O le Tusi Muamua o Nofoaiga a Tupu 14:1-17
14 Ua aauina mai e Hiramo+ le tupu o Turo o avefeʻau iā Tavita, faapea foʻi laau o le arasi, o ē e atiina maa,* ma le ʻaukamuta e fausia se fale mo ia.+
2 Ona iloa ai lea e Tavita ua matuā faatumauina e Ieova o ia e fai ma tupu iā Isaraelu,+ auā ua matuā faaeaina lona malo ona o Lona nuu o Isaraelu.+
3 Ua toe fai isi avā+ a Tavita i Ierusalema, ua toe fanaua foʻi e Tavita nisi atalii ma afafine.+
4 O igoa nei o i latou na fananau mai iā te ia i Ierusalema:+ O Samua, o Sopapa, o Natano,+ o Solomona,+
5 o Ivara, o Elisua, o Elefaleta,
6 o Nokaa, o Nefeku, o Iafia,
7 o Elisama, o Peliata, ma Elifaleta.
8 Ua faalogo Filisitia ua faauuina Tavita e fai ma tupu iā Isaraelu uma,+ ona ō aʻe ai lea o Filisitia uma e saʻili iā Tavita.+ Ina ua faalogo i ai Tavita, ona ia alu atu lea e tau ma i latou.
9 Ona ō atu lea o Filisitia ma ua faaauau ona latou osofaʻia le vanu* o Rafaimi.+
10 Ua fesili atu Tavita i le Atua: “Po ou te alu aʻe ea e tau ma Filisitia? Pe e te tuuina mai i latou i oʻu lima?” Ona fetalai mai lea o Ieova iā te ia: “Inā alu aʻe ia, auā ou te tuuina atu lava Filisitia i ou lima.”+
11 Ona alu atu lea o Tavita i Paala-faresa,+ ma ua ia fasia ai i latou i inā. Ua faapea ane Tavita: “Ua osofaʻia e le Atua moni oʻu fili e ala i loʻu lima, e pei o le oso mai o le vai.” O le mea lenā ua latou faaigoa ai lenā nofoaga o Paala-faresa.
12 Ua tuua e Filisitia a latou tupua i inā, ma ina ua avatu e Tavita le faatonuga, ona latou susunuina ai lea o tupua i le afi.+
13 Mulimuli ane, ua toe osofaʻi atu Filisitia i le vanu.*+
14 Ona toe fesili atu lea o Tavita i le Atua, ae ua fetalai mai le Atua moni iā te ia: “Aua e te alu atu sa‘o iā i latou, ae ia e taamilo atu i o latou tua, ma ia e osofa‘ia i latou i luma mai o vao peka.+
15 Pe a e faalogo i le paʻō o le savavali i tumutumu o vao peka, ona e osofaʻi atu lea, auā o le taimi lenā ua muamua atu le Atua moni i ou luma e fasia le ʻautau a Filisitia.”+
16 Ona faia lea e Tavita e pei ona poloaʻi mai ai le Atua moni iā te ia,+ ma ua latou fasia le ʻautau a Filisitia e amata mai i Kipeona e oo atu i Kasera.+
17 Ua logotala nuu uma i le taʻutaʻua o Tavita, ua tuu foʻi e Ieova i nuu uma ina ia matataʻu iā te ia.+
Faamatalaga Pito i Lalo
^ Po o “ē e fausia pā.”
^ Po o “le fanua laugatasi.”
^ Po o “le fanua laugatasi.”
