O le Tusi Muamua o Nofoaiga a Tupu 11:1-47
11 Mulimuli ane, ona ō mai ai lea o le nuu uma o Isaraelu iā Tavita i Heperona,+ ua faapea mai: “Faauta! O i matou nei o ou ivi ma ou aano.*+
2 A o fai Saulo ma tupu i aso ua mavae, o oe lava na taʻitaʻiina Isaraelu i taua.*+ Na fetalai mai foʻi Ieova lou Atua iā te oe: ‘O oe lava e te leoleoina loʻu nuu o Isaraelu, e avea foʻi oe ma taʻitaʻi i loʻu nuu o Isaraelu.’”+
3 Ona ō mai lea o toeaina uma o Isaraelu i le tupu i Heperona, ma ua osia ai e Tavita se feagaiga ma i latou i luma o Ieova i Heperona; ona latou faauuina lea o Tavita e fai ma tupu iā Isaraelu,+ e tusa ma le afioga a Ieova e ala mai iā Samuelu.+
4 Mulimuli ane, ona ō atu lea o Tavita ma Isaraelu uma i Ierusalema, o Iepuse+ lea, o i inā lea na nonofo ai tagata Iepusē+ i le nuu.
5 Ua faifai mai iā Tavita tagata Iepusē sa nonofo i le nuu e faapea: “E te lē sao mai i inei.”+ Peita‘i, na faoa e Tavita le aai malosi o Siona,+ lea ua avea nei ma Aai a Tavita.+
6 Ona faapea atu lea o Tavita: “O se tasi e na te fasia muamua tagata Iepusē, e avea o ia ma taʻitaʻi ma alii.” Ona alu aʻe muamua lea o Ioapo+ le tama a Seruia, ma ua avea ai o ia ma taʻitaʻi.
7 Ua nofo foʻi Tavita i le aai malupuipuia. O le mea lea na latou faaigoa ai o le Aai a Tavita.
8 Na ati e ia pā ma faia isi fale e faataamilo i le aai, e amata mai i le Mea Maupuʻepuʻe* e oo atu i itu e soo ai, ae na toe faia e Ioapo isi mea na totoe o le aai.
9 Ua faateleina pea le mamalu o Tavita,+ ma sa faatasi Ieova o ʻau ma ia.
10 O taʻitaʻi nei o toa malolosi sa iā Tavita, o ē sa lagolagoina malosi o ia i lona tofiga o se tupu, faatasi ma Isaraelu uma, ina ia faia o ia ma tupu e tusa ma le afioga a Ieova e faatatau iā Isaraelu.+
11 O le lisi lenei o igoa o toa malolosi sa iā Tavita: o Iasapama+ le atalii o le tagata Hakemoni, o le taʻitaʻi o le toʻatolu.+ Na sii lana tao i tagata e toʻa 300 ma fasiotia i latou i le taimi e tasi.+
12 E sosoo atu iā te ia o Eleasaro+ le atalii o Toto le tagata Aokia.+ Sa aofia o ia i toa malolosi e toʻatolu.
13 O ia na faatasi ma Tavita i Fesetame,+ lea na faapotopoto faatasi ai Filisitia mo le taua. Na iai se fasi fanua ua lilo i karite, ae ua sosola le nuu ona o Filisitia.
14 Ae ua tū o ia i le ogatotonu o le fanua ma faasao le fanua ma fasia pea tagata Filisitia, ona aumaia ai lea e Ieova o le manumalo* tele.+
15 E toʻatolu tagata mai i taʻitaʻi e toʻa 30, na ō ifo i le papa iā Tavita, i le ana o Atulame,+ a o tolauapi se ʻautau a Filisitia i le vanu* o Rafaimi.+
16 Sa iai Tavita i lenā taimi i le nofoaga na lafi ai; sa iai foʻi le leoleoga a Filisitia i Peteleema.
17 Ona faailoa atu lea e Tavita o lona manaʻo e faapea: “Ta fia inu lava i se vai mai i le vaieli o loo i autafa o le faitotoʻa o Peteleema!”+
18 Ona ō atu faamalosi lea o tagata e toʻatolu i le togālauapi a Filisitia, ma asu mai vai mai i le vaieli o loo i autafa o le faitotoʻa o Peteleema, ma aumai iā Tavita; ae na musu Tavita e inu ai, ma ua ia sasaa atu iā Ieova.
19 Ua ia faapea atu: “Ia mamao mai iā te aʻu ona ou faia o lenei mea, i luma o le silafaga a loʻu Atua. Po ou te inu ea i le toto o nei tagata na lamatia o latou ola?+ Auā na lamatia o latou ola ina ia aumaia ai lenei vai.” O lea, na musu ai o ia e inu i le vai. O mea ia na faia e ana toa malolosi e toʻatolu.
