O le Tusi Muamua a Peteru 1:1-25
1 O aʻu o Peteru, o le aposetolo+ a Iesu Keriso, o le tusi lenei i ē o loo aumau ma nonofo solo i Pono, i Kalatia, i Kapatokia,+ i Asia, ma Pitunia, o le tusi lenei i ē ua filifilia
2 e tusa ai ma le muaʻi silafia o mea e le Atua le Tamā,+ ma le faapaiaina e ala i le agaga,+ ina ia usiusitaʻi ma sausauina i latou i le toto o Iesu Keriso:+
Tau ina ia faateleina atu iā te outou le agalelei faifua ma le filemu mai i le Atua.
3 Ia viia le Atua le Tamā o lo tatou Alii o Iesu Keriso, auā e tusa ai ma le tele o lona alofa mutimutivale, ua ia fanaufouina ai i tatou+ i se faamoemoe ola+ e ala i le toe faatūina o Iesu Keriso mai i le oti,+
4 i se tofi e lē pala, e lē faaleagaina, ma e lē mavae.+ Ua taofia i le lagi mo outou,+
5 o ē ua leoleomaluina e le mana o le Atua ona o lo outou faatuatua mo le faaolataga, lea ua saunia e faaalia mai i le taimi mulimuli.
6 Ua outou matuā olioli ai ona o lenei mea, e ui lava ua outou mafatia i tofotofoga eseese mo sina taimi puupuu pe afai e tatau ai,+
7 ina ia avea le tofotofoina o le malosi o lo outou faatuatua,+ lea e matuā sili atu nai lo o le auro e faaumatia e ui lava ina tofotofoina* i le afi, e fai ma mea e iʻu ai i le viiga, o le mamalu ma le migao i le faaaliga o Iesu Keriso.+
8 E ui e tou te leʻi vāai lava iā te ia, ae ua outou alolofa iā te ia. E ui e tou te lē o vāai atu iā te ia i le taimi nei, ae ua outou faatuatua iā te ia, ma matuā fiafia i le olioli tele e lē mafaamatalaina,
9 a o outou maua le iʻuga o lo outou faatuatua, o lo outou faaolataga lea.+
10 E tusa ai ma lenei faaolataga, sa matuā saʻiliʻili ma suʻesuʻe ma le filigā le ʻauperofeta,+ o ē na faia valoaga e faatatau i le agalelei faifua e tatau ona oo iā te outou.
11 Sa latou suʻesuʻe pea po o le ā le taimi patino, ma pe e faapeʻī aso e faataunuuina ai mea e faatatau i le Keriso,+ lea ua faailoa mai e le agaga o loo iā i latou, a o muaʻi molimau atu le agaga e uiga i puapuaga e tatau ona oo i le Keriso,+ ma mea mamalu o loo mulimuli mai i nei mea.
12 Sa faaali atu i perofeta e faapea, e leʻi auauna i latou iā i latou lava, a o outou, e tusa ma mea ua faailoa atu nei iā te outou e ē na folafolaina atu le tala lelei iā te outou, e ala i le agaga paia lea na auina mai i le lagi.+ E naunau tele agelu e vaavaai i nei mea.
13 O lea, inā sauniuni ia o outou mafaufau mo galuega fitā;+ ia faaauau ona outou matuā mafaufau lelei;+ ia taulaʻi atu lo outou faamoemoe i le agalelei faifua lea o le a tuuina atu iā te outou i le faaaliga o Iesu Keriso.
14 E faapei o fanau usiusitaʻi, aua le amioaʻi e tusa ai ma o outou tuʻinanauga na iai muamua a o leʻi malamalama outou,
15 ae e faapei o Lē e Paia na valaauina outou, ia paia outou i a outou amioga uma,+
16 auā ua tusia: “E tatau ona paia outou, auā o aʻu nei e paia lava aʻu.”+
17 Afai foʻi e tou te valaau i le Tamā, o lē e faamasino ma le lē faailoga tagata+ e tusa ma galuega a tagata taʻitoʻatasi, ia outou matataʻu+ i le taimi a o outou aumau o ni tagata ese.
18 Ua outou iloa e leʻi faasaʻolotoina*+ outou i mea e pala o le siliva po o le auro, mai i o outou olaga iʻuvale, lea na tuufaasolo mai iā te outou e o outou augātamā.*
19 A o le toto tāua+ o Keriso,+ ua pei o se tamaʻi mamoe e lē ponā ma e leai se ila.+
20 E moni, na muaʻi silafia o ia a o leʻi faavaeina le lalolagi,+ ae na faaalia mai o ia i le gataaga o taimi ona o outou.+
21 O ia lea ua outou talitonu ai i le Atua,+ o lē na toe faatūina o ia mai i le oti,+ ma avatu iā te ia le mamalu,+ ina ia outou faatuatua ai ma faamoemoe i le Atua.
22 Talu ai ua outou faamamāina outou lava e ala i le usiusitaʻi i le upu moni, lea e iʻu ai i le alofa faamaoni o uso,+ ia matuā alofa le tasi i le isi mai i le loto.+
23 Auā ua fanaufouina outou,+ e lē ala i se fua e pala, ae o se fua e lē pala,+ e ala i le afioga a le Atua soifua, o lē e tumau.+
24 Auā “o tagata uma ua pei o le mutia, ma o lo latou mamalu uma foʻi ua pei o le fuga o laau o le fanua; e magumagu le mutia ma e toʻulu ese ona fuga,
25 a o le afioga a Ieova,* e tumau lea e faavavau.”+ O le “afioga” foʻi lenei ua folafolaina atu iā te outou, o le tala lelei lea.+
Faamatalaga Pito i Lalo
^ Po o le “faamamāina.”
^ Ele., “togiolaina; lavea‘iina.”
^ Po o le “e ala i tū ma aga.”
