O le Tusi Muamua o Nofoaiga a Tupu 17:1-27
17 Ua nofo Tavita i lona lava fale, ona fai atu lea o ia i le perofeta o Natano:+ “Vaai! o loo oʻu nofo i le fale arasi,+ ae o loo tuu le atolaau o le feagaiga a Ieova i se faleʻie.”+
2 Ona fai mai lea o Natano iā Tavita: “O mea uma ua e finagalo i ai, inā faia ia, auā o loo faatasi le Atua moni ma oe.”
3 I lenā lava pō, na oo mai ai le afioga a le Atua iā Natano, e faapea:
4 “Inā alu ia ma fai atu i laʻu auauna o Tavita, ‘O le mea lenei na fetalai mai ai Ieova: “E te lē faia se fale mo aʻu ou te nofo ai.+
5 Auā ou te leʻi nofo i se fale talu mai le aso na ou aveina aʻe ai le fanauga a Isaraelu e oo mai i le aso nei, ae na ou fealuaʻi pea i lea faleʻie ma lea faleʻie, ma mai i lea faleʻie paia i lea faleʻie paia.*+
6 O aso uma na ou fealuaʻi ai faatasi ma Isaraelu uma, pe na ou fai atu ea i se tasi o faamasino o Isaraelu, o ē na ou tofia e leoleoina loʻu nuu, e faapea, ‘Aiseā na outou lē faia ai se fale arasi mo aʻu?’”’
7 “O lenei, ia faapea ona e fai atu i laʻu auauna o Tavita, ‘O le mea lenei na fetalai mai ai Ieova o ʻau: “Na ou aumaia oe mai i le fanua e aai ai lafumanu, ma mai i le mulimuli atu i le lafu mamoe, ina ia avea ma taʻitaʻi i loʻu nuu o Isaraelu.+
8 Ou te faatasi ma oe i mea uma e te alu i ai,+ ou te faaumatia* foʻi ou fili uma i ou luma;+ ma ou te faia mo oe se igoa, e pei o igoa o alii sili i le lalolagi.+
9 Ou te tofia foʻi se mea e nonofo ai loʻu nuu o Isaraelu ma faatumauina ai i latou, o le a latou nonofo ai i inā ma e lē toe atuatuvale i latou; e lē toe sauāina* foʻi i latou e fanau a ē e amioleaga, e pei o aso ua mavae,+
10 e amata mai lava i le aso na ou tofia ai faamasino e pule i loʻu nuu o Isaraelu.+ Ou te faatoʻilaloina ou fili uma.+ Ou te fai atu foʻi iā te oe, ‘O le a faia e Ieova se aiga* mo oe.’
11 “‘“Pe a e oti, ma e faatasi atu i ou augātamā, ou te faatūina se tasi o lau fanau pe a mavae atu oe, o se tasi o ou lava atalii,+ ma ou te matuā faatumauina lana nofoaiga.+
12 O ia lava lenā e na te faia se fale mo aʻu,+ ou te matuā faatumauina foʻi lona nofoālii seʻia oo i le faavavau.+
13 E fai aʻu ma ona tamā, e fai foʻi o ia ma oʻu atalii.+ Ou te lē aveesea loʻu alofa faamaoni mai iā te ia,+ e pei ona ou aveesea mai i lē na muamua atu iā te oe.+
14 Ou te faatumauina o ia i loʻu fale ma laʻu nofoaiga e faavavau,+ e tumau foʻi lona nofoālii e faavavau.”’”+
15 Ua taʻu atu e Natano iā Tavita o nei upu uma ma lenei faaaliga atoa.
16 Ona alu atu ai lea o le tupu o Tavita ma nofo i lalo i luma o Ieova, ua faapea atu: “Ieova e le Atua, o ai ea aʻu nei? O ai foʻi loʻu aiga ua e faia ai le tele o mea mo i matou?+
17 Le Atua e, e pei ua lē lava lenei mea, ina ua e fetalai mai foʻi o le a faatumauina le aiga o lau auauna seʻia oo i se taimi e mamao lava i le lumanaʻi.+ Ieova e, le Atua, ua e silasila mai iā te aʻu e peiseaʻī o se tagata e tatau ona faaeaina atili.*
18 O le ā ea se isi upu e toe tautala atu ai Tavita iā te oe, e faatatau i le mamalu ua tuuina mai iā te a‘u, auā ua e silafia lelei lau auauna?+
19 Ieova e, ona o lau auauna ma e tusa ma lou lava finagalo, ua e faia ai nei mea tetele uma e ala i le faailoa mai o au galuega tetele uma.+
20 Ieova e, e leai se tasi e tusa ma oe,+ e leai foʻi se isi Atua e na o oe lava;+ o mea uma lava ua faalogo i ai o matou taliga, ua faamaonia ai lenei mea.
21 O ai foʻi se isi atunuu i le lalolagi e pei o lou nuu o Isaraelu?+ Le Atua moni e, na e laveaʻiina i latou e avea ma ou nuu,+ ma e faia ai mo oe se suafa e ala i le faia o mea tetele ma mataʻutia,+ ma tuliesea atunuu mai i luma o lou nuu+ lea na e laveaʻia mai i Aikupito.
22 Na e faia foʻi lou nuu o Isaraelu ma ou nuu i aso uma lava,+ ua avea foʻi oe Ieova ma o latou Atua.+
23 O lenei, Ieova e, tau ina ia e faataunuuina le folafolaga ua e fetalai mai ai e faatatau i lau auauna ma lona aiga e faavavau, ma ia e faia e pei ona e fetalai mai ai.+
24 Ia faatumauina lou suafa ma ia faamamaluina+ e faavavau, ina ia faapea ane ai tagata, ‘O Ieova o ʻau le Atua o Isaraelu, o ia o le Atua o Isaraelu,’ ma ia matuā faatumauina i ou luma le aiga o lau auauna o Tavita.+
25 Auā o oe loʻu Atua, ua e faailoa mai i lau auauna lau fuafuaga ina ia fai se aiga* mo ia. O le mea lea, ua mafai ai e lau auauna ona tatalo atu iā te oe i lenei tatalo.
26 O lenei, Ieova e, o oe o le Atua moni, ma ua e folafola mai nei mea lelei e faatatau i lau auauna.
27 Tau ina ia e faamanuia le aiga o lau auauna, ina ia iai pea i ou luma i aso uma lava; auā o oe lava Ieova e, na faamanuia i ai, ma ua manuia ai e faavavau.”
Faamatalaga Pito i Lalo
^ Atonu o lona uiga “e mai i lea mea na tolauapi ai i le isi mea na tolauapi ai, ma mai i lea mea na nonofo ai i le isi mea na nonofo ai.”
^ Epe., “tipiesea.”
^ Epe., “faatigāina.”
^ Po o “se aigātupu.”
^ Po o “o se tagata maualuga.”
^ Po o “se aigātupu.”
