O le Tusi Muamua o Nofoaiga a Tupu 22:1-19
22 Ua fai atu Tavita: “O le fale lenei o Ieova le Atua moni, ma o le fata faitaulaga foʻi lenei mo taulaga mū mo Isaraelu.”+
2 Ua fai atu Tavita e faapotopoto faatasi mai tagata ese+ sa i le nuu o Isaraelu, ona ia tofia lea o i latou e avea ma tufuga tipi maa, e tipiina maa mo le fausiaina o le fale o le Atua moni.+
3 Na saunia foʻi e Tavita le tele o uʻamea mo fao o faitotoʻa o pā ma mea e sosoo ai, atoa ai ma le tele o ʻapamemea ua lē mafai ona fuaina,+
4 ma laupapa arasi+ e lē mafaitaulia, auā na aumai e tagata Saitonu+ ma tagata Turo+ le matuā tele o laupapa arasi iā Tavita.
5 Ona fai atu lea o Tavita: “O Solomona loʻu atalii, e laʻitiiti ma e lē lava lona poto masani,+ a o le fale o le a fausia mo Ieova e matuā sili ma matagofie,+ ina ia ta‘uta‘ua ai ma iloa ai lona matagofie+ e nuu uma.+ O lea, o le a ou faia ai ni sauniuniga mo ia.” Ona faia ai lea e Tavita le tele o sauniuniga, a o leʻi oti o ia.
6 Ua ia aami foʻi Solomona lona atalii, ma poloaʻi atu iā te ia e fausia se fale mo Ieova le Atua o Isaraelu.
7 Ua fai atu foʻi Tavita iā Solomona lona atalii: “Sa naunau lava loʻu loto e fausia se fale mo le suafa o Ieova loʻu Atua.+
8 Ae ua oo mai le afioga a Ieova iā te aʻu, e faapea, ‘Ua tele le toto ua e faamaligiina, ua tele foʻi taua ua e tauina. E te lē fausia se fale mo loʻu igoa,+ auā ua matuā tele le toto ua e faamaligiina i luga o le laueleele i oʻu luma.
9 Faauta! O le a fanau mai sou atalii,+ o sē e to‘afilemu, ma o le a ou avatu iā te ia le mapusaga mai i ona fili uma o loo si‘omia o ia,+ auā o lona igoa o Solomona,*+ ma o le a ou tuuina atu le filemu ma le to‘afimālie iā Isaraelu i ona aso.+
10 O ia o le a fausia se fale mo loʻu igoa,+ e fai o ia ma oʻu atalii, e fai foʻi aʻu ma ona tamā.+ O le a ou matuā faatumauina lava le nofoālii o lona malo iā Isaraelu e faavavau.’+
11 “O lenei, loʻu atalii e, ia faatasi Ieova ma oe, ia e manuia ma ia e fausia le fale o Ieova lou Atua, e pei ona ia fetalai mai ai e faatatau iā te oe.+
12 Tau ina ia foaʻi atu e Ieova iā te oe le faautauta ma le malamalama,+ pe a tuuina atu e ia iā te oe le pule iā Isaraelu, ina ia e tausia le tulafono a Ieova lou Atua.+
13 Ona manuia ai lea o oe pe afai e te matuā tausia tulafono+ ma iʻuga o faamasinoga, na poloaʻi mai ai Ieova iā Mose e avatu iā Isaraelu.+ Ia lototele ma ia faamalosi. Aua le fefe pe mataʻu.+
14 O lenei, ua ou galue ma le fitā e saunia mo le fale o Ieova le 100,000 o taleni* auro, ma le 1,000,000 o taleni siliva, ma le matuā tele lava o ʻapamemea ma uʻamea+ ua lē mafai lava ona fuatia; ua ou saunia foʻi laupapa ma maa,+ ae ia e faaopoopo i ai nisi mea.
15 Ua iā te oe foʻi tagata e toʻatele e faia galuega, o tufuga e tipiina maa, o le ʻaufaigaluega i maa+ ma laupapa, ma tagata tomai uma i so o se galuega.+
16 E lē mafaitaulia lava auro, o siliva, o ʻapamemea, ma uʻamea.+ Inā tulaʻi ia ma amata le galuega, ma ia faatasi Ieova ma oe.”+
17 Ona poloaʻi atu lea o Tavita i taʻitaʻi uma o Isaraelu e fesoasoani iā Solomona lona atalii, e faapea:
18 “Po ua lē iā te outou ea Ieova lo outou Atua, ma po ua lē avatua ea e ia le mapusaga mo outou i itu uma? Auā ua ia tuuina mai iā te aʻu tagata o le laueleele, ma ua pulea fo‘i e Ieova ma ona tagata le laueleele.
19 O lenei, ia uaʻi atu o outou loto ma lo outou malosi ina ia saʻili iā Ieova lo outou Atua,+ ma ia amata ona fausia le malumalu o Ieova le Atua moni,+ ina ia avatu le atolaau o le feagaiga a Ieova ma ipu paia a le Atua moni,+ i le fale na faia mo le suafa o Ieova.”+
Faamatalaga Pito i Lalo
^ E mai i se upu Eperu o lona uiga o le “Filemu.”
