e atiaʻe ai o ia lava, a o lē e faamatala atu valoaga e atiaʻe ai le faapotopotoga.
5 Ou te manaʻo iā te outou uma ina ia tautatala i gagana eseese,+ ae e sili atu iā te aʻu lo outou faamatalaina o valoaga.+ O le mea moni, e sili lē e na te faamatalaina valoaga i lo o lē e tautala i gagana eseese, seʻi vaganā ua faamatalaina* ana upu, ina ia atiaʻe ai le faapotopotoga.
6 Uso e, afai ou te alu atu iā te outou i le taimi nei ma tautala atu iā te outou i gagana eseese, o le ā se aogā iā te outou seʻi vaganā ai ou te tautala atu i se faaaliga,+ po o le poto,+ po o se valoaga, po o se aʻoaʻoga?
7 E faapena foʻi le taalili mai o le leo o mea e leai ni ola, e pei o le fagufagu, po o le kitara.* Afai e lē fesuisuia‘i leo o na mea, e faapefea la ona iloa le fati o loo ilia i le fagufagu ma tāina i le kitara?
8 Auā afai e faalētonu le leo o le pū, o ai la se tasi e sauni e tau?
9 E faapena foʻi pe afai tou te faaaogā ni upu e lē malamalamagofie, pe faapefea la ona malamalama se tasi i upu ua fai atu? O le mea moni, ua outou tautala atu ae e leai se uiga.
10 E foliga mai e tele ituaiga o gagana eseese i le lalolagi, ae e tofu le gagana ma lona uiga.
11 Afai ou te lē malamalama i le uiga o le gagana, o aʻu la o le tagata e ese laʻu gagana i lē o loo tautala, ma o lē o loo tautala, o ia o le tagata e ese lana gagana iā te aʻu.
12 O outou foʻi, ona ua outou matuā naunau atu i meaalofa o le agaga, ia outou saʻili la e faatele na meaalofa ina ia atiaʻe ai le faapotopotoga.+
13 O lenei, o lē e tautala i gagana eseese, ia tatalo o ia ina ia mafai ona ia faamatalaina* ana upu.+
14 Auā afai ou te tatalo i gagana eseese, o laʻu meaalofa mai i le agaga o loo oʻu tatalo ai, peitaʻi e lē malamalama ai loʻu mafaufau.
15 O le ā la le mea e fai? Ou te tatalo ma le meaalofa mai i le agaga, ae ou te tatalo foʻi ma loʻu mafaufau. Ou te pese i viiga ma le meaalofa mai i le agaga, ae ou te pese foʻi i viiga ma loʻu mafaufau.
16 A lē faia faapea, afai e te ofo atu viiga ma le meaalofa o le agaga, e faapefea la i le tagata lautele o loo iai i inā ona faapea atu “Amene” i le faafetai ua e faia, pe a lē malamalama o ia i upu ua e fai atu ai?
17 E moni ua e avatu le faafetai i se auala lelei, ae e lē o atiaʻe ai le isi tagata.
18 Ou te faafetai i le Atua auā e tele atu gagana ua ou tautala ai nai lo o outou uma.
19 Peitaʻi, e sili atu pe a ou tautala i ni upu se lima e mafai ona malamalama ai le faapotopotoga, ina ia mafai ai foʻi ona ou aʻoaʻo atu i isi, nai lo o le sefulu afe o upu i gagana eseese.+
20 Le ʻauuso e, aua neʻi faatamaitiiti i le mafaufau,+ ae ia faatamameamea i le leaga;+ ma ia faatagatamatua i le mafaufau.+
21 Ua tusia i le Tulafono: “Ua fetalai mai Ieova:* ‘Ou te tautala atu i lenei nuu i laulaufaiva o tagata e ese a latou gagana ma laugutu o tagata ese, e ui i lea, e latou te lē fia faalogo mai lava iā te aʻu.’”+
22 O lea la, o le tautala i gagana eseese e lē o se faailoga mo tagata talitonu, ae e mo ē e lē talitonu,+ a o le faamatalaina o valoaga e lē mo tagata e lē talitonu, ae e mo tagata talitonu.
