O le Tusi Muamua o Nofoaiga a Tupu 10:1-14
-
Maliliu Saulo ma ona atalii (1-14)
10 Ua tau Filisitia ma Isaraelu, ma ua sosola tagata Isaraelu mai i luma o Filisitia, ua paʻuʻū foʻi le to‘atele ua fasia i le pelu i le mauga o Kilepoa.+
2 Ua tuliloa atu e Filisitia o Saulo ma ona atalii; ona fasia lea e Filisitia o atalii o Saulo, o Ionatana, o Apinatapa, ma Makisua.+
3 Ua vevela le taua ma Saulo, ua maua atu o ia e tagata fanafana aū, ua manuʻa foʻi o ia ona o tagata fanafana aū.+
4 Ona fai atu lea o Saulo i lē o loo aveina ana meatau: “Inā seʻi ia lau pelu ma tutuʻi ai aʻu, ina neʻi ō mai na tagata lē peritomeina ma matuā faasauā+ iā te aʻu.” Ae e leʻi loto i ai lē na aveina ana meatau, auā ua matuā fefe lava o ia. Ona tago lea o Saulo i le pelu ma faapaʻū ai i luga.+
5 Ina ua vaai atu lē na aveina ana meatau ua oti Saulo, ona faapaʻū foʻi lea o ia i lana pelu ma oti ai.
6 O lea, na feoti faatasi ai Saulo, o ona atalii e toʻatolu, ma tagata uma o lona aiga.+
7 Ina ua vāai atu tagata uma o Isaraelu o ē na iai i le vanu,* ua sosola uma le ʻautau a Isaraelu, ma ua feoti foʻi Saulo ma ona atalii, ona latou tuua lea o o latou aai ma sosola, ae ua ō mai Filisitia ma nonofo ai i inā.
8 I le aso na sosoo ai, ina ua ō atu Filisitia e tatala ofu o ē na fasia, ona latou maua lea o Saulo ma ona atalii, o loo taatitia i luga o le mauga o Kilepoa.+
9 Ona latou tatala lea o ona ofu ma vavaeese lona ulu ma ave lona ofutau, ua latou auina faataamilo atu foʻi le feʻau i le nuu o Filisitia, e faailoa atu ai i o latou tupua+ ma le nuu.
10 Ona latou tuu lea o lona ofutau i le fale* o lo latou atua, ma faamau lona atigipoo i le fale o Takono.+
11 Ina ua faalogo ē uma o i Iapese+ i Kiliata i mea uma ua faia e Filisitia iā Saulo,+
12 ona tutulaʻi lea o tagata totoa uma ma ave le tino o Saulo ma tino o ona atalii ma ave i Iapese, ma tanu o latou ponaivi i lalo o le laau telē i Iapese,+ ma latou anapopogi mo aso e fitu.
13 Ua oti Saulo ona o lona lē faamaoni iā Ieova, i lona lē usitaʻia o le afioga a Ieova,+ ma lona fesili atu i se fafine faataulāitu+
14 nai lo o le fesili atu iā Ieova. Ona Ia fasiotia lea o ia, ma tuuina atu le malo iā Tavita le atalii o Iese.+
