O le Tusi Muamua a Peteru 5:1-14
5 O lea la, ona o aʻu o se toeaina, o sē na molimau i mafatiaga o le Keriso, ma o sē ua tofusia faatasi i le mamalu o le a faaalia mai,+ ou te ʻaiʻoi* atu ai i toeaina o iā te outou:
2 Ia leoleo i le lafu mamoe a le Atua+ o loo outou tausia, ia auauna o ni ovasia,* aua le manatu i ai o se avega mamafa, ae ia faia ma le lotomalie i luma o le Atua;+ aua le faia ona o le fia maua o mea i se auala faapiʻopiʻo,+ ae ia faia ma le lotonaunau;
3 aua foʻi le fia pule i tagata o le Atua,+ ae ia avea ma faaaʻoaʻoga lelei i le lafu mamoe.+
4 Pe a faaalia mai le leoleo mamoe sili,+ ona outou maua ai lea o le pale mamalu e lē mamae.+
5 Ia faapea foʻi outou tauleleʻa, ia gauaʻi atu i toeaina.+ Ia oofu* foʻi outou uma i le lotomaulalo o le tasi i le isi, auā e tetee le Atua i ē e faamaualuluga, ae e foaʻi mai e ia le agalelei faifua i ē e lotomaulalo.+
6 O le mea lea, ia faamaulalo ai outou i lalo o le aao malosi o le Atua, ina ia faaeaina e ia outou i le taimi e tatau ai,+
7 a o lafo atu o outou popolega uma iā te ia,+ auā o loo manatu mamafa mai o ia iā te outou.+
8 Ia faaauau ona outou mafaufau lelei ma ia mataala!+ O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.+
9 Ae ia outou tutumau e tetee atu iā te ia,+ ma ia mausalī lo outou faatuatua, auā ua outou iloa o mafatiaga lava ia o loo puapuagatia ai foʻi lo outou ʻauuso atoa i le lalolagi.+
10 Ae pe a uma ona outou mafatia mo sina taimi, o le Atua o lē e tumu i le agalelei faifua, o lē ua valaauina outou i lona mamalu e faavavau+ ona o le autasi ma Keriso, e na te faamāeʻaina le aʻoaʻoina o outou. E na te faamausalīina outou,+ e na te faamalosia outou,+ ma e na te matuā faatumauina outou.
11 Ia iā te ia le mana e faavavau. Amene.
12 E ala iā Siluano,*+ o lē ou te manatu i ai o se uso faamaoni, ua ou tusi atu ai iā te outou i ni nai upu, ina ia faalaeiauina outou ma avatu se molimau faamaoni e faapea, o le agalelei faifua moni lenei o le Atua. Ia outou tutū mausalī ai.
13 O loo momoli atu iā te outou alofaaga o le tuafafine o loo i Papelonia, o ia foʻi o sē ua filifilia e pei o outou, faapea foʻi ma Mareko+ loʻu atalii.
14 Ia faafeiloaʻi e le tasi le isi i le sogi alofa.
Tau ina ia iā te outou uma o ē ua autasi ma Keriso le filemu.
Faamatalaga Pito i Lalo
^ Po o le “apoapoaʻi.”
^ Po o le “ia outou vaavaaia lelei.”
^ Po o le “fusia.”
^ E igoa foʻi iā Sila.