23 Afai e potopoto le faapotopotoga i se nofoaga e tasi ma latou tautatala uma i gagana eseese, ae ulufale mai ni tagata lautele po o ē e lē talitonu, pe e latou te lē fai atu ea o outou e vālea?
24 Ae afai tou te faamatalaina valoaga ma ua ulufale mai se tagata e lē talitonu po o se tagata lautele, o a outou upu e aʻoaʻia ma uunaʻia ai o ia e suʻesuʻe ifo iā te ia lava.
25 O le a faaalia ai mea lilo o lona loto, ona faapaʻū faō ai lea o ia ma tapuaʻi atu i le Atua, ma faapea atu: “E moni, ua iā te outou le Atua.”+
26 Le ʻauuso e, o le ā se mea e ao ona fai? Pe a outou potopoto faatasi, ua iai i le tasi le salamo, o le isi ua aʻoaʻo atu, ua iai i le isi le faaaliga, ua tautala le tasi i gagana eseese, a o le isi ua mafai ona faamatala upu.+ Ia faia mea uma e atiaʻe ai.
27 Afai foʻi e tautala se tasi i se gagana ese, ia lava ni tagata se toʻalua pe e toʻatolu ma ia auauaʻi; ma ia iai foʻi sē e faamatala* upu.+
28 Ae afai e leai se tasi e faamatala* upu, ia aua le tautala o ia i le faapotopotoga, ae ia tautala o ia iā te ia lava ma i le Atua.
29 Ia tautatala perofeta e toʻalua pe toʻatolu,+ ma ia iloa e isi tagata uma le uiga o na upu.
30 Ae afai ua maua e se isi o loo nofo i inā se faaaliga, ia aua le toe tautala lē o loo tautala.
31 Auā e mafai e outou uma ona feauaua‘i e faamatala atu valoaga, ina ia aʻoaʻoina ma faalaeiauina ai tagata uma.+
32 E tatau foʻi ona pulea e perofeta meaalofa a le agaga i perofeta.
33 Auā o le Atua, o ia o le Atua o le filemu ma e fai mea maopoopo.+
E pei ona iai i faapotopotoga uma o le ʻaupaia,
34 ia aua neʻi tautatala fafine i faapotopotoga auā e lē faatagaina i latou e tautatala.+ Nai lo o lea, ia gauaʻi i latou+ e pei ona fai mai ai le Tulafono.
35 Afai latou te mananaʻo e fia iloa se mea, ia fesili atu i a latou lava tane i le fale, auā o se mea e māsiasi ai pe a tautala se fafine i le faapotopotoga.
36 Pe na alu atu ea le afioga a le Atua mai iā te outou, pe e na o outou foʻi na oo atu i ai?
37 Afai e manatu se tasi o ia o se perofeta po ua ia maua le meaalofa o le agaga, ia faailoa atu e ia o mea ua ou tusi atu ai iā te outou, o poloaʻiga na a le Alii.
38 Ae afai e lē fia amanaʻia e se tasi lenei mea, o le a lē amanaʻia o ia.*
39 O le mea lea oʻu uso e, ia naunau pea e faamatala atu valoaga,+ ae aua le taofia le tautala i gagana eseese.+
40 Peitaʻi, ia faia mea uma i se tulaga talafeagai ma le maopoopo.+
Faamatalaga Pito i Lalo
^ Po o le “saʻili pea ma le maelega.”
^ Po o le “faaliliuina.”
^ O se meafaifaaili anamua e ese mai i le kitara i aso nei. O le upu Peretania, o le harp.
^ Po o le “faaliliuina.”
^ Po o le “faaliliu.”
^ Po o le “faaliliu.”
^ Pe atonu “afai e lē fia malamalama se tasi i lenā poloaʻiga, e faaauau pea ona lē malamalama o ia.”
