O le Tusi Muamua a Peteru 4:1-19
4 Talu ai na mafatia Keriso i le tino,+ o lea ia faaauupegaina ai foʻi outou i na lava mafaufauga; auā o le tagata ua mafatia i le tino, ua lē toe faia e ia le agasala,+
2 ina ia mafai ona ola o ia i aso o totoe o lona olaga i le tino, e lē ina ia faia ai o tuʻinanauga o tagata,+ ae o le faia o le finagalo o le Atua.+
3 Ua lava ia na taimi i aso ua mavae na outou faia ai le manaʻo o tagata o le lalolagi,+ o amioga faauamaaa,* o le tuʻinanau, o le inu tele, o patī lē taupulea,* o tauvaga o inuga ʻava, ma le ifo i tupua e inosia.+
4 Ua faateʻia i latou auā ua outou lē toe taufetuli ma i latou i lenei lava ala e tasi, i le faia o amioga e sili ona matagā ma inosia, ma ua latou faia ai tala leaga e uiga iā te outou.+
5 Ae o le a fai atu e nei tagata se tala i lē ua nofosauni e faamasinoina o ē o ola ma ē ua oti.+
6 O le mea foʻi lea ua folafola atu ai le tala lelei i ē ua oti,*+ o lea e ui ina faamasinoina i latou i le tino e tusa ma le vaaiga a tagata, ae e ola i latou i le agaga e tusa ma le silafaga a le Atua.
7 Ua lata mai le iʻuga o mea uma lava. O lea, ia outou mafaufau lelei,+ ma ia mataala i le faia o tatalo.+
8 Ae e sili i nei mea uma, ia tele le alofa o le tasi i le isi,+ auā o le alofa e ufiufi ai le anoanoaʻi o agasala.+
9 Ia faaalia le agaga talimālō o le tasi i le isi e aunoa ma le tomumu.+
10 E pei ona maua e tagata taʻitoʻatasi se meaalofa, ia faaaogā e auauna ai le tasi i le isi e pei o auauna pule lelei o le agalelei faifua o le Atua, lea ua faaalia i auala eseese.+
11 Afai e tautala se tasi, ia tautala o ia e tusa ma afioga paia mai i le Atua; afai foʻi e auauna se tasi, ia auauna o ia ma faalagolago atu i le malosi mai i le Atua;+ ina ia faamamaluina ai le Atua i mea uma lava+ e ala iā Iesu Keriso. Ia iā te ia le mamalu ma le mana e faavavau, faavavau lava. Amene.
12 Le ʻaupele e, aua neʻi faateʻia outou i tofotofoga ogaoga* ua oo iā te outou,+ e peiseaʻī o se mea uigaese ua tupu iā te outou.
13 Ae ia outou olioli pea+ auā ua tofusia outou i mafatiaga o Keriso,+ ina ia outou fiafia ma olioli foʻi i le taimi o le faaaliga o lona mamalu.+
14 Afai e faalumaina* outou ona o le suafa o Keriso, ua outou fiafia,+ auā ua iā te outou le agaga mamalu, o le agaga lea o le Atua.
15 Peitaʻi, aua neʻi mafatia se tasi o outou ona ua fasioti tagata, pe e gaoi, pe fai mea leaga, po o le isuisu fua i mataupu a isi.+
16 Ae afai e mafatia se tasi ona o ia o se Kerisiano, aua neʻi mā o ia,+ ae ia faamamaluina pea le Atua a o ia tauaveina lenei igoa.
17 Auā ua oo mai le taimi atofaina e amata ai le faamasinoga i le aiga o le Atua.+ O lenei, afai e amata muamua iā i tatou,+ o le ā la le iʻuga o i latou e lē usiusitaʻi i le tala lelei a le Atua?+
18 “Afai foʻi e faigatā ona faaolaina le tagata amiotonu, o le ā la e tupu i le tagata faalēmataʻu ma le tagata agasala?”+
19 O lea la, o i latou ua mafatia ona o le faia o le finagalo o le Atua, ia latou tuuina atu pea o latou ola i Lē e faamaoni na foafoaina mea, a o latou faia mea lelei.+
Faamatalaga Pito i Lalo
^ Po o “amioga leaga e aunoa ma le māsiasi.” O le upu Eleni, o le a·selʹgei·a. Tagaʻi i le Uiga o Upu.
^ Po o “poula.”
^ Po o “tofotofoga e pei o le afi.”
^ Po o le “upuleagaina.”
