O le Tusi Muamua o Nofoaiga a Tupu 13:1-14
13 Ua talanoa atu Tavita i alii sili o taʻitoʻaafe, ma taʻitoʻaselau, ma taʻitaʻi uma.+
2 Ona fai atu lea o Tavita i le faapotopotoga uma o Isaraelu: “Afai e lelei iā te outou ma ua finagalo foʻi i ai Ieova lo tatou Atua, seʻi o tatou aauina atu se feʻau i o tatou uso o loo totoe i vaipanoa uma o Isaraelu, faapea ositaulaga ma le ʻau sa Levī i o latou aai+ ma fanua e aai ai lafumanu, ina ia latou faatasi mai iā i tatou.
3 Ia tatou aumaia le Atolaau+ a lo tatou Atua iā i tatou.” Auā latou te leʻi tausia le Atolaau i aso o Saulo.+
4 Ona malilie ai lea o le faapotopotoga uma ina ia faia faapea, auā ua tonu lea mea i manatu o le nuu uma.
5 Ona faapotopoto lea e Tavita o Isaraelu uma, e amata mai i le vaitafe* o Aikupito e oo atu i Lepo-amato,*+ ina ia aumai le Atolaau a le Atua moni mai i Kiriata-iarima.+
6 Ua ō aʻe Tavita ma Isaraelu uma i Paalā,+ o Kiriata-iarima lea, o le aai o Iuta, ina ia ave aʻe mai i inā le Atolaau a le Atua moni o Ieova, o lē e afio i luga* o kerupi,+ lea o loo taʻua ai lona suafa.
7 Ae ua latou faaee le Atolaau a le Atua moni i luga o le taavale toso fou,+ ina ia o latou ave aʻe ai mai i le fale o Apinatapa, ma ua taʻitaʻia le taavale toso fou+ e Usa ma Aio.
8 Ua fiafia foʻi Tavita ma Isaraelu uma i luma o le Atua moni ma lo latou malosi atoa, ma faia pesega, ua tā kitara,* o meafaifaaili e iai uaua, o topa,*+ o sumepalo,*+ ma pū.+
9 Ae ina ua latou oo i le mea e soli ai saito a Kitonu, ona aapa atu lea o le lima o Usa ma taofi le Atolaau, auā na toetoe lava mafuli le taavale toso ona o povi.
10 Ona matuā toʻasā ai lea o Ieova iā Usa, ua Ia fasia o ia ona ua aapa atu lona lima i le Atolaau,+ ma ua oti ai o ia i luma o le Atua.+
11 Ae ua ita* Tavita auā ua oo faafuaseʻi mai le toʻasā o Ieova iā Usa; ona faaigoa ai lea o lenā nofoaga, o Faresa-usa* e oo mai i le asō.
12 Ona fefe ai lea o Tavita i le Atua moni i lenā aso, ua faapea ane: “E faapefea ona ou aumaia le Atolaau a le Atua moni i loʻu aai?”+
13 E leʻi aumaia e Tavita le Atolaau iā te ia i le Aai a Tavita, ae na ia ave le Atolaau i le fale o Opete-etoma le tagata Kata.
14 Na iai pea le Atolaau a le Atua moni i le aiga o Opete-etoma i lona fale mo masina e tolu, ma ua faaauau ona faamanuia e Ieova le aiga uma o Opete-etoma, ma mea uma ua iā te ia.+
Faamatalaga Pito i Lalo
^ Po o le “mai i Seora.”
^ Po o “i le mea e ulu atu ai i Amato.”
^ Pe atonu “i le vā.”
^ O se meafaifaaili anamua e ese mai i le kitara i aso nei. O le upu Peretania, o le harp.
^ O se meafaifaaili e tagitagi. O le upu Peretania, o le tambourine.
^ O se meafaifaaili e lua mea lapotopoto e faafetoʻai ona lagona ai lea o le tatagi.
^ Po o le “lē fiafia.”
^ Lona uiga “Faasalaga Faasaga iā Usa.”
