O le Tusi Muamua i le Faapotopotoga i Korinito 9:1-27
9 Po ou te lē o saʻoloto ea? Pe e lē o aʻu ea o se aposetolo? Po ou te leʻi vaai ea i lo tatou Alii o Iesu?+ Pe e lē o outou ea o fua o laʻu galuega i le Alii?
2 E tusa pe e lē o aʻu o se aposetolo i isi, a o le mea moni o aʻu o se aposetolo iā te outou! Auā o outou o le faamaufaailoga o laʻu auaunaga faaaposetolo i le Alii.
3 O laʻu tali lenei i ē ua faamasinoina aʻu:
4 Pe e lē iai ea iā i matou le aiā* e aai ma feinu ai?
5 Pe e lē iā i matou ea le aiā e ō faatasi ai ma se avā talitonu,*+ e pei o isi o aposetolo ma uso o le Alii,+ ma Kefa?*+
6 Pe e na o i maʻua ea ma Panapa+ e tatau ona faigaluega ina ia tausia ai i maʻua?
7 O ai se fitafita e auauna ae e leai sona totogi? O ai se tasi e totō le togāvine ae e lē ʻai mai i ona fua?+ O ai foʻi e na te leoleoina le lafu ae e lē inu i le suāsusu o le lafu?
8 Po ua ou fai atu nei mea e tusa ma manatu o tagata? Pe e lē o fai mai ai foʻi le Tulafono e tusa ai ma nei mea?
9 Auā ua tusia i le Tulafono a Mose: “Aua e te fusi le gutu o le povi poʻa a o solisolia le saito.”+ Po o povi poʻa ea e manatu i ai le Atua?
10 Po ua fetalai mai ea o ia i nei mea ona o i tatou? Ua tusia nei mea ona o i tatou, auā o le tagata e suatia ma le tagata e solisolia e tatau ona faia faapea ma le faamoemoe e maua mai ai ni saito.
11 Afai ua matou lūlū mea faaleagaga iā te outou, po o se mea tele ea lo matou seleseleina o le fesoasoani faaletino mai iā te outou?+
12 Pe afai e iai le aiā a nisi e talia ai la outou fesoasoani, pe e lē sili ai ea la matou aiā? E ui i lea, e matou te leʻi faaaogāina lenā aiā,*+ ae ua matou tumau i mea uma lava, ina neʻi matou faia se mea e faalavelavea ai le tala lelei iā Keriso.+
13 Pe e tou te lē iloa ea o tagata e faia le auaunaga paia e aai i mea o le malumalu, ma o i latou e auauna e lē aunoa i le fata faitaulaga, e maua la latou tufaaga mai le fata faitaulaga?+
14 Ua faapea foʻi ona poloaʻiina e le Alii o ē o talaʻia le tala lelei, ina ia ola e tusa ai ma le tala lelei.+
15 Ae ou te leʻi faaaogāina lava se tasi o na mea.+ O le mea moni, ou te leʻi tusia nei mea ina ia faia ai faapea iā te aʻu, auā e sili ona ou oti i lo o lenā mea; ae ou te lē manaʻo e aveese e se tasi le mea ua ou mitamita ai!+
16 Afai foʻi ua ou folafola atu le tala lelei, e lē o se mea ou te mitamita ai, auā o le mea lea e tatau ona ou faia. Oi talofa iā te aʻu pe a ou lē folafolaina atu le tala lelei!+
17 Afai ou te faia ma le lotomalie, ou te maua le taui; ae e tusa po ou te lē faia ma le lotomalie, ua tuuina mai pea iā te aʻu le tiute tauave ia faataunuuina.+
18 O le ā la loʻu taui? Ia lē maua soʻu totogi a o oʻu folafolaina atu le tala lelei, ina ia lē faaaogā sesē laʻu pule* e tusa ai ma le tala lelei.
19 Auā e ui ina ou saʻoloto mai i tagata uma, ae ua ou faia aʻu ma pologa i tagata uma, ina ia ou maua ai le toʻatele o tagata.
20 Sa ou faapei o se Iutaia i tagata Iutaia ina ia maua ai tagata Iutaia;+ sa ou faapei o sē e nofo i le tulafono i ē e nonofo i le tulafono, e ui ou te lē o nofo i le tulafono, ina ia maua ai ē e nonofo i le tulafono.+
21 Sa ou faapei o sē e lē nofo i le tulafono i ē e lē o nonofo i le tulafono, e ui ua ou nofo i le tulafono a le Atua atoa ma le tulafono a Keriso,+ ina ia maua ai o ē e lē o nonofo i le tulafono.
22 Sa ou faapei o sē ua vaivai i ē ua vaivai, ina ia maua ai o ē ua vaivai.+ Ua avea aʻu ma mea uma i tagata o ituaiga uma, ina ia iʻu lava ina faaolaina nisi iā te aʻu.
23 Ae ua ou faia mea uma ona o le tala lelei, ina ia ou talaʻi atu i isi.+
24 Pe e tou te lē iloa ea e tamomoʻe tagata uma o loo i le tuuga, ae e toʻatasi lava na te maua le faailoga? Ia faapena foʻi ona outou tamomoʻe ina ia maua le faailoga.+
25 O tagata uma e auai i se tauvaga,* e tatau ona amio pulea* i latou i mea uma lava. O le mea moni, ua faia e i latou lenei mea ina ia maua ai le pale e pala,+ a o i tatou, ina ia maua ai le pale e lē pala.+
26 O aʻu neʻi foʻi, e faapea ona ou tamoʻe, ou te lē tamoʻe e aunoa ma se taulaʻiga;+ e faapea foʻi ona ou tuʻi, ou te lē tuʻi i le ʻea;
27 ae ou te tatuʻi* loʻu tino+ e fai ma pologa ina neʻi taʻuleagaina aʻu,* ae sa ou talaʻi atu i isi tagata.
Faamatalaga Pito i Lalo
^ Ele., “pule.”
^ Po o “se tuafafine Kerisiano o se avā.”
^ E igoa foʻi iā Peteru.
^ Ele., “pule.”
^ Po o le “aiā.”
^ Po o “tagata taaalo uma.”
^ I le gagana Eleni, e faasino atu i le puleaina o amioga, o upu, ma mafaufauga.
^ Po o le “faasala; matuā pulea.”
^ Po o le “ina neʻi oʻu lē agavaa.”
