O le Tusi Muamua i le Faapotopotoga i Korinito 4:1-21
4 Ia manatu tagata iā i matou o ni auauna a Keriso, ma o ni auauna pule o mea lilo paia+ a le Atua.
2 O lenei, o le mea e manaʻomia mai i auauna pule, o lo latou faamaoni.
3 E lē tāua iā te aʻu lo outou faamasinoina o aʻu po o se faamasinoga foʻi e faia e tagata. O le mea moni, ou te lē faamasino iā te aʻu lava.
4 Auā ou te lē iloa se mea ou te sesē ai. Ae e lē faamaonia ai i lenei mea laʻu amiotonu; o Ieova* e na te faamasinoina aʻu.+
5 O le mea lea, aua neʻi faamasinoina+ se mea a o leʻi oo i aso e tatau ai, seʻia sau le Alii. O le a ia aumaia i le malamalama mea lilo o le pogisa, ma e na te faaalia foʻi filifiliga o loto, ona taʻitasi lea ma viiviia i latou e le Atua.+
6 Le ʻauuso e, ua ou faatatauina nei mea iā te aʻu ma Apolo+ e mo lo outou lelei, ina ia outou iloa ai mai iā i maʻua le tulafono: “Aua tou te faia mea e sili atu nai lo o mea ua tusia,” ina neʻi faafefeteina outou i le faamaualuga,+ ma faasili le tasi nai lo o le isi.
7 Auā o ai na faia oe ia ese mai i le isi? Auā o le ā se mea o iā te oe e leʻi foaʻiina atu?+ Ae afai na foaʻiina atu iā te oe, aiseā la e te mimitavale ai e peiseaʻī e leʻi foaʻiina atu?
8 Po ua faamalieina ea outou? Po ua tamaoaiga ea outou? Po ua avea ea outou ma tupu+ e aunoa ma i matou? E lelei pe afai ua fai outou ma tupu, ina ia mafai ai ona tatou pule faatasi o ni tupu.+
9 Auā e foliga mai iā te aʻu, ua tuu faamulimuli i matou le ʻauaposetolo e le Atua i le faaaliga o ni tagata ua faasalaina i le oti,+ auā ua avea i matou ma mataaga i le lalolagi,+ ma agelu atoa ma tagata.
10 Ua vālea i matou+ ona o Keriso, ae ua outou faautauta ona o Keriso; ua vaivai i matou, ae ua malolosi outou; ua faamamaluina outou, ae ua lē faamamaluina i matou.
11 E oo mai i le taimi nei, o loo matou fia aai+ pea ma fia feinu,+ ma tau leai ni ofu,* ma sasaina,*+ ma leai ni fale e nonofo ai,
12 ma o loo matou tautigā e galulue i o matou lava lima.+ Pe a upuleagaina, e matou te faamanuia atu;+ pe a sauāina, e matou te tumau ma le onosaʻi;+
13 pe a taʻuleagaina, e matou te tali atu ma le agamalu;*+ ua avea i matou ma otaota o le lalolagi, ma mea ua lafoaʻiina mai i mea uma, ua oo mai lava i aso nei.
14 Ua ou tusi atu nei mea, e lē ina ia faamā ai outou, ae ia ou apoapoaʻi atu iā te outou o laʻu fanau pele.
15 Auā e ui ua iā te outou faiaʻoga* e 10,000 ona o Keriso, ae e mautinoa e lē toʻatele ni o outou tamā; ona o Keriso Iesu ua avea ai aʻu ma o outou tamā e ala i le tala lelei.+
16 O le mea lea ou te ʻaiʻoi atu ai iā te outou, ina ia outou faaaʻoaʻo mai iā te aʻu.+
17 O le māfuaaga lea ua ou auina atu ai Timoteo iā te outou, auā o ia o loʻu atalii pele ma e faamaoni i le Alii. O le a ia faamanatu atu iā te outou auala ou te faia ai mea e tusa ai ma Keriso Iesu,+ e pei foʻi ona ou aʻoaʻo atu i faapotopotoga taʻitasi i nofoaga uma.
18 Ua faafefeteina nisi i le faamaualuga e pei ou te lē alu atu iā te outou.
19 Ae ua toeitiiti ona ou alu atu lea iā te outou pe afai e finagalo i ai Ieova,* ona ou iloa ai lea e lē o upu a ē ua faafefeteina i le faamaualuga, a o lo latou malosi.
20 Auā o le Malo o le Atua, e lē faavaeina i upu a o le malosi.
21 O lē fea e tou te mananaʻo ai? Po ou te alu atu ea iā te outou ma le sasa,+ po o le alofa ma le agaga o le agamalu?
Faamatalaga Pito i Lalo
^ Po o le “tatuʻiina.”
^ Ele., “ma lē lavalavā.”
^ Ele., “e matou te ‘ai‘oi atu.”
^ Po o “taʻitaʻitama; tausitama.”