20 A o Apisai+ le uso o Ioapo,+ o ia o le taʻitaʻi o le isi toʻatolu; na sii lana tao i tagata e toʻa 300 ma fasiotia i latou, ma na tutusa foʻi lona talaaga ma toa e toʻatolu.+
21 E mai i le toʻatolu, e sili atu o ia nai lo o le isi toʻalua, na fai foʻi o ia ma o latou taʻitaʻi; ae e na te leʻi ausia le tulaga o uluaʻi toa e toʻatolu.
22 O Penaia+ le atalii o Ioiata, o se tagata toa* o lē na faia le tele o mea i Kapeseelu.+ Na ia fasiotia atalii e toʻalua o Arielu o Moapi, ma na alu ifo foʻi ma fasimate se leona i le lua i le aso na toʻulu ai le kiona.+
23 O ia foʻi na fasiotia se tagata Aikupito e matuā tino ese, e lima kupita* lona maualuga.+ E ui sa iai i le lima o le Aikupito se tao e pei o le laau faalava a tagata e lalaga ʻie,+ ae na alu atu o ia ma le tootoo ma seʻi ese le tao mai i le lima o le Aikupito, ma fasiotia o ia i lana lava tao.+
24 O mea ia na faia e Penaia le atalii o Ioiata; na tutusa foʻi lona talaaga ma toa malolosi e toʻatolu.
25 E ui lava na sili atu o ia i lo o le toʻatolu sefulu, ae e na te leʻi ausia foʻi le tulaga o toa malolosi e toʻatolu.+ Peitaʻi, ua tofia o ia e Tavita e pulea tagata e puipuia lona saogalemu.
26 A o tagata totoa o ʻautau, sa iai Asaelu+ le uso o Ioapo, o Eleana le atalii o Toto mai i Peteleema,+
27 o Samota le tagata Alari, o Helesa le tagata Pelone,
28 o Ira+ le atalii o Ikesa le tagata Tikoa, o Apieseru+ le tagata Anatota,
29 o Sepekai+ le tagata Usa, o Ilai le tagata Aokia,
30 o Maarai+ le tagata Netopa, o Heleta+ le atalii o Panaa le tagata Netopa,
31 o Itai le atalii o Ripai le tagata Kipea mai i le fanauga a Peniamina,+ o Penaia le tagata Piratonu,
32 o Hurai mai i ālia* o Kaasa,+ o Apielu le tagata Arapa,
33 o Asemau le tagata Paarumi, o Eliepa le tagata Salapima,
34 o atalii o Aseme le tagata Kisoni, o Ionatana le atalii o Sage le tagata Arari,
35 o Aiamu le atalii o Sakaru le tagata Arari, o Elefala le atalii o Uro,
36 o Eferu le tagata Metira, o Akia le tagata Pelone,
37 o Heserai le tagata Karamelu, o Narai le atalii o Esepai,
38 o Ioelu le uso o Natano, o Mepekara le atalii o Akari,
39 o Seleka le tagata Amonī, o Naarai le tagata Perota, o lē e aveina meatau a Ioapo le tama a Seruia,
40 o Ira le tagata Ietero, o Karepa le tagata Ietero,
41 o Uria+ le tagata Hetī, o Sapata le atalii o Akalai,
42 o Atina le atalii o Sisa le tagata Reupena, o se alii sili o le ituaiga o Reupena, sa iā te ia tagata e toʻa 30;
43 o Hanana le atalii o Maaka, o Iosafata le tagata Metini,
44 o Usia le tagata Aserota, o Sama ma Ieielu, o atalii ia o Hotama le tagata Aroeru,
45 o Ietiaelu le atalii o Semiri, o Ioka lona uso o le tagata Tise,
46 o Elielu le tagata Makavi, o Ieripa ma Iosavia, o atalii ia o Elenaama, ma Itema le tagata Moapi.
47 O Elielu, o Opeta ma Iasielu le tagata Mesopaia.
Faamatalaga Pito i Lalo
^ Po o le “o ou aiga i le toto.”
^ Epe., “e taʻitaʻiina atu i fafo ma toe taʻitaʻiina mai i totonu Isaraelu.”
^ Po o le “Milo.” O se upu Eperu o lona uiga o le “faatumu.”
^ Po o le “faaolataga.”
^ Po o “le fanua laugatasi.”
^ Epe., “o le atalii o se toa.”
^ Tagaʻi i le Uiga o Upu.
