O le Tusi Muamua i le Faapotopotoga i Korinito 8:1-13
8 O lenei, ua ou tusi atu iā te outou e faatatau i meaʻai ua ofoina atu i tupua:+ Ua tatou iloa ua tofu i tatou ma le poto.+ O le poto e faafefete ai, a o le alofa e atiaʻe ai.+
2 Afai ua manatu se tasi ua ia iloa se mea, e leʻi iloa e ia se mea e pei ona tatau ona ia iloaina.
3 Ae afai e alofa se tasi i le Atua, e na te silafia lenā tagata.
4 E tusa ai ma le aai i meaʻai ua ofoina atu mo tupua, ua tatou iloa o le tupua o se meanoa+ i le lalolagi, ma e na o le toʻatasi lava le Atua.+
5 Auā e ui ina iai o ē ua taʻua o atua i le lagi ma le lalolagi,+ e pei ona iai “atua” e toʻatele ma “alii” e toʻatele,
6 ae e toʻatasi lava lo tatou Atua,+ o le Tamā lea,+ o lē na faia mea uma lava, ma e tatou te ola mo ia;+ e toʻatasi foʻi le Alii, o Iesu Keriso lea, o ia ua ala mai ai mea uma lava,+ ma e tatou te ola e ala iā te ia.
7 Peitaʻi, ua lē iai i tagata uma lenei poto.+ Ae ona na tapuaʻi nisi i tupua, pe a latou aai i meaʻai ma manatu i ai o mea na faataulagaina mo tupua,+ ua faaleagaina ai o latou lotofuatiaifo ua vaivai.+
8 Ae e lē ta‘uleleia i tatou e le Atua ona o meaʻai;+ afai tatou te lē aai, e tatou te lē sesē ai, ma afai foʻi tatou te aai e lē atili ai ona ta‘uleleia i tatou.+
9 Ae ia faaeteete ina neʻi avea a outou aiā e filifili ai ma mea e tausuai ai ē e vaivai.+
10 Auā afai e vaai atu se tasi iā te oe, o lē ua iai le poto, o loo e ʻai i le malumalu o se tupua, pe e lē faamalosia ai ea le lotofuatiaifo o lē ua vaivai, ina ia ʻai foʻi o ia i meaʻai ua ofoina atu i tupua?
11 O lea, o lou poto ua afāina* ai le tagata ua vaivai, o lou uso o lē na maliu ai Keriso.+
12 Afai tou te agasala faapea i o outou uso, ma tigā ai o latou lotofuatiaifo ua vaivai,+ ua outou agasala la iā Keriso.
13 O lea, afai ua tausuai loʻu uso ona o meaʻai, ou te lē toe ʻai lava i aano o manu, ina neʻi tausuai loʻu uso ona o aʻu.+
Faamatalaga Pito i Lalo
^ E faasino atu i le afāina po o le lepetia o lona faatuatua, po o lona faamoemoe mo le ola e faavavau.
