O le Tusi Muamua o Nofoaiga a Tupu 27:1-34
-
Leoleo o loo auauna i le tupu (1-34)
27 O le faitau aofaʻi lenei o le fanauga a Isaraelu, o alii sili o aiga o tamā, o alii o le taʻitoʻaafe ma le taʻitoʻaselau,+ ma o latou leoleo o loo auauna i le tupu,+ e tusa ma mataupu uma a vaega‘au e ō mai ma ō atu, i lea masina ma lea masina i masina uma o le tausaga; e taʻi 24,000 i vaega‘au taʻitasi.
2 Sa pule Iasapama+ le atalii o Sapetielu i le vaega‘au muamua o le uluaʻi masina, ma e toʻa 24,000 sa i lana vaega‘au.
3 E mai i le fanauga a Faresa,+ o Iasapama le pule o taʻitaʻiʻau uma o ʻautau na tofia e auauna i le uluaʻi masina.
4 O le vaega‘au o le masina lona lua na pule ai Totai+ le tagata Aokia,+ o Mekelota le taʻitaʻi lagolago, ma e toʻa 24,000 sa i lana vaega‘au.
5 O le pule o le vaega‘au lona tolu na tofia e auauna i le masina lona tolu, o Penaia+ le atalii o Ioiata+ le ositaulaga sili, ma e toʻa 24,000 sa i lana vaega‘au.
6 O Penaia lenei o se tagata toa malosi o le toʻatolu sefulu, ma e pule i le toʻatolu sefulu; sa ta‘ita‘i foʻi i lana vaega‘au lona atalii o Amesapata.
7 O le pule o le vaega‘au lona fā i le masina lona fā, o Asaelu+ le uso o Ioapo,+ na sosoo ane foʻi Sepataia lona atalii e sui iā te ia, ma e toʻa 24,000 sa i lana vaega‘au.
8 O le pule o le vaega‘au lona lima i le masina lona lima, o Samuta le tagata Isaraia, ma e toʻa 24,000 sa i lana vaega‘au.
9 O le pule o le vaega‘au lona ono i le masina lona ono, o Ira+ le atalii o Ikesa le tagata Tikoa,+ ma e toʻa 24,000 sa i lana vaega‘au.
10 O le pule o le vaega‘au lona fitu i le masina lona fitu, o Helesa+ le tagata Pelone mai i le fanauga a Efaraima, ma e toʻa 24,000 sa i lana vaega‘au.
11 O le pule o le vaega‘au lona valu i le masina lona valu, o Sepekai+ le tagata Usa mai i le fanauga a Sera,+ ma e toʻa 24,000 sa i lana vaega‘au.
12 O le pule o le vaega‘au lona iva i le masina lona iva, o Apieseru+ le tagata Anatota+ mai i le ituaiga o Peniamina, ma e toʻa 24,000 sa i lana vaega‘au.
13 O le pule o le vaega‘au lona sefulu i le masina lona sefulu, o Maarai+ le tagata Netopa mai i le fanauga a Sera,+ ma e toʻa 24,000 sa i lana vaega‘au.
14 O le pule o le vaega‘au lona 11 i le masina lona 11, o Penaia+ le tagata Piratonu mai i le fanauga a Efaraima, ma e toʻa 24,000 sa i lana vaega‘au.
15 O le pule o le vaega‘au lona 12 i le masina lona 12, o Heletai le tagata Netopa mai i le fanauga a Otinielu, ma e toʻa 24,000 sa i lana vaega‘au.
16 O ta‘ita‘i nei o ituaiga o Isaraelu: O le ituaiga o Reupena, o Elisara le atalii o Sekari sa avea ma taʻitaʻi; o le ituaiga o Simeona, o Sefatia le atalii o Maaka;
17 o le ituaiga o Levi, o Hasapea le atalii o Kimueli; o le ituaiga o Arona, o Satoka;
18 o le ituaiga o Iuta, o Eliu,+ o se tasi o uso o Tavita; o le ituaiga o Isakara, o Omeri le atalii o Mikaele;
19 o le ituaiga o Sepulona, o Isemaia le atalii o Opetaia; o le ituaiga o Nafatali, o Ierimota le atalii o Aserielu;
20 o le ituaiga o Efaraima, o Hosea le atalii o Asesau; o le ʻafa o le ituaiga o Manase, o Ioelu le atalii o Petaia;
21 o le ʻafa o le ituaiga o Manase i Kiliata, o Ito le atalii o Sakaria; o le ituaiga o Peniamina, o Iasielu le atalii o Apineru;+
22 o le ituaiga o Tanu, o Asareelu le atalii o Ieroama. O alii sili ia o ituaiga o Isaraelu.
23 E leʻi faitauina e Tavita le aofaʻi o i latou e 20 tausaga le matutua ma lalo ifo, auā na folafola mai e Ieova e faatoʻateleina Isaraelu e pei o fetu o le lagi.+
24 Na amata le faitauga e Ioapo le tama a Seruia, ae na te leʻi faaiʻuina; ona oo mai ai lea o le toʻasā o le Atua iā Isaraelu ona ua faitauina le nuu,+ ma e leʻi tusia le faitau aofaʻi i le tusi o le talafaasolopito o le tupu o Tavita.
25 Na vaavaaia e Asemau le atalii o Atielu oloa a le tupu.+ Ae na vaavaaia e Ionatana le atalii o Usia fale teuoloa* sa i le fanua, o aai, o nuu ma ʻolo.
26 A o Eserei le atalii o Kalupo, na vaavaaia tagata na faia galuega i le fanua e faato‘aina le laueleele.
27 Na vaavaaia togāvine e Semi le tagata Rama; ae o Sapati le tagata Sefama, na ia vaavaaia fale na gaosia ai le uaina i fua o vine.
28 Na vaavaaia e Paala-anana le tagata Kete, o laau o olive ma laau o le sukamoru+ sa i Sefila;*+ ae na vaavaaia e Ioasa mea e teu ai le suāuu.
29 O Setari le tagata Sarona,+ na vaavaaia lafu povi na aai i Sarona; a o Safata le atalii o Atalai, na vaavaaia lafu povi i fanua laugatasi.*
30 Na vaavaaia kamela e Opili le tagata Isamaeli; ae na vaavaaia asini* e Ietaia le tagata Marono.
31 Na vaavaaia le lafu mamoe e Iasesa le tagata Hakara. O ta‘ita‘i uma nei na vaavaaia mea a le tupu o Tavita.
32 O Ionatana+ le atalii o le uso o Tavita, o ia o se faufautua, o se tagata malamalama, ma o se failautusi; a o Ikielu le atalii o Hakemoni, sa vaavaaia atalii o le tupu.+
33 O Aitofele+ o se faufautua a le tupu; a o Usai+ le tagata Araki, o le uō a le tupu.
34 Ina ua mavae Aitofele, ona sosoo ane lea iā te ia o Ioiata le atalii o Penaia,+ ma Aviata;+ ma na avea Ioapo+ ma taʻitaʻiʻau o le vaega‘au a le tupu.
Faamatalaga Pito i Lalo
^ Po o “oloa.”
^ Po o “le fanua maulalo.”
^ E faasino atu i le fanua laugatasi i le pito i lalo o se vanu.
^ Epe., “asini fafine.”
